←  Matthew (26/28)  →
1. Isun chuong thu po po a hril zo chun a zirtirhai kuomah,
2. "Ni hni hnungah Fekan Kut a um ding ti in hriet a, Mihriem Naupa hi hemde dingin an pek suok ding a nih" a ta.
3. Chuong lai chun Thiempu laltak Kaiafa an ti in huon sung tuolah thiempu lalhai le vantlang upahai chu an inhawr khawm a,
4. Isu chu a ruk a rala man le that dan ding an phierruk a.
5. "Sienkhom, Kut sung chu ni naw sien, chuong naw chun mipui lai buoina suok hlauh rawi a tih" an ta.
6. Bethani khuoa phar pakhat Simon ina Isun thlaithleng a ot laiin,
7. alasbastar bura hriek rimtui to tak chawiin nuhmei pakhat a kuomah a hung a, a luah hriek rimtui chu a buok a.
8. Zirtirhaiin chu chu an hmuin an lung a sen hle a, "Ieng dinga hienga rimtui a sukhmangthai mei mei am a na?
9. Hi hriek rimtui hi to taka zor a, mi retheihai pek thei a ni vei leh" an ta.
10. Isun chu chu a hrietin an kuomah, "Hi nu hi ieng dinga in sukbuoi am? Thil tha tak ka chungah a thaw a ni hi.
11. Mi retheihai chu in kuomah ieng lai khomin an um a, kei ruok chu nangni lai um zing ding ka ni nawh.
12. Hi hriek rimtui, ka taksaa a bur hi, phum dinga a mi buotsaina a nih.
13. Thu dik ka hril cheu hi, khawvel hmun tinah hi Chanchin Tha hi an hrilna taphotah hi nu thilthaw khom hi, ama hriet zingna dingin, hril ve pei an tih" a ta.
14. Chu hnung chun sawm le pahnihai laia pakhat, Juda Iskariot an ti chu thiempu lalhai kawlah a fe a,
15. "Ama chu inmantir ka ti cheu. Iem mi peng in ta?" a ta. Chuongchun, tangka sawmthum pek an tiem a, ama chu an pek a.
16. Chu taka inthok chun a'n mantir dan ding remchang a zong ta zing a.
17. Chol thang lo bei kut ni hmasa taka chun zirtirhai chu Isu kuomah an hung a, "Khaw lai hmun am i ta dingin Fekan Kut ruoi buotsai inlang i nuom a?" tiin an hung indon a.
18. Ama chun, "Khawpuia tu amanih inah va fe unla, a kuomah, 'Zirtirtuin ka hun a hnai tah a, ka zirtirhai leh i inah Fekan Kut ruoi kan kil ding a nih' a tih tiin va hril ro" a ta.
19. Isun a hril ang charin zirtirhai chun an va hril sawng a, Fekan Kut zanbu ding chu an buotsai a.
20. Zan tieng chun zirtir sawm le pahnihai leh zanbu chu an kil a.
21. An fak lai chun Isun, "Thu dik ka hril cheu hi, nangni laia mi pakhatin mi'n mantir a tih" a ta.
22. Chuongchun an lungzing ta em em a, a hmatiemin Isu kuomah, "Lalpa, kei chu ni naw ning maw?" an ta.
23. Isun, " Ka ruola thlenga a kut phumtu ngei chun mi'n mantir a tih.
24. Mihriem Naupa hi a chungthu an lo ziek ang takin a fe ding a nih; sienkhom Mihriem Naupa inmantirtu ding chung chu a rik ie; chu mihriem chu pieng naw law law sien a ta dingin a tha lem" a ta.
25. A'n mantirtu ding Juda Iskariot chun, "Rabbi, kei chu ni awm naw tak maw?" a ta. Ama chun, "Ni e, nang i nih" a ta.
26. An fak lai mek chun Isun bei chu a lak a, lawmthu a hril zoin a khoi a, a zirtirhai kuoma chun a pek a, "La unla, fa ro; hi hi ka taksa a nih" a ta.
