Matthew (12/28)  

1. Chuong lai chun Sabat niin Isun huit bil a hraw tlang a, a zirtirhai phingtamin huit vuihai chu thliekin an fak a.
2. Chu chu Farisaihaiin an hmuin, " En ta, i zirtirhaiin Sabat nia thaw thieng lo an thaw hih" an ta.
3. Ama ruok chun an kuomah, "A ruolhai leh an tamsawl tuma Davida thilthaw kha in tiem naw'm a ni?
4. Pathien inah a lut a, ama le a ruolhai fak thieng lo, thiempuhai chauh fak thieng, hlanbei a fak thu kha?
5. An leh, Sabat niin tempula thiempuhaiin sabat an sukporche a, sienkhom poi an tawk nawh ti thu khom kha Dan buah in tiem naw maw?
6. Ka hril cheu hi, tempul neka ropui lem hi taka hin a um.
7. Inthawina nekin lunginsietna ka thlang lem' ti thu umzie hi hrie ni unla chu, mi poi hril lohai hi thiem naw in inchangtir naw ding bah.
8. Mihriem Naupa hi Sabat Lalpa a ni si a" a ta.
9. Chu taka inthok chun a suok a, Sunagog-ah a lut a.
10. Chu hmuna chun mi pakhat kut zeng hi a lo um a. Isu an hek theina remchang zongin, "Sabat nia sukdam a thieng am?" tiin an lo indon a.
11. Isu chun an kuomah, "Nangni lai tu khomin beram pakhat nei unla, Sabat niin khurah tla ta sien, tuin am la suok nawng in ta?
12. Beram nek chun mihriem chu a va hlu lem de! Chuleiin, Sabat nia thil tha thaw a thieng" a ta.
13. Chuongchun, zeng kuoma chun, "I kut phar rawh" a ta, a hang phar a, a kut khing tieng angin a dam ta var a.
14. Chuongchun, Farisaihai chu an suok a, Isu sukhlum thei dan ding phierin an inrawn khawm a.
15. Chuong thu chu a hrietin chu hmun chu Isun a suoksan a. Mi tam takin ama chu an zui a, an natnahai a lo sukdam tawl a.
16. Ama chu tu am ani ti hril lo dingin anni chu a ti tlat a,
17. zawlnei Isai hmanga a chanchin hrila um chu a hung tlung kim theina dingin:
18. "A hi a nih ka siehlaw thlang,Ka hmangai le ka lawm em em chu;A chungah ka Thlarau sieng ka ta,Jentelhai chungah rorelna puong a ta,
19. Kalin rau khek tawl naw ni a,Kotthlerah tu khomin a rawl hre nawng an tih;
20. Hnena changa ro a rel hma khat chun,Luong por chu kei tan nawng a ta,Mise utq khom sukmit naw nih;
21. A hming chu Jentelhai beiseiInnghatna tak ning a tih"ti hi.
22. Chuong lai chun ramhuoi man pasal pakhat, mit indel le tong thei bok lo chu Isu kuomah an hung thuoi a, a lo sukdam a, a hung tong suok a, a hmu thei ta nghal bok a.
23. Mipui chun mak an ti hle a, "Hi pa hi Davida Naupa a ni thei el naw maw?" an ti tawl a.
24. Farisaihaiin chu chu an hrietin, "Hi pa hin ramhuoihai lal Belzebub leiin ramhuoihai a hnot suok a nih" an ta.
25. Isun an ngaituona a lo hriet a, an kuomah, "Khaw lai ram khom mani le mani indo chu an ram hlak; khaw lai khuo le insung khom mani le mani indo taphot chu an ngir suok ngai nawh.
26. Setanin Setan bok a hnot suok chun anni le anni an indo ning a ta, a ram chu ieng tin am ngir suok a ta?
27. Belzebub leia ramhuoi ka hnot suok a ni chun, in mihair khan tu leiin am ramhuoi an hnot suok hlak a? Anni kha a'n sonnaw thiem naw inchangtirtu ding cheu chu.
28. Nisienlakhom, Pathien Thlarau leia ramhuoihai hnot suok ka ni si chun in kuomah Pathien ram chu a hung tah tina a nih.
