←  Matthew (17/28)  →
1. Ni ruk hnungy chun Peter le Jakob le a unaupa Johan hai chu Isun a thuoi a, tlang sangah a fepui a.
2. An hmaa chun a'n lang dan chu a hung danglam a, a hmel chu nisa anga hung engin, a silfenhai chu a hung var ta phut el a.
3. Chu zo char chun an hmaah Mosie le Elija an hung inlar a, Isu leh an inbiek a.
4. Peter chun Isu kuomah, "Lalpa, hi taka ei um hi a tha. I remti chun bawkte pathum khawng ka ta, i ta ding pakhat, Mosie ta ding pakhat, Elija ta ding pakhat" a ta.
5. A hril lai chun sum varin anni chu a hung tuom a, suma inthok chun rawlin, "Hi hi ka Naupa, ka Dittak, ka lawm bek bek chu a nih; ama thu ngai ro" a hung ta.
6. Zirtirhaiin chu chu an hrietin an ti hle a, hnuoi sikin an bokkhup a.
7. Nisienlakhom Isu a hung a, anni chu a hung them a, "Tho ro, ti naw ro" a ta.
8. An hang en chun Isu chauh naw chu tu dang khom an hmu ta nawh.
9. Tlanga inthoka an hung tum lai chun Isun an kuomah, "Mihriem Naupa hi mithi laia inthoka a tho nawk hma khat chu in thil hmu kha tu khom hril naw ro" tiin thu a pek a.
10. Zirtirhai chun a kuomah, "Dan zirtirtuhaiin ieng leia 'Elija a hung hmasa zet ding a nih' an ti am ning a ta?" tiin an indon a.
11. Isun an kuomah, "Elija chu a hung ding hrim a nih, iengkim siem thang a tih.
12. Nisienlakhom, ka hril cheu hi, Elija chu a hung tah a, sienkhom ama chu an lo hriet naw a, a chungah an nuom nuomin an lo thaw kha. Chuong ang bokin Mihriem Naupa khom hin an kut a tuor ve ding a nih" a ta.
13. Chuongchun, zirtirhai chun Baptistu Johan thu an kuomah a hril a nih ti an hriet tah a.
14. Mipui an zuk paw nawk chun mi pakhat hin Isu a hung pan a, a hmaah a dingthathuon a.
15. "Lalpa, ka naupa saw lunginsiet rawh. Hringol invoi a na, a tuor nasa ta bek bek a; voi tam tak meiah a tlu tah a, voi tam tak tuiah a tla tah bok a.
16. I zirtirhai kuomah ka thuoi a, an sukdam thei si naw a" a ta.
17. Isun a don a, "Tu lai ruolthar, ringna tlasam le lungril lutinlehai, ieng chen am in kuomah um ka ta, ieng chen am ka ngai thei ding cheu a na? Naupang chu ka kuomah hung thuoi ro" a ta.
18. Isun ramhuoi chu a hal a, a sunga inthokin a hung suok a; chu darkara inthok chun naupang chu a dam tah a.
19. Zirtirhai chu Isu kuomah a falin an hung a, "Ieng leia keinin kan hnot suok ve thei naw?" tiin an indon a.
20. Isu chun, "Ringna in nei tlawm lei a nih. Thu dik ka hril cheu hi, ringna antam mu tiet in nei chun, hi tlang kuoma hin, 'Hi taka inthok hin saw takah son inson rawh' ting in ta, inson el a tih. Thaw thei naw hrim nei naw ti niu.
21. Chun, hieng ang thil hi tongtai le bu nghei chauh naw chun hnot suok thei a ni nawh"z a ta.
22. Galili ram an fang laiin Isun a zirtirhai kuomah, "Mihriem Naupa hi mihriemhai kutah inmantirin um a ta, sukhlum an ta,
23. ni thum niah keithoin a um ding a nih" a ta. Zirtirhai chu an lungngai ta em em a.
24. Isu le a zirtirhaiin Kapernaum an hung tlung chun tempul sie, mi pakhat peiah drakma hni khontuhai chu Peter kuomah an hung a, "In zirtirtu hin tempul sie a chawi ve hlak am?" an ta.
25. Ama chun, "Chawi hlak e" a ta. Inah Peter a hung inlawi chun Isun a lo biek hmasa a, "Simon, ieng tin am i ngai? Hnuoia lalhai hin sie chi hrang hranghai hi an nauhaia inthokin am, an naw leh mi dang laka inthok lemin an khon hlak?" tiin a'n don a.
26. Peter chun, "Mi dang lakah" a ti phing leh Isun, "Chuong an leh, nauhai chun sie an awl a ni chu tie.
27. Nisienlakhom, nang chu dilah va fe la, ngakuoi inchie la, nga i man hmasa tak bau chu kei ka la, drakma li hu tangkaa hmung i ta, chu chu hung la la, kei le nanga sie tlakna dingin anni chu pe rawh, chuong naw chun suklungawi naw hlauh rawi ei tih" a ta.
←  Matthew (17/28)  →