←  Matthew (25/28)  →
1. "Van ram chu nunghak thienglam sawm, an khawnvar seng chawia moneitu hmuok dinga suokhai ang chu a nih.
2. Anni laia panga chu an intlaw a, panga chu an var a.
3. Intlawhai chun khawnvar an chawi ve senga chu a tui an chawi sa naw a.
4. A varhai ruok chun an khawnvar leh a burin a tui khom an chawi sa a.
5. Moneitu chu a hung intak leiin an rengin imuin a zim a, an in ta vong a.
6. "Zanrila chun rawlin, 'Ngai ta u, moneitu chu a hung ie, hmuok dingin hung suok ro khai' tiin a hung puong a.
7. Chu phing leh nunghakhai chu an tho vong a, an khawnvarhai an buotsai a.
8. Intlawhai chun a varhai kuomah, 'In khawnvartui kha a then mi sem ve ro, kan khawnvarhai a thi ding an tah" an ta.
9. Nisienlakhom, a varhai chun, "Ni thei naw nih. Keini le nangni ta ding indai thei naw nih. A zortuhai kuomah fe unla, va'n chaw lem ro" an ta.
10. Inchaw dinga an fe karin moneitu chu a hung tlung a. Nunghak thienglam, inpei saa lo umhai chu ama ruolin mo lawmna ruoi kil dingin an lut a, kot chu an khar tah a.
11. Chu hnung chun nunghak danghai khom chu an hung tlung ve a, 'Pu, pu, kot mi hongpek rawh' an ta.
12. Ama ruok chun, 'Thu dik ka hril cheu hi, nangni ka hriet ngai naw cheu' a ta.
13. Chuleiin, inring zingin um ro, Mihriem Naupa hungna ding ni le darkar chu in hriet si nawh.
14. " Van ram chu mi pakhat, ram danga inzin dingin a siehlawhai ko khawm a, an kuomah a sumhai a'n koltir ang chu ning a tih.
15. An tlin tawk ang peiin siehlaw pakhat chu talen nga, pakhat chu talen hni, pakhat dang chu talen khat, a pek a, a'n zin ta dai a.
16. Talen nga dongtu chu a va sumdawng nghal a, talen nga dang a sukhlawk a.
17. Chuong ang bokin talen hni dongtu chun talen hni dang a sukhlawk a.
18. Talen khat dongtu ruok chun hnuoi a cho a, a pu tangka chu a phum ruk ta lem a.
19. "Sawt tak hnungah an pu inzin chu a hung kir a, an sum kolhai chu a sukfelpui a.
20. Talen nga dongtu chu a hung a, talen nga dang chu a hung chawi a, "Pu, nangin talen nga i mi'n koltir a, en ta, talen nga dang ka lo sukhlawk ie" a ta.
21. A pu chun, "Siehlaw tha le ringum, i thaw tha. Tlawmte chungah i ringum a, tam tak chungah inumtir ka ti che. Hung la, i pu lawmnaa hin hung thang ve rawh' a ta.
22. Talen hni dongtu khom chu a hung a, "Pu, talen hni i mi'n koltir kha, en ta, talen hni dang ka lo sukhlawk' a ta.
23. A pu chun, 'Siehlaw tha le ringum, i thaw tha. Thil chikteah i ringum leiin thil tam tak chungah inumtir ka ti che. Hung la, i pu lawmnaa hin hung thang ve rawh" a ta.
24. "Talen khat dongtu khom chu a hung a, 'Pu, mi tawk khir tak i nih ti ka hriet a, i tu nawnaa khom i sik hlak a, chi i the nawnaa khom a ra i lak khawm hlak.
25. Chuleiin ka ti che a, i talen kha hnuoiah ka phum ruk a, en ta, a ngai char kha i hmu nawk hi" a ta.
26. A pu chun, "Nang siehlaw suol le thabopa, ka tu naw khom ka sik a, chi ka the nawnaa khom ra ka sik hlak ti i hriet maw?
27. Chuong a ni sa chun, ka tangka kha sumdawngtuhai kuomah a pung umin i lo sie ding annawm, ka hung kirin a pung leh ka hmu theina dingin.
28. Talen khat kha lakpek unla, talen sawm neitu kha pe ro.
29. A nei taphot pek belsa ning an ta, hung hau an tih. A nei naw chu, a nei sun khom lakpek ning an tih.
30. Siehlaw hmangna bo kha tuol inthimah pei suok ro, chu taka chun tapin ha rawt raw se.
31. "Chun, Mihriem Naupa hi a ropuinaa vantirko po po leh a hung huna chun a van lalthungpha ropuia chun inthung a ta,
32. a hmaa chun hnam tin hung inkhawm an ta, beram vengtuin kel le beram a the angin annihai chu theng a ta,
33. beramhai chu a chang tieng, kelhai chu a voi tieng sieng a tih.
34. "Chu huna chun Laltak chun a chang tienga mihai kuomah, 'Ka Pa vochuomhai, hung unla, khawvel siem tira inthoka in ta dinga ram buotsai chu chang ro.
35. Ka phing a tamin nangnin fak ding in mi pek a; ka dang a charin dawn ding in mi pek a; mikhuol ka niin in mi'n tlungtir a;
36. saruoka ka umin puon in mi'n siltir a; ka damnawin in mi enkol a, lung ina ka'n tangin in mi hung kan hlak' la ting a tih.
37. "Chuongchun, mi felhai chun, 'Ieng tik khan am phingtamin kan hmu chea bu kan pek che a, dangcharin i uma tui kan indawntir che?
38. Ieng tik khan am mikhuolin kan hmu che a, kan intlungtir che a, saruokin i uma puon kan insiltir che?
39. Ieng tik khan am damnawin amanih, lung ina intangin amanih kan hmu che a, kan kan che?' tiin la don an tih.
40. Laltak chun, 'Thu dik ka hril cheu hi, hieng ka unauhai laia chin tak pakhat chunga in thaw chu ka chunga in thaw a nih' tiin la don a tih.
41. "Chu zoa chun, a voi tienga mihai kuoma khom chun, 'Tongsie phurhai, kumkhuo meidil, Diebol le a rawihai ta dinga buotsaia chun mi fesan ro.
42. Ka phing a tamin nangnin fak ding ieng khom in mi pek nawh, ka dang a charin dawn ding in mi pek bok nawh.
43. Mikhuol ka niin in mi'n tlungtir naw a; saruoka ka umin puon in mi'n siltir naw a, ka damnaw lai le lung ina ka'n tang laiin in mi kan nawh' la ting a tih.
44. "Anni khom chun, 'Lalpa, ieng tik lai khan am phingtamin amanih, dangcharin amanih, mikhuolin amanih, saruokin amanih, damnawin amanih, lung ina intangin amanih kan hmu che a, rong kan bawlpek naw che?' tiin la don an tih.
45. Ama chun, 'Thu dik ka hril cheu hi, hieng mi chin tak laia pakhat chunga in thaw naw chu ka chunga khom in thaw naw a nih' la ting a tih.
46. "Chuongchun, anni rawi chu chatuon hremnaah feng an ta, mi felhai ruok chu chatuon hringnaah lut an tih" a ta.
←  Matthew (25/28)  →