←  Matthew (2/28)  →
1. Lal Heroda inlal laia Judai ram Bethlehema Isu a hung pieng chun, khawsak tienga inthokin Jerusalemah mivarhai an hung a.
2. "Judahai lal hung pieng chu khaw lai am a um a? Khawsak tieng a arasi kan hmu a, ama chawibiek dingin kan hung a nih" an ta.
3. Lal Herodan chu thu a hriet chun a lungzing hle a, Jerusalem mi po po khomin an lungkham a.
4. Chuongchun, thiempu lalhai le Dan hretuhai chu a ko khawm a, Krista piengna hmun ding chu a'n don a.
5. Anni chun, "Judai ram Bethlehem khuoa pieng ding a ni thu hieng ang hin zawlneiin a ziek:
6. Nang Bethlehem, Judai rama mi,Judai rama roreltuhai lai hin,I chin tak naw top,I sunga inthokin roreltu, A hung suok ding a ni si a,Ka mi Israelhai optu ding chu"an ta.
7. Chuongchun Herod chun mivarhai chu a rukin a ko a, arasi hung inlang hun chu ngun takin a'n don a.
8. Bethlehem tieng chun a'n fetir a, "Fe unla, naute thu chu ngun takin hung indon suok ro. In hmu charin mi hung hril unla, keikhoma ka chawibiek ve theina dingin" a ta.
9. Lal thu an hriet hnung chun an fe pei a, khawsak tienga arasi an hmu khan naute umna chung zawn a tlung chenin an hma a thuoi a.
10. Arasi chu an hmuin an hlim em em a.
11. In sung an va lut chun Mari le a naute chu an hmu a, hnuoi sikin an chawibiek a; an robawmhai hongin, thilpek rangkachak dam, beraw dam le mura dam an pek a.
12. Heroda kuomah kir nawk ta lo dinga manga hrilh an ni leiin an ram tieng lampui dangah an kir nawk ta a.
13. Mi varhai an kir hnung chun Josefa mangah Lalpa vantirko a hung inlar a, " Naute hi Herodan that tuma a zong leiin, tho la, naute le a nu thuoi la, Aigupta ram tieng tlan rawh; ka hril nawk hma che chu, chu taka chun um zing rawh," a ta.
14. Chuongchun, a tho a, a zan a zanin Aigupta ram an pan a,
15. Heroda thi hma po chu taka chun an um a, zawlnei hmanga, "Ka naupa chu Aigupta rama inthokin ka ko suok a" tia a lo hril kha a hung tlung tah a nih.
16. Mivarhaiin an dawha ti Herodan a hriet chun a lung a sen em em a, mivarhaiin naute pieng hun awma an hril ang khan Bethlehem le a se vela pasal naupang kum hnia inthoka a hnuoi tieng po chu that vong dingin thu a pek a.
17. Zawlnei Jeremia-in hieng thu a lo hril kha a hung tlung kim tah a nih:
18. "Rama khuoa ri an hriet chu,Lusun tap khek rong rong a nih;Rakilin a nauhai a ta a,An um ta si naw leiin,Thlem tlai ruol a ni nawh".Aiguptaa inthoka an kir thu
19. Heroda thi hnungin Aigupta rama um Josefa mangah Lalpa vantirko a hung inlar a,
20. "Tho la, naute le a nu thuoi la, Israel ramah kir nawk ta rawh; naute that tumtuhai kha an thi tah" tiin a hril a.
21. Chuongchun a tho a, naute le a nu chu a thuoi a, Israel ram tieng a kir nawk ta a.
22. Nisienlakhom, Arkelausa chu a pa Heroda aiawin Judai ramah a'n lal ti a hrietin chu taka chun fe ngam loin, manga inhriettir a ni angin Galili ram tieng a pan a,
23. Nazaret khuo an tia chun a um ta a. Zawlnei hmanga a lo hril, "Ama chu Nazaret mi ting an tih" ti chu a hung tlung kim tah a nih.
←  Matthew (2/28)  →