←  Matthew (18/28)  →
1. Chuong lai chun zirtirhai chu Isu kuomah an hung a, "Van ramah tu am ropui tak a ta?" tiin an indon a.
2. Ama chun naupang te hi a ko a, an hmaah a'n ngirtir a.
3. "Thu dik ka hril cheu hi, in inlamlet a, naupang te ang hi in ni naw chun Pathien ramah lut naw ti niu.
4. Chuleiin, tu khom hi naupang te anga inngaitlawm chu van rama a ropui tak ning a tih.
5. Tu khom ka hming leia hieng naupang te pakhat khom lawmtu chun keima a mi lawm a nih.
6. "Amiruokchu, hieng ringtuhai laia chin tak khom hi suol dinga zawr thlutu chu a ringah bu rawtna lung lien tak inhlitirin tuifinriet li mongah thlak ni sien, a ta dingin tha lem a tih.
7. Tluknahai leiin khawvel chung hi a va rik de aw! Tluk chang um ding hrim chu a nih, sienkhom tlukna inumtirtu chung chu a rik.
8. I kutin amanih, i kein amanih a sukthluk che chun tan la, de hawn dai rawh; kut khing hni amanih ke khing hni amanih neia kumkhuo hremhmuna peia um nek chun kut le ke bula hringnaa lut chu i ta dingin a tha lem.
9. I mitin a sukthluk che chun khel dok la, de hawn dai rawh; mit khing hni neia hremhmun meia pei i ni nek chun mit khing dela hringnaa lut chu i ta dingin a tha lem.
10. "Hieng mi chinhai laia pakhat khom hi hmusit lo dingin fimkhur ro; vana an vantirkohaiin ka Pa vana mi hmel an hmu zing hlak a nih ti ka hril cheu hi.
11. Bohmanghai sandam dingin Mihriem Naupa hi a hung a ni si a.b
12. "Ieng tin am in ngai? Miin beram za nei sien, anni laia pakhat chu invak hmang ta ang sien, sawmkuo le pakuohai chu tlangah maksanin a'n hmang chu a zong naw dim a ni?
13. Thu dik ka hril cheu hi, a hmu nawk hlauh chun sawmkuo le pakuo invak hmang naw hai chunga nekin chu beram pakhat chunga chun lawm lem a tih.
14. Chuong ang bokin, hieng mi chin te tehai laia pakhat khom an bohmang chu in Pa vana mi ditzawng a ni nawh.
15. "I unauin i chungah thil suol a thaw chun, fe la, nangni pahni hrieta chauh a suolna thua chun zil rawh. A ngaithlak che chun i unaupa lungril chu i'n hmin tina a nih.
16. A ngaithlak naw che ruok chun mi dang pakhat amanih pahni amanih thuoi la, chuongchun, in thu po po chu hrepuitu pahni pathum baua inthoka suknghet ni thei a tih.
17. Chun, anni chu a ngaithlak nuom naw chun kohran kuomah intlun rawh; kohran chen khom a ngaithlak nuom naw rop chun ama chu Jentel le siekhontu hai angah sie rawh.
18. "Thu dik ka hril cheu hi, hnuoia ieng khom in phuor taphot chu vana khom phuor ning an ta, hnuoia ieng khom in sut taphot chu vana khom sut ning an tih.
19. Ka hril cheu hi, hnuoia hin nangni lai mi pahni inlungruola in hni taphot chu in Pa vana miin thawpek a ti cheu.
20. Ka hminga mi pahni amanih pathum amanih an inkhawmna taphota chun anni lai ka um hlak si a" a ta.
21. Chuong lai chun Isu kuomah Peter a hung a, "Lalpa, ka unauin ka chungah thil suol thaw sien, voi ieng zat am ka ngaidam ding? Voi sari chen am a ni ding?" a ta.
22. Isun a kuomah "Voi sari chen ka ti naw che, voi sari voi sawmsari chenin ka ti lem che a nih.
23. "Chuleiin, van ram chu laltak tu amanih, a siehlawhai sum bat ching fel tum leh chun hrilkhi a nih.
24. An thu a ngaituo tan chun mi pakhat, talen singkhatc bat chu a kuomah an hung thuoi a.
25. A rulna ding a nei naw leiin ama le a nuhmei le a nauhai le a nei po po zor fai vonga rul dingin a pu chun thu a pek a.
26. Chuongchun, siehlaw chun hnuoi sikin chibai a buk a, "Mi la ngai hram la, a rengin la rul vong ka ti che" a ta.
27. Chu siehlaw chu a pu chun a lunginsiet a, a bat chu a ngaidam a, a'n thla suok a.
28. Sienkhom chu siehlaw chu a suok a, a siehlaw chanpui laia pakhat denari zakhatd bat chu a va hmu a, a man a, a ringa a rek a, 'I bat kha mi pe rawh' a ta.
29. A siehlaw chanpui chun a hmaah dingthathuonin, 'Mi la ngai hram la, la rul vong ka ti che' tiin a ngen a.
30. A ngaidam nuom naw leiin a bat chu a tlak hma khat lung inah a khum el tah a.
31. A siehlaw chanpui danghaiin a thilthaw dan an hmu chun an lung a khei hle a, a thaw dan po po chu an pu kuomah an va hril a.
32. An pu chun siehlaw chu a ko a, "Nang siehlaw rilo, i ngen rak leiin i bat po po ka ngaidam che a.
33. Ka lunginsiet che ang khan nang khomin i siehlaw chanpuihai i lunginsiet ve ding an naw maw?" a ta.
34. A pu chu a lung a sen hle a, a bat po po a tlak zo hma khat chu hrem dingin a pek suok tah a.
35. Tu khomin lungril taka in unauhai in ngaidam naw chun ka Pa vana mi khomin chuong ang bokin in chungah thaw veng a tih" a ta.
←  Matthew (18/28)  →