←  Matthew (13/28)  →
1. Chu ni chun Isu chu ina inthokin a suok a, dil kamah a thung a.
2. Mipui tam tak a kuomah an hung a; chuongchun longah a chuong a, a thung a, mipui chu tieuphoah an ngir a.
3. Tekhinthu hmangin an kuomah thu tam tak a hril a: "Ngai ta u, bu chi thetu chu bu chi the dingin a fe a.
4. A hang the chun a then lampuiah a tla a, vatein an tlan zo a.
5. A then pielthleng chung, hnuoi inphanah a tla a, pil a sa naw leiin a hung to nghal a.
6. Sienkhom nisa a hung insang a, a em vuoi a, zung a thlak naw leiin a hung rop a.
7. A then chu hling buk lai a tla a, hling an hung inthang a, an dip hmang a.
8. A then ruok chu hnuoi thaah a tla a, a let za dam, a let sawmruk dam, a let sawmthum damin a hung ra a.
9. Ngaithlakna dinga na nei chun ngaithla ngun raw se" a ta.
10. Zirtirhai chu a kuomah an hung a, "Ieng dinga mipuihai kuomah tekhinthu hmangin i hril hlak am a na?" an ta.
11. Ama chun, "Van ram thu ril chu nangni hriet dinga ti a na, anni hriet dinga ti a ni ve nawh.
12. Tu khom a nei chu pe belsang an ta, hung hau nawk zuol a ta; a nei naw chu a nei sun khom lakpek an tih.
13. Chuong lei chun an kuomah tekhinthuin ka hril a nih, hmu zing sia hmu ngai loa, ngaithla zing sia hre ngai loa an umna ding le an hriet thiem bok nawna dingin.
14. Isai hrillawkna kha anni chungah a hung tlung tah a ni hi:
15. Hi mihai lungril hi a chawlol zo tah a,An na an sukset zo a,An mit an insim bok a.Chuong ni naw sien chu,An mitin hmung an ta,An nain hrieng an ta,An lungrila man fuin kir an ta,Anni ka lo sukdam ding a ni si a'a lo ti ang khan.
16. "Nangni mit ruok chu a vangnei ie, in hmu hlak leiin; in na khom a vangnei ie, in ngaithlak leiin.
17. Thu dik ka hril cheu hi, zawlneihai le mi fel tam tak khomin in thil hmuhai hi hmu ve an chak hlak a, an hmu phak si nawh; in thu hriethai khom hi hriet ve an inhawk a, an hriet phak si nawh.
18. "Bu chi thetu tekhinthu umzie chu ngaithla ro.
19. Tu khomin Pathien ram thu chu a ngaithlak a, a hriet thiem si naw chun, mi suol chu a hung a, a lungrila the sa chu a hung lak hmangpek hlak a. Chuong mihai chu lam laia tlahai ang chu an nih.
20. Chun, pielthleng hmuna tla chu, thu ngaithla a, lawm taka pom nghaltu ang hi a nih.
21. Sienkhom zung a nei naw a, sawtnawte chauh a dai a, thu leia suknomnatna amanih a hung um pha leh a tlu nawk nghal hlak.
22. Hling buk laia tla chu, thu chu ngaithla a, sienkhom a thu dong chu khawvel lungkhamna le hausakna tienga hipnain an dip ral leia ra insuo ta lo ang chu a nih.
23. Hnuoi thaa tla chu, thu chu ngaithlaa hre thiem mi chu a nih; ama chu a let za dam, a let sawmruk dam, a let sawmthum damin a ra hlak" a ta.
24. Tekhinthu dang an kuomah a hril nawk a. "Van ram chu mi, a loa chi tha thetu ang chu a nih.
25. Nisienlakhom, zanah mi an in vong laiin a hmelma a hung a, bu lai chun bu tehlem a the a, a fe hmang tah a.
26. Bu chu a hung mawng a, a hung vui chun bu tehlem chu a hung inlang ve tah a.
27. Siehlawhai chu loneitu kuoma chun an hung a, 'Pu, i loah bu chi tha ngot i the an naw maw? Bu tehlem saw khaw laia inthoka hung suok am a na?' an ta.
28. Ama chun, 'Hmelmain an lo the a ni chu" a ta. Siehlawhai chun, "Chuong an leh, va phawi vong inlang tha i ti naw maw?' an ta
29. Ama ruok chun, 'Ti lo e, bu tehlem in phawinaah bu tak phawi sa palh rawi in tih.
30. Bu sik chenin um tlang raw hai se. Bu sik pha leh a siktuhai kawlah: Bu tehlemhais chu lawr khawm hmasa zet unla, raw dingin intel ro; chu zoah bu tak chu ka bu inah sek lut ro, tiin hril ka tih' a ti a" a ta.
