Matthew (6/28)  

1. "Felna thil in thawhai chu mi hmu dinga an hmaah thaw lo dingin fimkhur ro, chuong naw chun in Pa vana mi kuomah lawmman hmu naw ti niu.
2. "Chuongchun, retheihai kuomah thil i pekin, lemderhaiin mi inpak an hlaw theina dinga Sunagog le kotthlera hai an thaw hlak ang hin mani tawtawrawt inmutin hril dar naw rawh. Thu dik ka hril cheu hi, an lawmman chu a rengin an hmu der tah.
3. Nang ruok chun thil i pekin, i kut chang tiengin a thaw chu i kut voi tieng inhriettir naw rawh,
4. i thilpek chu a ruk a ni theina dingin; chuongchun a ruka i thaw hmutu i Pa chun lawmman peng a ti che.
5. "In tongtai khomin lemderhai thaw dan angin thaw ve naw ro; mihaiin an hmu theina dingin sunagoga hai, kotthler sira hai ngir puma tongtai an ngaina hlak si a. Thu dik ka hril cheu hi, an lawmman chu an hmu der tah.
6. Nang ruok chu i tongtai ding pha leh i pindan rilah lut la, kot khar la, a ruka hmutu che i Pa kuoma chun tongtai rawh; chuongchun, a ruka i thilthaw hmutu i Pa chun lawmman peng a ti che.
7. Chun, in tongtaiin Jentelhai angin hril ngai ngot samphuol naw ro, an insam rawn leiin ngaithlak hlaw an inring hlak si a.
8. Anni angin um ve naw ro, in mamawhai chu in hni hma khomin in Pain a hriet si a.
9. Chuongchun, hieng ang hin tongtai hlak ro:Kan Pa, vana mi,I hming inza um sien la,
10. I ram hung tlung raw se.I ditzawng vana an thaw angin,Hnuoiah thaw ve raw hai se.
11. Voisun hin fak ding bu mi pe la,
12. Kan leibattuhai kan ngaidam angin,Kan bathai mi ngaidam la.
13. Thlemnaah mi thuoi lut naw la,Mi suol lakah mi sanhim rawh.f tiin.
14. In chunga bawsetuhai in ngaidam chun in Pa vana mi khomin ngaidam veng a ti cheu.
15. Nisienlakhom, mihai bawsietna in ngaidam si naw chun, in Pa vana mi khomin in bawsietnahai chu ngaidam bik naw nih.
16. "Bu in nghei pha khom lemderhai angin ngui hmel put ve naw ro; anni chun mi hmua bu ngheia an inlang theina dingin an hmel an sukpor hlak. Thu dik ka hril cheu hi, an lawmman an hmu zo tah.
17. Nangni ruok chu bu in nghei pha hmai phi fai unla, in lu sahriek nalin khui nam ro,
18. chuongchun in Pa, a ruka um hmaa chauh naw chu mi hmuah bu ngheiin inlang naw ti niu a, in Pa, a ruka hmutu cheu chun rul a ti cheu.
19. "Hangthim le tuiekin an fak siet theina, rukruhaiin ver popa an inruk theina hnuoia hin in ta dingin ro inkhawl naw ro.
20. Hangthim le tuiekin an fak siet thei nawna, rukruhaiin ver popa an inruk thei nawna vana chun in ta dingin ro inkhawl lem ro.
21. In ro umna taphotah in lungril khom a um hlak si a.
22. "Taksa khawnvar chu mit a nih. I mit a tha chun i taksa pumin var suok a tih.
23. I mit a tha naw ruok chun i pumin inthim a tih. I sunga var chu thim a ni chun, chu thim chu a va sa awm de aw!
24. Tu khomin hotu pahni rong a bawl kop thei nawh, pakhat theidain pakhat chu a ngaina amanih, annawleh pakhat chu inzain pakhat chu a hmusit amanih ning a tih. Pathien rong le sum rong bawl kop thei a ni nawh.
25. Chuleiin ka hril cheu hi, in hringna thilah ieng am fain in dawn ding, in taksa thilah ieng am silin in bil ding ti lungkham naw ro. Fak ding nekin hringna, silfen nekin taksa a poimaw lem an naw maw?
26. Chungleng vatehai hi en ta u, bu an tu naw a, an sik naw a, bu inah bu an sek lut bok nawh; sienkhom in Pa vana mi chun a chawm tawl si a. Anni nek daiin in hlu lem naw maw?
27. Nangni lai tu am lungkham leia mani hringna darkar khata sukseig thei?
28. Silfen thuah ieng dinga in lungkham am? Ram lili par inthang dan hi ngaituo ta u, sin an thaw naw a, pat an kher bok nawh.
29. Nisienlakhom, ka hril cheu hi, Solomon meu khom a ropui thei ang taka a'n thuom khan hieng lili par pakhat tluk khom hin chei a ni nawh.
30. Chuongchun, ram hlohna, voisun chauh hring a, a zinga meia ti hmang nawk el ding hman Pathienin chuong ang lawma a chei si chun, aw nangni ringna tlawmhai, chuonghai nek chun a'n thuom nasa zuol naw ding cheu am a ni?
31. Chuleiin, ieng am fain dawn ka ta, ieng am silin bil ka ta ti lungkham naw ro.
32. Jentelhai chun chuong thil chu an hnot tak a nih. In Pa vana mi chun hieng po po hi in mamaw ti a hriet.
33. A ram le a felna chu zong hmasa zet lem ro, chuongchun, hieng po po hi a pek belsa ding cheu a nih.
34. Chuleiin, zinga ding lungkham naw ro, zing chun ama ding lungkham a tih. Ni khat buoina hi ni khata dingin a huntawk.

  Matthew (6/28)