←  Matthew (4/28)  →
1. Chu zoa chun Isu chu Diebol thlem dingin Thlarauin thlalerah a thuoi a.
2. Ni sawmli le zan sawmli bu a nghei hnung chun a phing a hung tam ta a.
3. Thlemtu chu a kuomah a hung a, "Pathien Naupa i ni takzet chun hieng lunghai hi beia inchang dingin thu pe rawh" a ta
4. Isu ruok chun, " 'Mihriem hi bei chauh ringin a hring naw a, Pathien baua inthoka suok thu tinreng ringin a hring ding a nih' ti ziek a nih" tiin a don a.
5. Diebol chun ama chu khaw thienghlimah a thuoi a, tempul sip zumah a'n ngirtir a.
6. "Pathien Naupa i ni takzet chun inchawm thla rawh.'Vantirkohai chu thu peng a ta,I lam tinah veng an ti che;An kutin dom an ti che a,Lungah i ke sui naw ti nih.ti ziek a ni si a" a ta.
7. Isu chun a kuomah, " 'Lalpa i Pathien fie naw rawh' ti khom ziek a nih" a ta.
8. Diebol chun tlang insang takah a thuoi nawk a, khawvel lalram po po le an ropuinahai chu a'n entir a,
9. "Bokkhupin chibai mi buk la, hieng po po hi pe vong ka ti che" a ta.
10. Isu chun a kuomah, "Setan, fe hmang dai rawh! 'Lalpa i Pathien chawibiek la, ama rong chauh bawl rawh' ti ziek a nih" a ta.
11. Chuongchun, Diebol chun a maksan a, vantirkohaiin rong an bawlpek a.
12. Lung inah Johan an khum tah ti Isu'n a hriet chun Galili ram tieng a kir nawk a.
13. Nazaret suoksanin Kapernaum-ah a um ta zing a, chu khuo chu Jebulun le Naftali biel, Galili dil kama um a nih.
14. Zawlnei Isai baua,
15. "Zebulun ram le Naftali ram,Jordan ruoma tuipui panna lamJentelhai chengna Galili rama
16. Thim hnuoia inthunghai chun,Var ropui tak an hmu a;Thina hlim rama chenghai chungah,Var a hung eng suok tah' tia a lo hril kha a hung tlung kim theina dingin.
17. Chu taka inthok chun Isun, "Sim ro, van ram chu a hnai tah" tiin a hril tan ta a.
18. Galili dil kama Isu a leng laiin unau pahnih, Simon, Peter an ti bok le Andri hai len deng lai chu a hmu a, nga mantu an ni hrim a.
19. An kuomah, "Mi zui ro, mihriem mantuah siem ka ti cheu" a ta,
20. chuongchun an lenhai maksanin an zui ta nghal a.
21. Chu taka inthok chun an fe pei a, unau dang pahnih, Zebedai naupa Jakob le a unaupa Johan chu a hmu a, an pa Zebedai rawiin longah an lenhai an lo buotsai a.
22. Anni khom chu a ko a, chuongchun, an long le an pa chu maksanin an zui ve ta nghal a.
23. Isu chun Galili ram pumpui a fang a, sunagoga hai inchuktirin Pathien ram Chanchin Tha a hril a, hri hrang hrang invoihai le natna chi hrang hranga nahai chu a sukdam a.
24. A chanchin chu Suria ram po poah a'n thang a, natna chi tum tuma na, damnaw inrik tak tak hai, ramhuoi zawl hai, hringol invoi hai le zeng hai chu a kuomah an hung thuoi a, a lo sukdam tawl a.
25. Galili rama inthok dam, Dekapolib rama inthok dam, Jerusalema inthok dam, Judai rama inthok dam le Jordan ral khing tienga inthok dama hung mipui tam takin ama chu an zui a.
←  Matthew (4/28)  →