Nahum (1/3)  →

---

1.

Ninevi chungthua Elkos mi Nahum-in inlarna a hmu thu inziekna bu a nih.

2.

LALPA chu Pathien thikthusie,Phuba la hmang a nih;LALPA chun lungsen takin,A phuba chu a lak hlak a,LALPA chun ama dotuhai chu,A thungrul ngei ngei hlak a,A hmelmahai laka khom,A lungsen a'n tur zing hlak.

3.

LALPA chu mi lung inuoi a na,Nasa taka thilthawthei a na,LALPA chun mi suol tu khom,Hrem loin a'n suo ngai nawh.LALPA-in lampuia a hmang chu,Thawngaleivir le thlipui a na,Sum hi a pilvut pal khuk a nih.

4.

Tuipui a hal a, a kang chat a,Vadunghai khom a kang zo a,Basan le Karmel tlang an tawl a,Lebanon tlang vul mawi a chuoi.

5.

A hmaah tlanghai an inhning a,Muolhai an intui zop a,Hnuoi le a sunga chenghai chu,A hmaah an inthin dur dur.

6.

Tu'n am a lungsen hmason a,A lung inling tuor zo ding?A lungsen chok inhlap chun,Lungpuihai khom a hlap dar.

7.

LALPA chu a tha a,Buoi huna kul nghet a na,Ama ringzotuhai a ngaisak hlak.

8.

Ninevi chu tui lien sangin,Inchim pil hmangtir a ta,Ama dotuhai chu khaw thimah,An rengin hnot lut a tih.

9.

LALPA an phiernahai chu,Aman suktawp vong a ta,Buoina um nawk ta naw nih.

10.

Hling bukah intang an ta,An uoiin indawn rui an ta,Meiin bupawl a lem angin,Anni chu lem hmang a tih.

11.

Aw Ninevi, nangmaa inthokin,LALPA chunga thil suol phiertu,Thurawn rilo petu a hung suok.

12.

LALPA chun hieng hin a tih:"Asuria-hai chu tam tak niin,Inkoppui neihai sien khom,Sam thlukin la um an ta,La bohmang vong tawl an tih.Sukrinum hlak lang che khom,Aw Juda, sukrinum ta nawng ka che.

13.

An ringkol inbattir che chu,Tuhin hlippek ka ti che a,I kol bun peihawn ka tih" tiin.

14.

Ninevi, i chungthuah,LALPAN hieng hin thu a pek:"I hming la hung puttu ding,Thla hrim hrim nei naw ti nih.Tempula i milem ker le siemhai,A rengin suksieng ka ta,I thlan ding buotsai ka tih,Mi suol tawp i ni si a" tiin.

15.

Tlanga inthoka chanchin tha,Hung intluntuhai ke chu, en ta,Inremna thu intluntuhai ke chu!Aw Juda, i kuthai chu inser la,I thutiemhai chu hlen rawh.Mi rilohan run ta naw ni che,Suksiet derin um an tih.

---

Nahum (1/3)  →