Matthew (20/28)

← Matthew (20/28) →

"Van ram chu huon neitu, a grep huona ruoi ding inhlawfa zonga zing inhma taka suok dok ang chu a nih.

Ni khatah denari khat mi pakhat hlaw dinga a'n rempui hnungin a grep huonah sinthawtuhai chu a tir a.

Zing dar kuo velah a'n vak suok nawk a, bazara ieng khom thaw loa ngir mei mei mi dang a hmu a;

"Nangni khom ka grep huonah sin va thaw ve unla, hlaw a awm tawk peng ka ti cheu" a ta..

Sun chang lai le chawhnung dar thum vela khom chun a suok a, chuong ang bok chun a ti nawk a.

Zan tieng dar nga velah a va suok nawk a, mi dang ngirhai kuoma chun, "Ieng dinga hi taka sunnithlaka ieng thaw loa in ngir mei mei am a na?" a ta.

Anni chun, "Tu khomin an mi ruoi ve lem" an ta. Ama chun, "Nangni khom ka grep huonah va thok ve ro" a ta.

"Zan tieng a hung ni chun grep huon neitu chun a huon enkoltu kuomah, 'Sinthawtuhai kha ko la, a nuhnung taka inthoka tanin a hmasa tak chenin hlaw pe rawh' a ta.

Zan tieng dar nga vela a ruoihai chu an hung a, denari khat an dong seng a.

10.

A hmasa takhai chu an hung a, hlaw tam lem hmu an inbeisei a, nisienlakhom denari khat bok an dong a.

11.

Hlaw an hang lak chun huon neitupa chungah an chier ta a.

12.

Hieng a hung nuhnung takhai hin darkar khat chauh an thok hman a, keini nisa tuora sunnithlaka thawhai leh intlukin i siem a' an ta.

13.

"Ama ruok chun anni laia pakhat kuoma chun, 'Ruolpa, i chungah ieng khom thaw indik naw ka nei nawh. Denari khat hlaw dingin ei inrem an naw maw?

14.

I hlaw kha la la, fe el rawh; nang ka pek che ang bok kha hieng a thok nuhnung takhai khom hi ka pek nuom a nih.

15.

Keima sum a na, keiin ka nuom ang anga ka thaw a thieng naw am a ni? An naw leh, ka that leiin i lo thik am a ni?" a ta.

16.

Chuong ang bokin a nuhnung takhai chu a hmasa tak la ning an ta, a hmasa tak khom a nuhnung tak la ning an tih" a ta.

17.

Isun Jerusalem a pan tung mek lai chun a zirtir sawm le pahnihai chu a thuoi bing a, an kuomah,

18.

"Ngai ta u, Jerusalemah ei hang fe ding a na, Mihriem Naupa hi thiempu lalhai le Dan zirtirtuhai kutah an inmantir ding a nih.

19.

Anni chun thi dingin a chungthu rel an ta, nuizat siemnaa hmangin vuong an ta, hemde dingin Jentelhai kutah pe suok an ta, ni thum niah keitho ning a tih" a ta.

20.

Chuong lai chun Zebedai nuhmei chun a nauhai thuoiin Isu kuomah a hung a, dingthathuonin chibai a buk a, ditsakna a hni a.

21.

Isu chun, "Iem an leh i dit chu?" a ta. Ama chun, "Ka nau pasal pahnihai hi i ramah, i chang tieng pakhat, i voi tieng pakhat, an inthung theina dingin thu pe ta la" a ta.

22.

Isun a don a, "In thil hni hi in hriet naw a nih. Ka no dawn ding chu in dawn thei ding am a ni?" a ta. Anni chun, "Thei e" an ta.

23.

Isu chun, "Ka no chu dawn ngei in tih; nisienlakhom, ka chang tieng amani ka voi tieng amania inthungtir chu ka thu a ni naw a, ka Pa buotsaipekhai ta ding a ni lem" a ta.

24.

Zirtir sawmpahnihaiin chu thu an hriet chun unau pahnihai chunga chun an lung a sen hle a.

25.

Isun an rengin a ko a, "Jentelhai chunga roreltuhai chu an insuklal em em hlak a, an mi lienhai khomin an chungah lal an hrawt a.

26.

Nangni lai ruok chu chuong ang chu a ni ding a ni nawh. Tu khom nangni laia mi lien ni nuom chu in rongbawltuah a um lem ding a nih.

27.

Nangni laia ropui tak ni nuom chu in siehlawah a um ding a nih.

28.

Mihriem Naupa khom hi rong bawlpeka um dingin a hung naw a, rong bawl ding le mi tam tak intlanna dinga a hringna pe dingin a hung lem a nih" a ta.

29.

Jeriko khuoa inthoka Isu le a zirtirhai an suok laiin mipui tam takin an zui a.

30.

Lam sira inthung mitdel pahni chun Isu a hung ti an hriet charin, "Lalpa, Davida Naupa, mi lunginsiet rawh" tiin an khek a.

31.

Mipui chun to dingin an hal a, sienkhom anni chun, "Lalpa, Davida Naupa, mi lunginsiet rawh" tiin an khek zuol sau a.

32.

Isu chu a ngir a, anni chu a ko a, "Ieng am thawpek lang cheu in nuom a?" a ta.

33.

Anni chun, "Lalpa, mit varna kan dit" an ta.

34.

Isun a lunginsiet tawl em em a, an mit a them a, an hmu.thei ta nghal a, ama chu an zui ve tah a.

← Matthew (20/28) →