←  Matthew (19/28)  →
1. Chuong thu chu Isun a hril zoin Galili ram maksanin Jordan rala Judai rama chun a fe a.
2. Mipui tam takin an zui a, chu taka chun a lo sukdam tawl a.
3. Farisai thenkhat a kuomah an hung a, ama fiena dingin, "Ieng lei khomin miin a nuhmei a mak a thieng am?" tiin an indon a.
4. Ama chun, "A tira inthokin Siemtu chun 'pasal le nuhmeiin a siem a,
5. chuleiin pasalin a nu le pa maksan a ta, a nuhmei leh inkop an ta, pum khat hung ni tang an tih' ti kha in tiem ngai naw maw?
6. Chuongchun pahni ni ta loin taksa pum khat an hung ni ta lem a nih. Chuleiin, Pathienin a zom tah chu mihriemine the naw raw se" a ta.
7. Anni chun a kuomah, "An leh, ieng dinga inmakna lekha peka mak theina thu Mosien a pek am a na?" an ta.
8. Isun, "In lungril ngar lei chauin nuhmei mak Mosien a phalpek cheu a ni kha; nisienlakhom a tira inthokin chuong ang chu a ni nawh.
9. Kei chun ka hril cheu hi, tu khom uire lei ni loa nuhmei maa mi dang nei taphot chu a uire a nih" tiin a don a.
10. Zirtirhai chun, "Chuong chu nuhmei pasal inkar thu a ni si chun, innei hi a tha naw ie" an ta.
11. Ama ruok chun, "Chu thu chu mi po poin an pom thei nawh, a pekhai chauh naw chun.
12. Mi tilre hrima pieng an um a; a then ruok chu mihriemin tilrea an siem an um a; thenkhat ruok chu van ram leia tilrea insiem an um bok. Tu khom a zawm thei chun zawm raw se" a ta.
13. Chuong lai chun a kut innghata tongtaipek dingin naupangtehai chu Isu kuomah an hung thuoi a. Zirtirhai chun a hung thuoituhai chu an lo hal a.
14. Isu ruok chun, "Naupangtehai kha ka kuomah inhungtir unla, khap naw ro; van ram chu hieng ang mihai ta hi a ni si a" a ta.
15. An chunga kut an nghat hnungin chu hmuna inthok chun a fe ta pei a.
16. Mi pakhat hi Isu kuomah a hung a, "Zirtirtu, chatuon hringna ka nei theina dingin ieng thil tha am thawng ka ta?" tiin an don a.
17. Isu chun, "Ieng dinga thil tha chu i mi'n don? Tha chu pakhat chauh a um.f Hringnaah lut i nuom chun thupekhai chu zawm rawh" a ta.
18. Ama chun, "A ieng tak am?" a ta. Isun, " 'Tuol that naw; uire naw; inru naw; khelin mi hek naw;
19. i nu le pa chawimawi rawh tihai le nangma i'n hmangai angin i venghai hmangai rawh tihai hi" a ta.
20. Tlangval chun, "Chuong po chu ka zawm hlak, iem ka la bak?" a ta.
21. Isun, "That famkim i nuom chun, fe la, i nei po po zor la, pasiehai pe rawh; chuongchun vanah ro nei i tih; chun, hung la, mi zui rawh" a ta.
22. Chu thu chu a hrietin tlangval chun beidong takin a fesan a, sum a hau hle si leiin.
23. Isun a zirtirhai kuomah, "Thu dik ka hril cheu hi, mi hausa ta dingin Pathien rama lut chu harsa tak a nih.
24. Ka hril non cheu hi, Pathien rama mi hausa an lut nekin thim naa sanghawngsei lut thleng a ol lem" a ta.
25. Zirtirhaiin chu chu an hriet chun mak an ti hle a, " Chuong a ni chun tu am sandam ni thei tang an ta?" an ta.
26. Isun anni chu en zingin, "Chu chu mihriem ta dingin thaw thei ruol a ni naw a, Pathien ta ding ruok chun iengkim thaw thei a nih" a ta.
27. Peter chun, "Ngai ta, keini hlakin iengkim maksanin kan zui ta si che a, kan dong ve ding chu iem ning a ta?" tiin a'n don a.
28. Isun a kuomah, "Thu dik ka hril cheu hi, iengkim siem tharna hunah, Mihriem Naupa hi a ropuina lalthungphaa a'n thung pha leh, nangni mi zuituhai khom hi Israel hnam sawm le pahni chungah rorelin lalthungpha sawm le pahniah la thung veng in tih.
29. Tu khom ka hming leia in le lo dam, unau hai, farnu hai, nu le pa hai,g le nau hai dam maksantu chun a let tam tak hmung an ta; chatuon hringna chang bok an tih.
30. Nisienlakhom, mi tam tak a hmasa taka umhai chu a nuhnung tak la ning an ta, a nuhnung takhai khom a hmasa tak la ning an tih" a ta.
←  Matthew (19/28)  →