←  Micah (4/7)  →

---

1.

Sienkhom hun nuhnunga chun,LALPA tempul ngirna tlang chu,Suknghetin hung um a ta,Tlang po po singtu ning a ta,Muol po po chungah leng a ta,Hnam tin khuoi ang kai an tih.

2.

Hnam tam takin hung pan an ta,Hieng ang hin hung ting an tih:'Thaw ro, LALPA tlangah,Jakob Pathien inah kai ei tiu,A lampui ei hraw theina dingin,A lampui mi lo zirtir a tih' tiin.Zion tlanga inthokin dan thu,Jerusalem-a inthokin LALPA thu,A luong suok ding a ni si a.

3.

Hnam tin inkarah ro rel a ta,Kil tina um hnam hrathai khom,An inkar thu relpek a ta,An kawlhnamhai chu langkumah,Lo keina dingin sut an ta,An fei chu thing kau thumna,Chemkuoiah sut tang an tih.Hnam dangin hnam dang chungah,Chemsen inlen ta naw ni a,Raldo inchuk ta naw bok an tih.

4.

Mi tin mani grep buk hnuoiah,Theichang buk zar hlim hnuoiah,Muong takin thung tang an tih,Tiin Iengkim LALPA chun a hril.

5.

Hnam tinin mani pathien zui an ta,Keini ruok chun kumkhawtluongin,LALPA kan Pathien zui tang kan tih.

6.

LALPA chun hieng hin a tih:"Chu ni a hung tlung pha chun,Kebaihai chu ko khawm ka ta,Saltanghai ko khawm ka tih,Lungngaia ka siem po pohai.

7.

Kebaihai chu hlang ka ta,Hnot lenga um tahai chu,Hnam hrat takah siem ka tih.Chu nia inthok chun LALPAN,Zion tlangah kumkhuoin,An chungah ro rel a tih.

8.

Aw nang, ran ruolhai vengbuk,Zion naunu kulpui nghet,I lalram hmasa tungding nawk ka ta,Jerusalem naunu chu inlal a tih.

9.

Ieng leia tuta i tap rak am?Lal i nei naw am a ni?I remruottu a boral am a ni?Nau hase anga natna chun,A man tah che am a ni?

10.

Aw nang Zion naunu,Nau hase tuor ang elin,Na tak tuorin inrum rawh.Tuhin khawpui suoksanin,Ram hnuoia chun inkul rawh.Babulonah i fe ding a na,Chu chun san suokin um i tih.Chu taka inthok chun LALPANI hmelmahai kuta inthokin,A san suok ding che a nih.

11.

Tuhin hnam tam takhai chu,Do ding che'n an insingsa a;'Sukporchein um sien la,Zion chu inriem khum ei tih'Tiin an ti che a ni hi!

12.

Sienkhom LALPA ngaituona,An hriet phak teu si naw a;A remruot an hriet thiem bok nawh.Hrizawla chil ding buphal angin,Anni chu a lak khawm ta si a.

13.

"Aw Zion naunu, tho la, chil rawh,Kapathir ki peng ka ti che,Ke tinbawrah dar peng ka ti che a,Hnam tam tak i sir nawina ding" tiin.Mi thil an lakpekhai chu,LALPA kuomah hung inhlan unla,An hausakna khom hnuoi pum neitu,LALPA kuoma chun inhlan rawh.

---

←  Micah (4/7)  →