←  Matthew (8/28)  →
1. Tlanga inthoka a hung thlak chun mipui tam takin an zui a.
2. Phar pakhat a kuomah a hung a, bokkhupin chibai a buk a, "Lalpa, i nuom chun i mi sukthieng thei" a ta.
3. Isu chun a hei ban a, a them a, "Nuom e, lo inthieng ta rawh" a ta, phar chu a'n thieng ta nghal a.
4. Isun a kuomah, "Tu kuoma khom hril naw rawh, amiruokchu thiempu kuomah fe la, i dam ngei ti mihaiin an hrietna dingin Mosien thil inhlan dinga a ti chu va'n hlan rawh" a ta.
5. Kapernaum khuo a hung lut chun a kuomah sipai zahotu a hung a,
6. "Lalpa, ka siehlawpa a zeng a, inah a zal zing a, a na inrim hle a nih" tiin thangpuina a hni a.
7. Isun a kuomah, "Hung ka ta, hung sukdam ka tih" a ta.
8. Sipai zahotu ruok chun, "Lalpa, ka in sunga lut dinga ko tlak che ka ni nawh, thu chauh hril la, ka siehlaw chu dam el a tih.
9. Kei khom mi thu hnuoia um ka na, ka hnuoiah sipai an um nawk sawng a, 'Fe rawh' ka ti chu an fe a, 'Hung rawh' ka ti chu an hung el a, ka siehlaw khomin 'Hi hi thaw rawh' ka ti chu a thaw el hlak" a ta.
10. Isun chu chu a hrietin mak a ti hle a, a zuituhai kuoma chun, "Thu dik ka hril cheu hi, Israel lai khom hieng lawma ringna nasa hi tu khom ka hmu nawh.
11. Ka hril cheu hi, sak le thlanga inthokin mi tam tak hung an ta, van rama chun Abraham hai, Isak hai, Jakob hai leh ruoi la kil tlang an tih.
12. Sienkhom, van ram khuo le tuia pieng ni sihaii ruok chu tuol inthimah hnot suok ning an ta, chu taka chun tapin ha rawt an tih" a ta.
13. Sipai zahotu kuoma chun Isun, "Fe ta la, i hni ang chun hung tlung a tih" a ta. Chuongchun, chu darkar ngei chun a siehlaw chu a dam ta a.
14. Peter ina Isu a hung lut chun Peter tarpi, khawsika lo zal chu a hmu a,
15. a kut a thempek a, a khawsik chu a re ta nghal a; a tho a, fak rong a bawlpek a.
16. Zan tieng chun ramhuoi zawl tam tak an hung thuoi a, ramhuoihai chu thu pein a lo hnot suok a, damnaw hung po po hai chu a sukdam bok a.
17. Zawlnei Isaiin, "Ama chun ei hrat nawnahai a lak a,Ei hrivoihai a phur"tia a ziek kha a hung tlung kimna ding a nih.
18. A kawl vela um mipui tam tak a hmuin Isu chun Jordan ral khing tieng kai dingin a zirtirhai chu thu a pek a.
19. Dan zirtirtu pakhat hi a kuomah a hung a, "Zirtirtu, i fena taphotah zui ka ti che" a ta.
20. Isun a kuomah, "Sihalhan kuo an nei a, chungleng vatehai khomin riebuk an nei a, Mihriem Naupa ruok hin chu lu nghatna a nei nawh" a ta.
21. Mi dang, a zirtirhai laia pakhat chun Isu kuomah, "Lalpa, ka pa la va vui zet ka ti aw" a ta.
22. Isun ruok chun, "Mi zui rawh, mithi chun anni mithi chu lo invui el raw hai se" a ta.
23. Chuongchun, longah a chuong a, a zirtirhaiin an zui a.
24. Inringna hman um loin dila chun thlipui na tak a hung hrang thut a, tuifawn chu longah a'n vawr lut hlup hlup el a, Isu ruok chu a in a.
25. Zirtirhai chun an va kei tho a, "Lalpa, mi sanhim rawh, kan pil hmang el ding an ta hi" an ta.
26. Isu chun an kuomah, "Ringna tlawmhai, ieng dinga chuong lawma chu in ti?" a ta. Chuongchun a tho a, thli le tuifawn chu a hal a, a re ta thup a.
27. Mihai chun mak an ti hle a, "Hi pa hi mi ieng ang am an ta le? Thli le tuifawn chenin a thu an awi a ni hi!" an ta.
28. Ral khinga Gadarinj mihai ram an va tlung chun, thlanmuola inthoka hung ramhuoi man pasal pahniin an hung pan a, an kol em leiin chu lampui chu tu khomin an hraw ngam nawh.
29. Anni chun, "Pathien Naupa, kan chungah iem thaw i tum hrim hrim? Hun tiem a tlung hmaa mi soisa dingin i hung a ni maw?" tiin an lo khek khum a.
30. Chu taka inthoka hla nawtea chun vok ruol an tla sup sup a.
31. Ramhuoihai chun, "I mi hnot suok chun vok ruol sunga son mi'n luttir rawh" tiin Isu an ngen a.
32. Isu chun an kuomah, "Va lut ro" a ta. Chuongchun, an hung suok a, vok ruol sunga chun an lut a, vok ruol chu dil pang tenbarama chun an tlan liem a, tuiah an tla hlum ta vong a.
33. Vok vengtuhai chu khuo tieng an tlan a, thil um dan po po le ramhuoi manhai chunga thil tlung chu an va hril a.
34. Chuongchun, a khaw nawtin Isu hmu dingin an hung inthok suok a, ama an hmu chun an biel suoksan dingin an ngen a.
←  Matthew (8/28)  →