←  Matthew (28/28)    
1. Sabat zo, Pathienni tuk, khuo a var tawmin Mari Magdalin le Mari dang chu thlan en dingin an fe a.
2. Lir nasa takin a hung inhning a, Lalpa vantirko vana inthokin a hung tum a, lungkhar chu a hung inhlum son a, a chungah chun a thung a.
3. A'n lang dan chu kawlphe ang a na, a silfenhai chu vur angin a var a.
4. Vengtu sipaihaiin ama chu an ti em leiin an inthin hawp a, an thidang a.
5. Vantirko chun nuhmeihai chu a biek a, "Ti naw ro, Isu an hemde kha in zong a nih ti ka hriet.
6. Hi taka hin a um ta nawh, a hril tah ang khan a tho nawk tah. A zalna hi hung en ta u
7. Chuleiin, fe nghal unla, a zirtirhai kuomah, 'Mithi laia inthokin keitho a ni tah a, Galili ramah a lo fe hmasa ding a na, chu taka chun ama chu hmung in tih' ti ro. Ngai ta u, ka hril ta cheu hi" a ta.
8. Ti le lawm em em pumin thlana inthok chun inhmaw takin an suok a, zirtirhai hril ding chun an tlan kir a.
9. Isun anni chu a'n tuokpui thut a, "Chibai" a ta. Chuongchun, an va hnai a, a ke chela kunin an chawibiek a.
10. Chun, Isun an kuomah, "Ti naw ro. Fe unla, Galili rama fe dingin ka unauhai kha va hril ro, chu taka chun mi hmung an tih" a ta.
11. Lampuiah nuhmeihai an la thang mek lai chun vengtu thenkhat chu khawpuiah an va lut a, thil hung tlung po po chu thiempu lalhai kuomah an ripawt a.
12. Thiempu lalhai le upahai an inrawn zo hnung chun thaw dan ding an phierruk a. Vengtu sipaihai chu tangka tam tak an pek a.
13. Chun. an kuomah, "Zanah zirtirhai an hung a, kan in karin an lo inruk hmang a nih' tiin hril ro.
14. Chun, Larsapin a lo hriet pal a ni khomin ama chu suklungawi kan ta, buoi sa ve lo dingin siem kan ti cheu" an ta.
15. Chuongchun, tangka chu an lak a, an ti ang tak chun an hril thang a. Chu tienami chu tu chen hin Judahai lai an la hril dar tah pei a nih.
16. Chuongchun, zirtir sawm le pakhathai chu inhmuna dinga Isun a hril, Galili rama tlang pakhat a chun an fe a.
17. Ama an hmu chun an chawibiek a; a then ruok chun an la ringhla deu a.
18. Isun anni chu a hung pan a, a biek a, "Hnuoi le vana thuneina po po pek ka ni tah.
19. Chuongchun fe unla, hnam tin zirtirah siem unla, Pa le Naupa le Thlarau Thienghlim hmingin baptis un la, thu ka pek po po cheu hi zawm dingin zirtir ro
20. Chun, kei in kuomah kumkhuoin, hun tawp chen khomin, um zing ka tih" a ta.
←  Matthew (28/28)