←  Matthew (21/28)  →

---

1.

Jerusalem an hnai tah a, Oliv tlanga Bethfage khuo an tlung chun Isun a zirtirhai laia mi pahnih a tir a, an kuomah,

2.

"In hma zawn khuoa son va fe unla, sabengtung le a bula a te tuoi inthlung chu hmung in ta; sut unla, ka kuomah hung kei ro.

3.

Tu khomin ieng khom an hril chun, 'Lalpan a mamaw a nih' ti unla, inhungtir nghal el a ti cheu" a ta.

4.

Zawlnei hmanga hrila lo um tah chu a hung tlung kimna dingin chuong chu a hung um a nih:

5.

"Zaiawn naunu chu hril rawh,'En ta, inngaitlawm takin,I lal i kuom tieng a hung,Sabengtung chungah chuongin,Sabengtung tuoi chunga ngei chun".h

6.

Chuongchun, zirtirhai chu an va fe a, Isun thu a pek angin an thaw a.

7.

Sabengtung le a te chu an hung kei a, an chungah an puonhai an pha a, Isu chu a chuong a.

8.

Mi tam takin lampuiah an puonhai an pha a, a thenin sawlhna an thliek a, lampuia chun an pha bok a.

9.

A hmaa fe le a hnunga zuitu mipui chun, "Davida Naupa kuomah Hosanna!Lalpa hminga hung chu a hamtha,Chunghnung taka khin Hosannai"tiin an khek a.

10.

Jerusalem a hung lut chun a khawnawtin, "Hi mi hi tu am a na?" tiin an inphu mur mur a.

11.

Mipuihai chun, "Ama hi zawlnei Isu, Galili ram Nazaret khuoa mi a nih" tiin an don a.

12.

Isu chu tempul huong sungah a lut a, chu taka thil zortuhai le inchawtuhai chu a hnot suok vong a; tangka thlengtuhai dawkan le parva zortuhai thungna chu a namthlukpek a;

13.

an kuomah, "'Ka in chu tongtaina in ti'ng an tih' ti ziek a na, nangni ruok chun suomhmanghai pukah in siem lem hi" a ta.

14.

Tempula chun mitdel le kebaihai a kuomah an hung a, a lo sukdam tawl a.

15.

Nisienlakhom, thiempu lalhai le Dan zirtirtuhaiin thilmak a thawhai le naupang ruolin tempul sunga, "Davida Naupa kuomah Hosanna" tia an khek an hmu chun an lung a sen em em a.

16.

"Naupang ruol hril chu i hriet?" tiin Isu an indon a. Ama chun, "Hre e. Hi thu ziek'Naupangte le nene ne laihai bauah,Inpakna kim chu i'n sam suoktir a' ti hi in tiem ngai naw a ni?" a ta.

17.

Anni chu a maksan a, khawpuia inthokin a suok a, Bethaniah a fe a, chu taka chun a riek a.

18.

Zingkar khawpui pana a fe lai chun a phing a hung tam tah a.

19.

Lam sirah theichang kung a hei hmu a, a va pan a, a hna chauh naw chu ieng khom a hmu naw a, " Ra ta naw kumkhuo rawh" a ta, theichang chu a them ta nghal a.

20.

Zirtirhaiin chu chu an hmuin mak an ti hle a, "Ieng tin am theichang hi a zuk them nghal el chu!" an ta.

21.

Isun a don a, "Thu dik ka hril cheu hi, ringna neia in ringhlel naw phot chun, theichang chunga thaw ang chauh hi ni loin, hi tlang kuoma khom hin, 'Inson la, tuifinrietah inpei hmang dai rawh' in ti chun in ti angin tlung el a tih.

22.

In ring phot chun, tongtaia in hni taphot chu hmung in tih" a ta.

23.

Isu chu tempulah a lut a, a'n chuktir lai chun thiempu lalhai le vantlang upahai chu a kuomah an hung a. "Ieng thuneinain am hieng thil hi i thaw a, tuin am thuneina a pek che a?" tiin an indon a.

24.

Isun, "Kei khomin thu indon veng ka ti cheu, chu chu in mi hril thei chun tu thuin am hieng thil hi ka thaw ti hril veng ka ti cheu.