27. Chuong ang bokin no khom chu a lak a, lawmthu a hril zoin an kuomah a pek a,
28. "In rengin dawn ro; hi hi ka thisen, thuthlung thisen, suol ngaidamna dinga mi tam tak ta dinga suok ding chu a nih.
29. Ka hril cheu hi, ka Pa rama nangni leh a thara ka dawn hun a tlung hma khat chu grep ra tui hi dawn nawk ta ngai naw ning" a ta.
30. Hla an sak zoin Oliv tlang tieng panin an suok a.
31. Chun, Isun an kuomah, "Voizan hin in rengin mi nghatsan vong in tih; 'Berampu chu vuong ka ta, beram ruol chu indar an tih' ti ziek a ni kha.
32. Nisienlakhom, keithoa ka um hnungin Galili ramah lo fe hmasang ka tih" a ta.
33. Peter ruok chun, "An rengin nghatsan vong hai sien la che khom kei chun nghatsan naw ning cheng" a ta.
34. Isun a kuomah, "Thu dik ka hril che hi, ar a khuong hmain voizan hin voi thum mi'n phat i tih" a ta.
35. Peter chun, "Nang leh thi ding ni lang khom, inphat naw top ka ti che" a ta. Chuong ang chun zirtir danghai khomin an ti seng a.
36. Chu zo chun Isu le a zirtirhai chu hmun pakhat Getsemani an tia chun an fe a, an kuomah, "Saw laia ka va tongtai karin hi taka hin lo inthung ro" a ta.
37. Peter le Zebedai nauhai pahni chu a thuoi a, thlaphangin a beidong hle a.
38. An kuomah, "Ka thla a phang ngot el, thipui khop hiel a nih. Hi taka hin lo um inla, mi mengpui ve ro" a ta.
39. Hma tieng a va fe hret a, a bokkhup a, "Aw Pa, a thei chun hi no hin mi pel hram raw se; nisienlakhom ka thu ni loin nangma thu ni lem raw se" a ta.
40. Zirtirhai kuoma chun a hung a, an inlusu chu a hung hmu a. Chuongchun, Peter kuomah, "E khai, darkar khat khom in mi mengpui thei naw a ni maw?
41. Thlemnaa in lut nawna dingin invengin tongtai ro. Thlarau chun a pei a, taksa ruok chu a hrat naw hlak a nih" a ta.
42. A va fe voi hninaa chun a tongtai nawk a, "Aw Pa, hi no hi ka dawn loa lak hmang thei a ni naw chun, nangma thu angin tlung raw se" a ta.
43. A hung nawk a, an inlusu a hung hmu nawk a, an meng zo hlol si naw a.
44. Chuongchun a maksan tawl nawk a, a voi thumnaah a thu hril ngai bok hrilin a tongtai nawk a.
45. Chu zoa chun a zirtirhai kuomah a hung a, "In la inlusu zing a ni maw? Ngai ta u, Mihriem Naupa hi mi suolhai kuta inhlan a ni ding hun chu a hung tlung tah.
46. Tho unla, feng ei tiu. En ta u, a mi'n mantirtu ding khom a hung tlung ta saw!" a ta.
47. A hril lai zingin Juda, sawm le pahni laia pakhat chu a hung tlung a, ama ruol chun thiempu lalhai le vantlang upahai hung tir mi tam tak, kawlhnam le hmoltum chawiin an hung tlung bok a.
48. A'n mantirtu ding khan, "Ka fawp taphot chu ama ning a tih" tia inchikna a lo hril sa vong a na.
49. Chuongchun, Isu a va pan ta nghal a, "Chibai Rabbi" tiin a fawp a.
50. Isu chun, "Ruola, i hung san chu thaw el rawh" a ta. Chu phing leh man mihai chun an hung hnai a, Isu chu an chel a, an man ta a.
51. Isu rawihai laia pakhat chun a kawlhnam a phawi a, thiempu laltak siehlaw chu a sat a, a nakawr a fikpek a.
52. Chu phing leh Isun, "I kawlhnam kha a paiah thun rawh; kawlhnam ruoitu po po chu kawlhnamin an thi ding a ni si a.
53. Vantirko singsari neka tam hung tir nghal dingin ka Pa ka hni thei naw i ring am a ni?
54. Sienkhom, ngen ta lang, hieng ang thil hung tlung ding hrilna Pathien Lekha thuhai chu ieng tin am hlen ni thei a ta?" a ta.
