←  Matthew (16/28)  →

---

1.

Farisaihai le Sadukaihai chu Isu kuomah an hung a, ama fiena dingin vana inthoka inchikna inentir dingin an phut a.

2.

Ama ruok chun, "Zan tieng a hung niin, 'Khuo a tha ding ning a tih, kawl a sen em el' in ti hlak a.

3.

Chun, zing tieng leh 'Kawl a sena chu van a'n tur leiin voisun chu khuo a se ding ning a tih' in ti bok hlak. Khuo umzie in hriet thiema chu hun inchiknahai in hriet der si nawh.v

4.

Tu lai ruolthar, mi suol tak le uire hmang takhai hin inchikna thilmak an zong hlak a, sienkhom Jona inchikna chauh naw chu inchikna thilmak hrim inentir ni naw ni hai" a ta. Isun anni chu a fesan ta dai a.

5.

Dil ral khing tieng an kai chun zirtirhaiin bei an lo chawi theinghil a.

6.

Isun an kuomah, "Farisaihai le Sadukaihai chol laka chun inveng fimkhur ro" a ta.

7.

Anni rawi chun, "Bei ei chawi theinghil leia a mi ti ning a tih" an ta.

8.

Isun chu chu a hrietin, "Ringna tlawmhai, ieng dinga bei in nei naw thu ringot in buoipui am a na?

9.

Tu chen khom hin in la hriet thiem naw rop a ni maw? Mi sangnga ta dinga bei phek nga le an fak mahla in rut khawm zat kha in la hriet zing naw maw?

10.

Mi sangli ta dinga bei phek sari le fak mahla in rut khawm zat khom kha teh?

11.

In kuomah bei thu ka hril nawh ti ieng dinga in hriet thei naw am a na? Farisaihai le Sadukaihai chol laka chun fimkhur ro" a ta.

12.

Chu phing leh chola siem bei lakah ni loin Farisaihai le Sadukaihai zirtirna laka fimkhur dinga a hrilna lem a nih ti an hung hriet tah a.

13.

Isun Filip Kaisari biel a hung tlung chun a zirtirhai kuomah, "Mihaiin Mihriem Naupa hi tu am a nih an ti a?" tiin a'n don tawl a.

14.

Anni chun, "Baptistu Johan ti che dam, Elija ti che dam, Jeremi an naw leh zawlnei tu amanih ti che dam an um" an ta.

15.

Ama chun an kuomah, "An leh nangnin tu am ka nih in mi ti a? a ta.

16.

Simon Peter chun, "Pathien hring Naupa Krista chu i nih" a ta.

17.

Isun a kuomah, "Peter, Jona naupa, i ham a tha, mihriem hril che a ni naw a, ka Pa vana mi inhriettir che a ni lem.

18.

Chun, nang hi Peterw i nih ti ka hril bok che; hi lungpui chunga hin ka kohran rem ka ta, thina thilthawtheina khomin ngam naw nih.

19.

Van ram chabihai peng ka ti che a, hnuoia i phuor taphot chu vana khom phuor ning a ta, hnuoia i sut taphot chu vana khom sut ning a tih" a ta.

20.

Chu zoa chun ama chu Krista chu a nih ti tu khom hril lo dingin a zirtirhai chu a ti tlat a.

21.

Chu chena inthok chun Isun Jerusalema a fe ding thu dam, upahai, thiempu lalhai le Dan zirtirtuhai laka thil tam tak a tuor ding thu dam, sukhluma a um ding thu le a ni thum nia kei thoa a um ding thu dam chu a zirtirhai a hril tan tah a.

22.

Peterin ama chu a thuoi hrang a, "Lalpa, chuong dam chu Pathienin remti naw nih. Chuong thil chu i chungah hung tlung ngai naw top a tih" tiin a kawk a.

23.

Isu chu a ngha kir a, Peter kuomah, "Setan, ka hnungah fe rawh! Ka ta dingin dalkham i nih. Pathien tieng ngaituo loin mihriem thilah i lak a ni hih" a ta.

24.

Isun a zirtirhai kuomah, "Tu khomin mi zui a nuom chun mani insie hmangin,x mani kraws putin mi zui raw se.

25.

Tu khom mani hringna hum tum chun chan a ta, tu khom keima leia hringna chan ruok chun hum a tih.

26.

Miin khawvel hi nei vong sien, a thlarau inhmang si sien, a ta dingin ieng am a sawt a? An naw leh, miin a hringna le inthleng dingin iem a pek thei a?

27.

Mihriem Naupa hi a Pa ropuina le a vantirkohai leh a hung pha chun, mi tin an thilthaw ang peiin lawmman peng a tih.

28.

Thu dik ka hril cheu hi, hi taka ngir thenkhat lai hin Mihriem Naupa hi ama rama a hung an hmu hma chu thina intem lo ding an um" a ta.

---

←  Matthew (16/28)  →