←  Matthew (24/28)  →
1. Isu chu tempula inthokin a suok a, a fesan ding laiin tempul an bawl dan chu inentir dingin a kuomah a zirtirhai chu an hung a.
2. Ama ruok chun an kuomah, "Hieng po po hi in hmu maw? Thu dik ka hril cheu hi, lung intieng po po hi pakhat khom sukchim loa maksan um naw nih" a ta.
3. Oliv tlanga Isu a thung lai chun a zirtirhai chu a falin an hung a, "Chuong chu ieng tik am a hung tlung ding a na? I hung nawkna le khawvel tawp ding inchikna chu ieng am ning a ta? Mi hril rawh" an ta..
4. Isun an kuomah, "Tu khomin an hlem nawna ding cheuin fimkhur ro.
5. Ka hming salin, 'Kei hi Krista chu ka nih' tiin mi tam tak hung suok an ta, mi tam tak hlem hmang an tih.
6. Indo le indo thuthang hrieng in ta, sienkhom thlaphang lo dingin fimkhur ro. Chuong thil chu a hung tlung ding hrim a na, hun tawp ruok chu la ni hri naw nih.
7. Hnam hrang le hnam hrang indo an ta, sorkar hrang le sorkar hrang indo bok an ta; hmun hrang hrangah tam tlang a ta, lir inhning bok a tih.
8. Chuong po po chu nauhase intanna a nih.
9. "Chun, soisak dingin inmantir an ti cheu a, keima leiin hnam tin theida ning in tih.
10. Chu huna chun mi tam tak ringna inphet a ta, inphatsan tuong an ta, intheida ton an tih.
11. Zawlnei tehlem tam tak hung suok an ta, mi tam tak hlem an tih.
12. Ritlona a pung nasa em leiin mi tam tak hmangaina chu la dei a tih.
13. Nisienlakhom, a tawp chena ngir nghettu chu sandamin um a tih.
14. Ram Chanchin Tha hi hnam po po hriet dingin khawvel pumpuiah hril ning a ta, chu zoa chun tawpna chu hung tlung a tih.
15. "Chuongchun, sukramtu tirdakum, zawlnei Daniel hril kha hmun thienghlima ngir in hmu huna chun (tiemtu chun a umzie hre raw se),
16. Judai rama umhai chu tlangramah tlan raw se.
17. In chunga um chu in sunga thil inchu dingin tum thla naw raw se.
18. Loa fe khomin silfen inchu dingin inah fe naw raw se.
19. Chuong hun laia inraihai le naute pom lai neihai ta ding chun a va rapthlak awm ngei de!
20. In tlansiet ni ding chu thlasik lai amanih le Sabat ni amania a hung tlung nawna dingin tongtai ro
21. Chu huna chun rinumna nasa tak tlung a ta, chuong anga rinumna nasa chu khawvel hung uma inthok tu chen hin a la um ngai naw a, um nawk ta ngai bok naw nih.
22. Chuong nihai chu suktawi ni naw sien chu, tu khom dam khawsuok um naw ni hai; sienkhom, thlanghai leiin chuong nihai chu suktawi ning a tih.
23. "Chu huna chun tu khomin in kuomah, 'En ta u, Krista chu hi taka hin a um' amanih, 'Saw taka son a um' amanih an ti chun awi naw ro.
24. A san chu, Krista tehlem le zawlnei tehlem hung suok an ta, thlanghai chen khom an hlem theina dingin inchikna thilmak ropui tak tak thawng an tih.
25. Ngai ta u, a hun a tlung hmain ka hril diem cheu a ni hi.
26. Chuongchun, in kuomah, 'Saw, thlalerah a um' an ti chun fe suok naw ro. 'En ta u, pindan sungrilah a um' an ti khomin awi bok naw ro.
27. Sak tienga inthoka kawl hung inlepin thlang tieng chen a det var angin Mihriem Naupa hung nawk ni khomin um a tih.
28. "Khaw lai khom saruong umna taphotah mulukolhai khom an fuon khawm hlak.
29. "Chun, chuong ang rinumna ni chu a liem charin nisa inthim a ta, thlain var insuo naw ni a, vana inthokin arasihai til an ta, van thilthawtheina chu sukhning ning a tih.
30. Chu huna chun Mihriem Naupa inchikna vanah hung inlang a ta, hnuoia hnam tinin sun an ta, Mihriem Naupa hi thilthawtheina le ropuina nasa tak leh van sum laia hung hmung an tih.
31. Vantirkohai chu tawtawrawt ri inring tak leh tir suok a ta, anni chun thlanghai chu hnuoi kil lia inthok le van tawpa inthoka van khing tieng tawp chenin lawr khawm an tih.
32. "Chuongchun, theichang kung um dana inthokin thil inchuk ro. A zik a hung indawn a, a hna a hung inder chun nipui a'n tan ding ti in hriet hlak.
33. Chuong ang bokin, hieng thilhai hi in hmu pha chun ama hung chu a hnai ta a, kotkhar bulah a um tah ti hre ro.
34. Thu dik ka hril cheu hi, chuong po po chu a tlung kim hma chun tu lai mihaio hi bo naw top an tih.
35. Hnuoi le van bo a ta, ka thu ruok chu bo naw nih.
36. "Nisienlakhom, chuong thil hung tlung hun ding ni le dar chu Pa chauh naw chun tu khomin an hriet nawh, vana vantirkohai khomin, Naupa khomin an hriet nawh.
37. Nova dam laia thil tlung ang bok khan Mihriem Naupa hung nawk ni chun tlung a tih.
38. Tui let hma, longa Nova a lut ni chenin fain an dawn a, nuhmei pasal an innei a.
39. Tui a hung let a, an renga a lak hmang vong chen khan an chungah iem a hung tlung ding ti tu khomin an hriet nawh. Mihriem Naupa a hung nawk pha khom chuong ang bok chun ning a tih.
40. Loah mi pahni um an ta, pakhat chu lak ning a ta, pakhat chu maksan ning a tih.
41. Nuhmei pahniin bu suk an ta, pakhat chu lak ning a ta, pakhat chu maksan ning a tih.
42. "Chuongchun, inring zingin um ro, ieng tik ni am in Lalpa a hung ding ti in hriet si nawh.
43. Nisienlakhom, hi hi hre ro: zana rukru hung ding hun inneituin hre lawk sien chu, lo inring a ta, a in inroktir naw nih.
44. Chuleiin, nangni khom inpei sa zingin um ro, in beisei naw lai takin Mihriem Naupa chu hung hlauh rawi a tih.
45. "A puin a insunga siehlawhai chunga hotu le a hun taka an bu sempektu dinga siehlaw ringum le var a sie chu tu am ni tang a ta?
46. A pu a hung kir nawk phaa chuong anga thawtu siehlaw a hung hmu chu a ta dingin a tha.
47. Thu dik ka hril cheu hi, a nei po po chunga hotuah siem a tih.
48. Amiruokchu, chu siehlaw chu mi suol ni ta sien,
49. 'Ka pu hi hung vak naw nih' tia ngaiin a siehlawhai chu vawin, zuruihai leh fain dawn sien,
50. a pu chu a beisei naw ni le a'n ring naw hun darkarah hung a ta,
51. bong tam insuongp a ta, lemderhai chan inchangtir a ta, chu taka chun tapin ha rawt a tih.
←  Matthew (24/28)  →