55. Chuong lai chun Isun mipuihai kuomah, "Hel hmang man ding ang elin kawlhnam le hmoltum chawiin in hung inthok a ni maw? Ni tin tempulah inthungin mi ka'n chuktir hlak a, in mi man si nawh.
56. Nisienlakhom, zawlneihai thuziek po po chu a hung tlung kimna dingin hieng thil hi a um a ni hi" a ta. Chuongchun, a zirtirhai chun an zamsan a, an tlan hmang ta rip a.
57. A mantuhai chun Isu chu thiempu laltak Kaiafa in, Dan zirtirtuhai le khawtlang hotuhai an lo inkhawmnaa chun, an thuoi a.
58. Peter chun hla feah thiempu laltak in huon sung tuol lai chen a zui a; chun, a va lut a, a tawp chena thil tlung chu hmu tumin vengtuhai lai a thung ve a.
59. Thiempu lalhai, Dan zirtirtuhai le Sanhedrin mi po po chun thu khela intumin, Isu an sukhlum thei dan ding an dap khawm a.
60. Hrepuitu tehlem tam tak an ngira chu thu tling an hmu zo si nawh.
61. A tawpah mi pahni an hung ngir a, "Hi pa hin, 'Hi Tempul hi thieka ni thuma bawl nawk thei ka nih' a tih" an ta.
62. Chuongchun, thiempu laltak chu a ngir suok a, Isu kuomah, "Hienghai hekna che hi i don thei naw maw? An hekna che hi ieng thu am an ta a?" a ta.
63. Isu ruok chu a to zing a. Thiempu laltak chun, "Pathien hring salin thu ka kam che: Krista, Pathien Naupa i ni le ni naw mi hril tawl rawh" a ta.
64. Isu chun, "I ti annawm. Nisienlakhom, ka hril cheu hi, hun la tlung dingah Mihriem Naupa hi Ropuitak chang tienga thung le van sum laia hung la hmung in tih" a ta.
65. Chu phing leh Thiempu laltak chun a silfenhai a keithler a, "Pathien a hrilsiet a nih; thuhretu dang ei la ngai rop am a ni? Ngai ta u, Pathien a hrilsietzie chu tu el khan in hriet ta kha.
66. Ieng tin am in ngai a?" a ta. "Thi tlak a nih" tiin an don a.
67. A hmaiah chil an sak khum a, an lok a,
68. thenkhatin, "Nang, Krista,q tuin am a ben che, hril thei rawh" tiin an ben bok a.
69. Peter chu in inhuon sung tuol lai a'n thung a, siehlaw nunghak a kuomah a hung a, "Nang hi Galili mi Isu kuoma um kha i nih" a ta.
70. Peter ruok chun, "I thu hril umzie chu ka hriet map nawh" tiin an renga hmaa chun a'n phat a.
71. In inhuonna kotpuia a va suok chun siehlaw nunghak dangin a hmu a, chu taka umhai kuoma chun, "Hi pa hi Nazaret Isu kuoma um ve kha a ni hi" a ta.
72. Peter chun, "Chu mihriem chu ka hriet ngai nawh' tiin inkham hielin a'n phat nawk a.
73. Sawt naw te hnungah chu taka ngirhai chun Peter kuomah, "Nang khom hi anni laia thang ni ngei i tih, i tong awphawia inthokin a'n hriet annawm" an ta.
74. Peter chun tongsie phur hiel dinga inkhamin, "Chu mihriem chu ka hriet ngai nawh" a ta.
75. Ar a khuong ta nghal a. Isun, "Ar khuong hmain nangin voi thum mi'n phat i tih" a ti kha Peter chun a hriet suok a. Chuongchun, a suok a, lungna takin a tap zoi zoi a.
←  Matthew (26/28)  →