Matthew (11/28)  

1. Zirtir sawmpahnihai kuoma thu a pek zoin Isu chu chu taka inthok chun a suok a, Galili ram khuoahai thu hril le inchuktir dingin a fe a.
2. Krista thilthawhai chanchin Johanin lung ina inthoka a lo hriet chun,
3. "A hung ding chu i ni am, annawleh mi dang kan la nghak ding?" tia indon dingin a zirtirhai chu Isu kuomah a tir a.
4. Isun anni chu a lo don a, "Kir nawk unla, in thil hriet le hmuhai hi Johan kuomah va hril ro.
5. Mitdelhai mit a var a, kebaihai ke a'n bai ta naw a, pharhai sukthiengin an um a, nasethai na a var a, mithihai keithoin an um a, riengvaihai kuomah Chanchin Tha hril a ni bok.
6. Tu khom keima laka beidong lo chu a hamtha" a ta.
7. Johan zirtirhai an fe phing leh Isun mipuihai kuomah Johan chanchin a hril a. "Ieng en dingin am thlalera khan in fe a? Thliin luong a mut hning maw?
8. An naw leh, ieng hmu dingin am in fe? Puon nem sila inchei maw? Ni lo e, puon nem sila incheihai chu lal inah annawm an um hlak.
9. Anleh ieng en dinga fe reng reng am in na? Zawlnei en dingin maw? A ni reng, ka hril cheu hi, zawlnei neka ropui lem tie! Ama chanchin hi annawm hienga an lo ziek:
10. 'Ngai ta, ka tirko,I hmaah ka tir a;Ama chun i hmaah,I lampui buotsai a tih' tiin.
11. Thu dik ka hril cheu hi, nuhmei sula inthoka insieng lai Baptistu Johan neka ropui lem an la suok ngai nawh; nisienlakhom, van rama mi chin tak khom ama nekin an ropui lem.
12. Baptistu Johan a hunga inthok tu chen hin van ram chu an baw huoi huoi a, a nor hrathai chun an pawng lak hrim a nih.
13. Johan a hung inlang chen khan Dan thu le zawlnei po poin chu chu an lo hril lawk a ni kha.
14. In ring nuom a ni chun, ama hi zawlnei hung dinga hril tah Elija chu a nih.
15. Ngaithlakna dinga na nei chun ngaithla ngun raw se.
16. "Tu lai ruoltharhai hi ieng le'm hrilkhing ka ta? Dawr hmuna thung naupang ruol inkhektuo a,
17. Theihle kan mutpek cheu a,In lam nuom si naw a;Lusun hla kan sak hlakin,In tap nuom chuong bok si nawh'tihai ang hi in nih.
18. "Johan chu a hung a, fain a dawn naw a, 'Ramhuoi zawl a nih' in ti a.
19. Mihriem Naupa a hung a, fain a dawn a, "En ta u, mi virkawngpa, uoiin he mi, siekhontu le mi suolhai ruolpa saw' in ti nawk si a. Nisienlakhom, Pathien varna chu a thilthawah a'n lang hlak" a ta.
20. Chun, thilmak a thaw tamna tak khuohai chu an sim chuong si naw leiin Isun a hal a.
21. "Nang Korazin, i chung a pik. Nang Bethsaida, i chung a pik. Nangni laia thilmak ka thawhai kha Tura le Sidona thaw ni sien chu saiip sila vuta inbuolin sim tang an tih.
22. Chuleiin, ka hril cheu hi, rorelna nia in tuor ding nek chun Tura le Sidon tuor ding chu zie-um lem dai a tih.
23. Kapernaum, nang khom van chena chawi sang i ni ding am a ni? Teu lo e! Mithi khaw chena tla thla ding i nih. Nangmaa thilmak thaw tahai po po kha Sodoma thaw ni sien chu, tu chen hin la um zing a tih.
24. Chuleiin ka hril che hi, rorelna nia i tuor ding nek chun Sodom tuor ding chu zie-um lem dai a tih" a ta.
25. Chu lai chun Isun hieng hin a hril a: "Aw Pa, hnuoi le vana Lalpa, nangin mi var le mi thiemhai lakah hieng thu hi i thup a, naupangtehai kuomah i puong leiin ka'n pak che.
26. A nih, Pa, chuong chu tha i tizawng tak a nih.
27. Ka Pain iengkim a mi'n koltir tah; Pa chauh naw chun tu khomin Naupa hi an hriet nawh; Pa khom Naupa le a kuoma Naupain a puong nuomnahai chauh naw chun tu khomin an hriet nawh.
28. "Nangni rimtong le rikphur po po hai, ka kuomah hung unla, keiin sawldamna peng ka ti cheu.
29. Ka ringkol bat unla, ka kuomah inchuk ro; mi zaidam le lungrila inngaitlawm tak ka ni si a, chuongchun in thlarau ta dingin sawldamna hmung in tih.
30. Ka ringkol a hadam a, ka phur khom a zang a nih" a ta.

  Matthew (11/28)