←  Matthew (5/28)  →

---

1.

Mipui chu a hmuin tlangah a kai a, a'n thung a, a zirtirhai an hung inkhawm a,

2.

thu hrilin a'n chuktir tawl a:

3.

Thlarau tienga an pasietzie inhrehai chu an hamtha,Van ram an ta a ni si a.

4.

Lusunhai chu an hamtha,Thlamuongin an la um ding a ni si a.

5.

Thuhnuoirolhai chu an hamtha,Hnuoi hi an rochung ding a ni si a.

6.

Felnaa tam le dangcharhai chu an hamtha,An la tlai ding a ni si a.

7.

Mi zangai theihai chu an hamtha,Zangaina an hlaw ding a ni si a.

8.

Lungril thienghlimhai chu an hamtha,Pathien an hmu ding a ni si a.

9.

Inremna siemtuhai chu an hamtha,Pathien nauhai ti an la ni ding a ni si a.

10.

Felna leia sukdudana tuorhai chu an hamtha,Van ram an ta a ni si a.

11.

"Keima leia mihaiin hal a, suknomna a, indik naw taka suol tinreng thawa an intum pha cheu chun in va hamtha awm ngei de!

12.

Lawm unla, hlim takin um ro, vanah in lawmman a um rawn si a; in hmaa hung zawlneihai khom kha chuong ang chun an lo suknomna hlak kha.

13.

"Hnuoi machi in nih. Nisienlakhom, machi hi lo da ta sien, engtin am suk-al nawk thei ning a ta? Dehawn a, mihai sir de mei mei naw chu ienga khom tlaktlaina a nei ta nawh.

14.

"Khawvel var in nih. Tlang sipa khaw um chu thup thei a ni nawh.

15.

Miin khawnvar sitin leikhawr hnuoiah an sie ngai nawh; in sunga mi po po a el var theina dingin khawnvar inthutnaah an sie lem hlak.

16.

Chuong ang bokin, in var chu mi hmuin var suok raw se, chuongchun thil tha in thawhai chu hmung an ta, in Pa vana mi chawimawi thei an tih.

17.

"Dan thu le zawlneihai thu sukbo dinga hung ka nih ti ring naw ro; sukbo ding ni loin sukfamkim lem dinga hung ka nih.

18.

Thu dik ka hril cheu hi, hnuoi le van a um sung chun, Dan thua mi sunhang chite amanih le thai rang chite amanih khom hi a tlung kim vong hma chun pakhat khom bo naw top a tih.

19.

Hieng thupek laia chin tak khom hi bawsie a, chuong anga thaw ve dinga mihai sukhmutu taphot chu van ramah mi chin tak ting an ta; tu khom zawma inchuktir vetu ruok chu van ramah mi lien ting an tih.

20.

In felnain Dan hretuhai le Farisaihai felna a khum naw chun van ramah lut naw top in tih ti ka hril cheu a nih.

21.

"Tien lai mihai kuomah, 'Tuol i that ding a ni nawh, tu khom tuol that taphot chu a chungthu rel ding a nih' ti a ni thu in hriet a.

22.

Kei ruok chun ka hril cheu hi, tu khom mani unau chunga a san um loac lungsen chu a chungthu rel ding a nih. Chun, tu khom mani unaupa 'Mi intlaw'd titu chu Sanhedrina a chungthu rel ding a ni bok; a unaupa 'Mi invet' titu lem chu Gehennaa fe tlak a nih ti ka hril cheu.

23.

Chuongchun, maichama i thilpek i'n hlan ding laiin i unauin i chungah lungninawna a nei ti i hriet suok chun,

24.

maicham hmaah i thilpek chu maksan la, fe la, i unau chu va'n rempui zet la, chu zoah i thilpek chu inhlan rawh.

25.

I khingpui chu lampuia in intlon laiin inrempui vat rawh, chuong naw chun roreltu inmantir a ti che a, roreltu chun pulis kuomah inhlan a ti che a, lung inah khum pal hlauh rawi a ti che.

26.

Thu dik ka hril che hi, poisa khat khom i tlak vong hma khat chu, chu taka inthok chun intal suok naw top i tih.

27.

" 'I uire ding a ni nawh' ti in hriet a.

28.

Kei ruok chun ka hril cheu hi, tu khom inngaipui chakna mita nuhmei meltu chu a lungrilah a uire der tah.

29.

I mit chang tiengin a sukthluk che chun khel dok la, dehawn dai rawh; i taksa pumpui Gehena peihawna a um nek chun i taksa peng pakhat bohmang chu i ta dingin a tha lem.

30.

Chun, i kut chang tiengin a sukthluk che chun tan la, dehawn dai rawh; i taksa puma Gehena peihawn i ni nek chun i taksa peng pakhat bohmang chu i ta dingin a tha lem.

31.

" 'Tu khom nuhmei ma chun inmakna lekha pe raw se' ti a ni hlak.

32.

Kei ruok chun, tu khom uire lei ni loa mani nuhmei ma taphot chun ama chu a'n uiretir a nih, mak hnung nei khom an uire a nih.

33.

"Tien lai mihai kuomah, 'Khelin inkham naw unla, Lalpa kuoma in inkhamna chu in hlen ngei ding a nih' ti a nih ti in hriet bok a.

34.

Kei ruok chun ka hril cheu hi, inkham ngai hrim hrim naw ro. Van salin inkham naw ro, chu chu Pathien lalthungpha a nih. Hnuoi sal khomin inkham naw ro, chu chu a ke nghatsan a ni si a.

35.

Jerusalem salin inkham bok naw ro, chu chu Lal ropui tak khawpui a nih.

36.

In lu salin inkham naw ro, in sam zai khat khom suktuokin in sukdum thei si nawh.

37.

In thu hrila chun 'A nih' ti chu a nih ni sien, 'A ni nawh' ti chu a ni nawh ni el raw se; chu bak chu suola inthoka suok vong a nih.

38.

" 'Mit aia mit, ha aia ha' ti hi in hriet tah.

39.

Kei ruok chun ka hril cheu hi, mi suol khing naw ro; i bieng chang tieng bentu chu khing tieng khom dawpek rawh.

40.

Tu khomin i lakah thubuoi siemin i zakuo lakpek a tum che chun i korchung khom inlaktir rawh.

41.

Mel khat fe dinga phuttu che chu mel hnih fepek rawh.

42.

A hnitu che chu pe la, i laka puk nuomtu chu nghatsan naw rawh.

43.

" 'I venghai hmangai la, i hmelma chu theida rawh' an ti hi in hriet.

44.

Kei ruok chun ka hril cheu hi, i hmelma chu hmangai la, a suknomnatu che chu tongtaipek rawh,e

45.

in Pa vana mi nauhai in ni theina dingin. Ama chun mi suolhai le mi thahai chungah nisa a'n suoktir a, mi indik le indik nawhai chunga khom ruo a'n surtir hlak.

46.

Nangni hmangaituhai chauh in hmangai hin ieng lawmman am hmung in ta? Siekhontuhai chen khomin chuong ang chun an thaw ve naw am a ni?

47.

Chun, in unauhai chauh chibai in buk hin iem mi dang neka in thaw tamna bik a um? Jentelhai khomin chuong ang chun an thaw ve tho an naw'm a ni?

48.

Chuleiin, in Pa vana mi a famkim angin nangni khom in famkim ding a nih.

---

←  Matthew (5/28)  →