31. Tekhinthu dang a hril nawk a. "Van ram chu antam chi miin a lak a, a loa a the ang hi a nih.
32. Thlai chi laia chin tak ni sienkhom a hung inthang lien chun thlai danghai nekin a hung lien a, thing a hung ni a, chuongchun chungleng vatehai an hung a, a zara hai an riek hlak" a ta.
33. Tekhinthu dang a hril nawk a. "Van ram chu nuhmeiin chol a lak a, beiphit tekhawng thum, bei dinga a hmet hnak chu a renga chie tho vong dinga a phul ang hi a nih" a ta.
34. Chuong po po chu tekhinthu hmangin Isun mipui kuomah a hril a, tekhinthu hmang loin an kuomah ieng khom a hril nawh.
35. Zawlnei Isai hmanga hrila um chu a hung tlung kim tah a nih:" Tekhinthuin ka bau phong ka ta,Leihnuoi insieng tira inthoka thu inthup chu,Puong suok ka tih".
36. Chuongchun, mipuihai chu a fesan a, inah a lut a, a zirtirhai a kuomah an hung a, "Loa bu tehlem tekhinthu kha mi hrilfie rawh" an ta.
37. Ama chun a don a, "Chi tha thetu chu Mihriem Naupa hi a na; lo chu khawvel hi a nih.
38. Chi tha chu Ram nauhai an na, bu tehlem ruok chu mi suol nauhai an nih.
39. Bu tehlem thetu hmelma chu Diebol a nih. Bu sik chu khawvel tawp hunt ding a na, bu siktuhai chu vantirkohai an nih.
40. Bu tehlemhai chu la khawm a, meia an raw angin khawvel tawp pha chun la um a tih.
41. Mihriem Naupa hin vantirkohai tir suok a ta, suol inthawtirtu le thil suol thawtuhai po po chu a rama inthokin la suok vong an ta,
42. rawtuina meiah pei an ta, chu taka chun tapin ha rawt an tih.
43. Chu huna chun mi felhai chu an Pa ramah nisa angin var tang an tih. Ngaithlakna dinga na nei chun ngaithla ngun raw se.
44. "Van ram chu loa ro phum ruk, chu chu miin a hmu a, a vur nawk a, lawm takin a fe a, a nei po po a zor a, chu lo chu an chawk tah ang hi a nih.
45. "Chuong ang bokin, van ram chu sumdawngtuin tuikeplung hlu tak a zong a,
46. chu tuikeplung hlu tak chu a hmu phing leh a fe a, a nei po po a zor a, an chawk tah ang hi a nih.
47. "Van ram chu len khang, tuipuiah kei a, nga chi tinreng an fun khawmna ang chu a ni bok.
48. Len chu a sip pha leh nga mantuhai chun va kamah an hnuk suok a, an inthung a, a tha po bawmah an sie khawm a, a sie ruok chu an pei a.
49. Khawvel tawp pha khom chuong ang bok chun la um a tih. Vantirkohai hung an ta, mi fel laia inzep mi suolhai chu hung thlier an ta,
50. rawtuina meiah pei an ta, chu taka chun tapin ha rawt an tih".
51. Isun an kuomah "Chuong po po chu in hriet thiem am?" a ta. Anni chun "Hre thiem e" an ta.
52. Ama chun, "Chuleiin, Dan hretu le zirtirtu, van ram thu inchuktu taphot chu in neitu, a robawma inthoka rothil hlui le thar hung phor suoktu ang hi a nih" a ta.
53. Chuong tekhinthuhai chu Isun a hril zoin chu hmuna inthok chun a suok a.
54. An khuo a hung tlung a, sunagogah mihai a'n chuktir a, mak an ti hle a. "Hi pa hin varna le hieng thilmak thawtheina hi khaw laia inthoka a hmu am ning a ta?
55. Hi pa hi mistiri naupa kha a ni naw maw? A nu khom Mari an ti kha a ni nawm a ni? A unauhai khom Jakob hai, Josefa hai, Simon hai, Juda hai kha an ni nawm a ni?
56. A farnuhai khom eini lai an um vong an nawm a ni? Hieng po po hi khaw laia inthoka a hriet am ning a ta?" an ta.
57. Ama chu an hmu thiem ta naw a. Isun an kuomah, "Zawlnei chun ama khuo tieng le a sunghai lai ti chauh naw chu hmun tinah chawimawi a hlaw hlak" a tisan a.
58. An ring naw leiin chu taka chun thilmak a thaw tam nawh.
←  Matthew (13/28)  →