←  Matthew (3/28)  →
1. Chuong lai chun Baptistu Johan chu Judai ram thlalerah thu hrilin a hung a.
2. "Sim ro, van ram chu a hnai tah" a ta.
3. Ama hi a nih zawlnei Isaiin,Thlalera mi khek rawl chun,'Lalpa lamlien siel unla,Lam tlun siempek ro' a tih"tia a chanchin a lo hril kha.
4. Johan chun sanghawngsei hmula siem zakuo a hak a, savun kawngchun a chun a, a bu chu khauthikthi le khuoizu a nih.
5. Chuong lai chun Jerusalem le Judai ram hmun tina umhai le Jordan vadung kam vela umhai chun ama chu an hung pan a,
6. an suolhai an inpuong a, Jordan vadungah a lo baptis tawl a.
7. Baptisma chang dinga hung tam tak lai chun Farisaihai le Sadukaihai khom a hmu ve a, an kuomah, "Rul thlahai, lungsenna hung tlung ding chu tlansan dingin tuin am a'n fui cheu a?
8. In simzie ang peiin thilthawin ra insuo lem ro.
9. Kan pa chu Abraham annawm' tiin ngai suktha el naw ro; ka hril cheu hi, Pathien chun hieng lunghai hi Abraham thlaah a'n din thei a nih.
10. Tuta inthok el khom hin thing bul tinah hreipui sie a ni tah, ra thaa ra naw thing taphot chu phura meia ti el ding a nih.
11. Kei chun sim inentirna dingin tuiin ka baptis hlak cheu a; ka hnunga hung ding ruok chu keima nekin a ropui lem a, a pheikhok khai tlak khom ka ni nawh. Ama chun Thlarau Thienghlim le meiin a baptis ding cheu a nih.
12. Hrizawla buhai chu thlei faia bu ina hlu lut dingin a kutin sisep a chawi a, a sihai ruok chu mei rem thei loah raw hmang a tih" a ta.
13. Chuong lai chun Johan kuta baptisma chang dingin Galili rama inthokin Jordan vadungah Isu a hung a.
14. Johan ruok chun, "Kei hi i baptis ngai lem ka ni vei leh, ka kuomah i hung lem tlat a ni maw?" tiin a sel a.
15. Nisienlakhom Isun, "Tu hin remti hram rawh, hieng ang felna thil po po hraw kim hi ei ta dingin thil mawihnai a nih" a ta, Johan chun a remti ta a.
16. Isun baptisma a chang zo chun tuia inthokin a hung suok nghal a. Chuong lai tak chun van a hung inhong a, vathu anga Pathien Thlarau hung tum le a chunga hung fu chu a hmu a.
17. Ngai ta, vana inthoka rawl chun, "Hi hi ka Naupa, ka Dittak chu a nih, a chungah ka lawm em em a nih" a ta.
←  Matthew (3/28)  →