←  Matthew (15/28)  →
1. Chuong lai chun Jerusalema inthokin Farisaihai le Dan hretuhai chu Isu kuomah an hung a,
2. "Ieng leia i zirtirhaiin upahai thurosie an bawsiet hlak am a na? Bu an fak hmain kut an sawp ngai nawh" an ta.
3. Isun a don a, "Nangni khomin in pipu thurosie leiin ieng dinga Pathien thupek in bawsiet?
4. Pathien thupek chun, 'I nu le pa chawimawi rawh; mani nu le pa tong sie inphurtu chu sukhlum ngei ding a nih' a ta
5. Nangni ruok chun, 'Tu khom a nu amanih a pa amanih kuomah, ka tha i sor ding po po chu Pathien ta dinga pek a ni tah titu chun a nu le pa a chawimawi a ngai ta nawh' in ti hlak.
6. Chuongchun, in thurosie lei hin Pathien thu chu iengma loah in inchangtir a ni hi.
7. Lemderhai, Isaiin in chungthu a lo hril indik ngot el:
8. Hienghai rawi hin bauin an mi'n pak a,An lungril ruok chun an mi hlat hle si;
9. Thuring dingin mihriem thu an inchuktir a,An mi chawibiek khom hi a thlawn el a nih'ti hi" a ta.
10. Isun mipuihai chu a ko a, an kuomah, "Ngaithla unla, hre fie ro.
11. Baua lutin mihriem a sukporche naw a, baua inthoka suokin, chu ngei chun a nih mihriem a sukporche lem hlak" a ta.
12. Chuong lai chun a zirtirhai chu a kuomah an hung a, "I thu hril khan Farisaihai nak a kal hle ti i hriet am?" an ta.
13. Isu ruok chun, "Ka Pa vana miin a phun naw chu ieng kung khom a zung puma phawi vong ning a tih.
14. Anni rawi hi uksak naw ro, thuoitu mitdel an nih. Mitdelin mitdel bok a thuoi chun khurah tla rel an tih" a ta.
15. Peterin a kuomah, "Tekhinthu kha mi hrilfie tawl ta la" a ta.
16. Ama chun, "Nangni khom chuong khop chun in lo chawlol ve a ni maw?
17. Baua lut taphot chu phingah a lut thla a, inhnawm pha a suok nawk vong hlak an naw maw?
18. Baua inthoka suok ruok chu lungrila inthoka hung suok a na, chu ngei chun mihriem a sukporche a nih.
19. Lungrila inthoka suok chu ngaituona suol dam, tuolthatna dam, uiretna dam, inngaina suol dam, rukrukna dam, khela inhekna dam le Pathien hrilsietna dam hi a nih.
20. Chuonghai chu mihriem sukporchetu an na, kut sawp loa bu fak ruok hin chu mi a sukporche nawh" a ta.
21. Chu hmun chu maksanin Isu chu Tura le Sidon bielah a fe a.
22. Chu lai ma chun a ram mi Kanan nuhmei pakhat hi a kuomah a hung a, "Lalpa, Davida Naupa, ramhuoiin ka naunu inrim takin a soisak a, mi lunginsiet hram rawh" tiin a khek a.
23. Isu ruok chun bau khat khomin a don nawh. A zirtirhai chun, "Ei hnungah a khek a khek el si a, tir hmang el rawh" tiin an ngen a.
24. Ama chun, "Israel hnam, beram inhmanghai laia chauh tir ka nih" a ta.
25. Sienkhom nuhmei chun a hung hnai a, a hmaah dingthathuonin, "Lalpa, mi thangpui rawh" tiin a ngen a.
26. Isu chun, "Nauhai bei lakpek a, uihai kuoma pek chu thil awm a ni nawh" a ta.
27. Nuhmei chun, "Ni e, Lalpa, sienkhom uihai khomin an puhai dawkana bei nawi tla chu an fak hlak tho annawm" a ta.
28. Chu phing leh Isun, " Nuhmei, i ringna hi a nasa em a, i dit ang takin i chungah tlung raw se" a ta. Chuongchun, a naunu chu, chu darkar la la chun a hung dam ta a.
29. Chu taka inthoka Isu a suok chun Galili dil kam hrutin a fe a; chun, tlangah a kai a, a'n thung a.
30. Mipui tam tak a kuomah an hung a, kebai hai, mitdel hai, piengsuol hai, tong thei naw hai le mi dang tam tak an hung thuoihai chu a ke bulah an sie a, ama chun a lo sukdam tawl a.
31. Tong thei nawhai tong thei a, piengsuolhai hung tha a, kebaihai lawn a, mitdelhai mit a varzie hmutu mipui chun mak an ti em em a, chuongchun Israel Pathien chu an inpak a.
32. Isun a zirtirhai chu a ko a, "Mipuihai hi ka lunginsiet em em a, ka kuomah ni thum zet an um tah a, fak ding ieng khom an nei si naw a, lampuiah tamsawl el thei an ni leiin phingtama inlawitir ka nuom nawh" a ta.
33. Zirtirhai chun, "Mipui hieng zozai hraina khop hieng ang hmun thlalera hin khaw lai am bei hmu tang ei ta?" an ta.
34. Isun, "Bei phek ieng zat am in nei a?" a ta. Anni chun, "Phek sari le ngate tlawmte leh" an ta.
35. Isun mipuihai chu hnuoia inthung dingin thu a pek a,
36. bei phek sari le ngate chu a lak a, mal a sawm zoin a khoi a, zirtirhai a pek a, zirtirhai chun mipui lai an sem a.
37. An rengin tlai takin an fak a, an fak mahla zirtirhaiin an rut khawm chu bawm sari sip a nih.
38. A fatuhai chu nuhmei le naupang tiem loin patling ngot khom sangli an nih.
39. Isun mipuihai a'n tintir hnung chun longah a chuong a, Magadanu bielah a fe tah a.
←  Matthew (15/28)  →