←  Matthew (23/28)  →
1. Chuongchun, mipui le a zirtirhai kuoma chun Isun,
2. "Dan hretuhai le Farisaihai chu Mosie Dan zirtirtua ruot an ni a;
3. chuleiin an thu awi unla, an hril cheu taphot chu thaw ro. Nisienlakhom, an thilthaw ang chu thaw ve naw ro, an hrilhai chu a takin an zawm ngai si nawh.
4. Phur rik tak tak an siem a, mi liengkoah an hnawk a, anni ruok chun kut hmawr khomin an tawk nuom nawh.
5. An thaw taphot chu mi hmu dinga an thaw a nih. An ban le an bawka an hren de thubawml chu an suklien a, an tongtaina puonm hmawr inbawk khom an suksei bok a;
6. ruoi thena hmunah thungna tha tak le sunagoga hai thungna langsar dam, bazar hmuna mi chibai buk dam le
7. mihaiin 'Rabbi' tia an ko dam chu an thlakhla hlak si a.
8. "Nangni ruok chu 'Rabbi' tiin inko naw ro, zirtirtu pakhat chauh in nei a, inrengin unau in ni si a.
9. Chun, hnuoia mi tu khom 'pa' ti naw ro, 'Pa' pakhat in nei, vana mi chu.
10. 'Zirtirtu' inti naw ro, Zirtirtu pakhat chauh in nei a, chu chu Krista a nih.
11. Nangni laia a ropui tak chu in rongbawltu a ni ding a nih.
12. Tu khom inngaihlu chu tlawm an ta, inngaitlawm taphot chu chawimawi ning an tih.
13. "Nangni Dan zirtirtu le mi lemdertu Farisaihai, in chung a rik ie! Mihai lutna ding van ram kot in kharpek a, nangni hlak lut nuom si lo, a lut tumhai lut hlak in phal bok si nawh.
14. Nangni lemderhai, hmeithaihai in le lo in fak tlaran a, mi hmuah sawt tak tak in tongtai a. Chuleiin, nasa nawk zuola hrem ning in tih.
15. Nangni Dan zirtirtuhai le mi lemdertu Farisaihai, in chung a rik ie! Saphunn pakhat siem dingin khawmuol le tuipuiah in inzin kuol a, saphuna in siem hnungin nangni let hnia hremhmun nauin in siem hlak si.
16. "Nangni thuoitu mitdelhai, 'Tu khom tempul sala a'n kham chun ieng khom a ni naw a, tu khomin tempula rangkachak sala a'n kham chun a hlen ngei ding a nih' tituhai, in chung a rik ie!
17. Nangni mitdel invethai, a ieng am a ropui lem, rangkachak am, annawleh rangkachak chu rangkachak thienghlima siemtu tempul chu?
18. Chun, 'Miin maicham salin inkham sien ieng khom a ni nawh; maicham chunga thilpek sala a'n kham ruok chun a hlen ngei ding a nih' in ti bok a.
19. Nangni mitdel intlawhai, thilpek am, an naw leh thilpek sukthienghlimtu maicham chu a ropui lem?
20. Chuleiin, maicham sala inkhamtu chun maicham le a chunga um po po salin a'n kham a nih.
21. Tempul sala inkhamtu chun tempul le a hluotu salin a'n kham a nih.
22. Van sala inkhamtu chun Pathien thungpha le a chunga inthung salin a'n kham a nih.
23. "Nangni Dan zirtirtuhai le Farisai lemderhai, in chung a pik ie! Pudina dam, lengmaser dam le pardi dam chenin sawma pakhat in pek hlak a; Dan thu poimaw lem indikna dam, zangaina dam le ringumna dam hi in ngaitha bok si a; nisienlakhom a nuhnung lem hi annawm in thaw tak lem ding chu, a danghai khom ngaitha chuong loin.
24. Thuoitu mitdelhai, thohmite dawn sa inlauin in thlit fai a, sanghawngsei in dol lem si hlak!
25. Nangni Dan zirtirtuhai le Farisai lemderhai, in chung a rik ie! No le thleng puo tieng in sawp fai hlak a, a sung tieng ruok chu duamna le insumnawnain a sip si a.
26. Nang Farisai mitdel, no le thleng sung tieng chu sawp fai hmasa rawh, a puo tieng khom hung fai el a tih.
27. Nangni Dan zirtirtuhai le Farisai lemderhai, in chung a rik ie! Thlan nal var, a puo tienga mawi taka inlang, a sung ruok chu mithi ru le porche tinrenga sip ang chu in nih.
28. Nangni khom chuong ang char chun a puo tieng chu mi hmuah mi indik angin in inlang a, in sung tieng ruok chu vervekna le ritlonaa sip a ni si.
29. "Dan zirtirtuhai le Farisai lemderhai, in chung a pik ie! Zawlnei thlan inhai in bawl a, mi felhai thlan in cheimawi a.
30. 'Ei pi le puhai huna khan lo um ve ni inla khom, zawlnei thisen insuonaa chu thang ve nawng ei tih' in ti hlak.
31. Chu chun zawlnei thattuhai thla in ni ngeizie in suklang hlak.
32. In pi le puhaiin suol an lo thaw ang chu hlen ve law law ro.
33. Rulhai! Rulngan thlahai! Thiemnaw changa hremhmuna in fe ding hi ieng tin am pumpel thei in ta?
34. Hi lei hin a nih in kuomah zawlnei hai, mi var hai le dan zirtirtuhai ka hung tir ding chu. A then thatin hemdeng in ta; a then sunagogah vuong in ta, khaw tinah hnot zui in tih.
35. Chuongchun, Abel, mi fel tak thisen insuo a nia inthoka hmun thienghlim le maicham inkara Baraki naupa Zakari thisen in insuo ni chen khan, hnuoi chunga mi fel thisen suok po po maw chu nangni chungah tlang a tih.
36. Thu dik ka hril cheu hi, chuong po po chu tuta ruoltharhai chunga hin tlung a tih.
37. "Aw Jerusalem, Jerusalem, zawlneihai thattu le i kuoma tirhai lo deng hlumtu! Arpuiin a tehai a thla hnuoia a op khawm angin i nauhai voi ieng zat am op khawm ka tum ta a? Sienkhom i nuom si naw kha.
38. En ta, i in chu ram dera maksan a ni ta hi.
39. Ka hril cheu hi, 'Lalpa hminga hung chu a hamtha' in ti hma khat chu mi hmu nawk ta ngai naw ti niu" a ta.
←  Matthew (23/28)  →