25.

Johan baptisma kha vana mi thu am mihriem thu?"a ta. An inrawn khawm a, "Vana mi thu ei ti chun 'Ieng dinga a thu inawi naw?' mi ti ding a na,

26.

mihriem thu ei ti hlak chun ei ta dingin mipui an ti-um si a, mi po poin Johan chu zawlneiah an ngai si a" an ta.

27.

Chuongchun, "Kan hriet nawh" an ta. Isu khomin an kuomah, "Kei khomin tu thuin am hieng thil hi ka thaw hril bik naw ning cheu" a ta.

28.

"Hi thu hi ieng tin am in ngai? Mi tuin amani nau pasal pahni a nei a. Pakhat kuoma chun, "Ka naupa, voisun chu grep huonah sin va thaw rawh" a ti a.

29.

Ama chun, "Ka nuom nawh" tiin a lo don a. Sienkhom, a hnungah a lungril a thlak a, a fe tah a.

30.

Pakhat kuoma khom chun a va fe a, chuong ang bok chun a va ti a. Ama chun, "Aw leh pa" a ta, sienkhom a fe naw a.j

31.

Chu mi pahnihai lai chun a tu lemin am a pa ditzawng a thaw a?" a ta. Anni chun, "A hmasa lem chun" an ta. Isun an kuomah, "Thu dik ka hril cheu hi, siekhontu le nawchizorhaiin Pathien ram an lut khal ta cheu a ni hi.

32.

Johan chu felna lampui kawkhmu ding cheuin a hung a, ama chu in ring si naw a; siekhontu le nawchizorhai ruok chun ama chu an ring si a. Ama chu in hmu hnung khomin ring dingin in inlamlet nuom si nawh.

33.

"Tekhinthu dang ngaithla ro. Huon neitu pakhatin grep huon a siem a, daiin an huon a, grep sawrna ding khur a cho a, vengbuk insang tak a bawl bok a, grep huon chu loneitu thenkhat a'n santir a, ram hla takah a'n zin ta dai a.

34.

A ra lo huna chun a chanpuol la dingin a siehlawhai chu huon santuhai kawla chun a tir a.

35.

Huon enkoltuhai chun a siehlawhai chu an lo man a, pakhat an vuok hrep a, pakhat an that a, pakhat lungin an deng a.

36.

Siehlaw dang, a hmasa neka tam a tir nawk a, anni khom chu a hmaa ang bokin an lo soisak a.

37.

Chu hnung chun, 'Ka naupa em hi chu lo inzang an tih" tiin a tawp takah a tir a.

38.

Nisienlakhom, huon enkoltuhaiin a naupa an lo hmu chun, "Hi pa hi ro hluotu ding a na, thaw ro that ei ta, a ro hluo ding hi neipek ei tih' an ti tawl a.

39.

Chuongchun, ama chu an man a, grep huona inthok chun an the suok a, an sukhlum tah a.

40.

Grep huon neitu a hung pha chun, chuong huon enkoltuhai chu iem hung law tang a ta?" a ta.

41.

Anni chun, "Chuong mi suolhai chu sukboral a ta, grep huon chu enkoltu dang, a lo hun taphota a rahai chu ama pe pei dinghai kuomah insantir a tih" an ta.

42.

Isun an kuomah, " Pathien Lekha thua,'In bawltuhai lung hnawl ngei kha, A kil thut dotu tak a hung ni ta si; Chu chu Lalpa thilthaw a na, Ei hmuin ropui ei ti hle'ti dam hi in tiem ngai naw a ni?

43.

Chu lei chun ka hril cheu hi, Pathien ram chu lakpek ning in ta, ra insuotu dinghai kuomah pek lem ning a tih.

44.

Ka hril cheu hi, tu khom chu lung chunga tlu chu koi dar a ta, a del lem chu rawt nawi a tih" a ta.

45.

Thiempu lalhai le Farisaihaiin Isu tekhinthu hril an hriet chun anni chungthu a hrilna a nih ti an hriet a.

46.

Chuongchun, a man dan lampui an zong a, sienkhom mipui an ti a, ama chu zawlneia an ngai tlat si leiin.

---

←  Matthew (21/28)  →