29. An naw leh, miin mi hrat chu a khuop hmasa zet naw chun, ieng tin am a inah hlu khumin a sumhai lakpek thei a ta? A khuop hnung ruok chun a in chu rok thei tang a tih.
30. Keima tienga thang naw taphot chun a mi do a na, a mi lakhawmpuitu naw chun a sukdar a nih.
31. "Chuleiin, ka hril cheu hi, mihai suolna po po le Pathien an hrilsietna po po chu ngaidam ning an ta, Thlarau Thienghlim hrilsetu ruok chu ngaidam ni naw nih.
32. Tu khom Mihriem Naupa soiseltu chu ngaidam ning a ta, Thlarau Thienghlim soiseltu ruok chu tuta dam sunga khom, hun la hung dinga khom, ngaidam ni naw nih.
33. " 'Thing tha i phun chun a ra thang a ta, thing sie i phun chun a ra sieng a tih; thing chu a raah a'n hriet' in ti hlak si a.
34. Rul thlahai, nangnin suol nei zingin iengtin am thil tha in hril thei ding? Lungrila sip liem hi a nih bauin a sak suok hlak.
35. Mi tha chun a lungril robawm thaa inthokin thil tha a phor suok hlak a; mi rilo ruok chun ritlona a khawl khawmhai chu a phor suok hlak.
36. Ka hril cheu hi, thu hmang lo hril taphot chun rorelna niah a maw an la phur ding a nih.
37. I bau suok thuin thiem inchangtir a ti che a, i bau suok thu bokin thiem naw inchangtir a ti che" a ta.
38. Chu zoah Dan hretuhai le Farisaihai laia thenkhat chun a kuomah, "Zirtirtu, nangmaa inthokin inchikna thilmak hmu kan nuom" an ta.
39. Isun a don a, "Tu lai ruolthar, suol tak le uire hmang tak hai hin inchikna thilmak an zong a, nisienlakhom zawlnei Jona inchikna chauh naw kha chu inchikna thilmak hrim inentir ni naw ni hai.
40. Ni thum le zan thum ngapui phing sungah Jona a um ang khan Mihriem Naupa khom hi ni thum le zan thum hnuoi sungah a um ve ding a nih.
41. Ninevi mihai chu rorelna nia chun tu lai ruoltharhai leh hin ngir tlang an ta, thiem naw inchangtir an tih; Jona thu hril leiin an sim si a. Ngai ta, Jona neka ropui lem hi taka hin a um.
42. Sim tieng lalnu kha rorelna nia chun tu lai ruoltharhai ruol hin ngir veng a ta, thiem naw inchangtir a tih; Solomon varna ngaithla ding hmanin kawlkila inthokin a hung si a; ngai ta u, Solomon neka ropui lem hi taka hin a um.
43. "Thlarau tirdakum chu mi sunga inthoka a suokin chawl hadamna ding zongin ram tawla hai a'n vak a'n vak a, a hmu zo naw a.
44. Chuongchun, 'Ka in, ka suoksan ta hnunga khan kir nawk el ka tih' a ta, a va tlung chun hluo lo, phit fai le hre fel diemin a va hmu a.
45. Chuongchun a fe a, ama neka suol ngot thlarau dang pasari a hung thuoi a, an lut a, chu taka chun umhmun an khuor tah a. Chu pa ngirhmun chu a hmaa nekin a hung se ta lem dai a nih. Chuong ang bokin, tu lai ruolthar, mi suol takhai chunga hin la um a tih" a ta.
46. Mipuihai kuoma Isun thu a hril lai chun biek nuomin a nu le a unauhai chu tuolah an ngir a.
47. Mi pakhatin a kuomah, "I nu le i unauhaiin biek an nuom che a, tuola son an nghak che" tiin a va hril a.
48. Ama ruok chun, "Ka nu chu tu am a na? Ka unauhai chu tuhai am an na?" a ta.
49. A zirtirhai tieng chu kuta kawkin, "En ta u, ka nu le ka unauhai hi: tu khom ka Pa vana mi ditzawng thawtu chu ka unau, ka farnu, ka nu an nih" a ta.
50. (A um nawh)

  Matthew (12/28)