←  Matthew (10/28)  →
1. A zirtir sawmpahnihai chu a ko a, thlarau tirdakumhai hnot suok theina dinga thuneina le hri le natna chi hrang hranga nahai sukdam theina dinga thilthawtheina a pek a.
2. Tirko sawmpahnihai hming chu: a hmasa takin Simon, Peter an ti le a unau Andri, Zebedai naupa Jakob le a unau Johan,
3. Filip le Bartholomai, Thoma le siekhontu Mathai, Alfai naupa Jakob le Thadai,
4. Kanan mi Simon le a'n mantirtu Juda Iskariot hai an nih.
5. Chuong sawmpahnihai chu Isun a tir suok a, hieng hin thu a pek a: "Jentelhai lai fe naw unla, Samari mihai khuo sir bok naw ro;
6. beram inhmang Israelhai kuoma chun fe lem ro.
7. In inzinnaah, 'Van ram chu a hnai tah' ti pei ro.
8. Damnawhai sukdam unla, mithihai kei tho unla, pharhai sukthieng unla, ramhuoihai hnot suok ro. A thlawnin in hmu a, a thlawnin pe ro.
9. In kawngchunah rangkachak le tangkaruo le dara siem tangka hrim hrim chun sa naw unla;
10. in inzinnaah mansa amanih, zakuo inthlakna ding amanih, pheikhok amanih, hmol amanih chawi bok naw ro; sinthawtu chu fak hmu tlak a ni si a.
11. "Khaw lien le khaw chin in lutna taphotah tlungna tlak awm mi zong unla, a khuo in suoksan chenin chu taka chun tlung zing ro.
12. Ina in lutin chibai buk ro.
13. Chu ina chenghai chu chibai dong tlak an ni chun in thlamuongna thun chu an chungah tlung raw se.
14. Mi tu khomin an lo lawm naw cheu a, in thu khom an lo ngaithlak naw chun, chu ina inthok amanih, chu khuoa inthok amanih in suok hunah in kea pilvut chu thin thla ro.
15. Thu dik ka hril cheu hi, rorel nia chun chu khaw tuor ding nek chun Sodom le Gomora tuor chu zieum tak ni lem a tih.
16. "Satene ruol laia beram inluttir ang elin nangni khom ka tir suok cheu a ni hi; chuleiin rul anga var le vathu anga poi tawk loin um ro.
17. Mihai laka chun inveng fimkhur ro; Sanhedrin kutah inhlanin, sunagoga hai invuoktir an ti cheu.
18. Keima leiin hotuhai le lalhai hmaah, anni le Jentelhaiin ka thu an hriet theina dingin, la thuoi an ti cheu.
19. Chuonga an man pha cheu chun ieng am in hril ding le in hril dan ding thuah lungkham naw ro. In hril ding chu a hun takah inhriettir ning in tih.
20. A hriltu chu nangni ni loin, nangni hmangin in Pa Thlarau chun a hril lem ding a ni si a.
21. "Chun, sukhlum dingin unaupa chun a unaupa inmantir a ta, pa khomin a naupa inmantir a ta; nauhai khomin an nu le pahai do an ta, sukhlum an tih.
22. Ka hming leiin mi po po theida ning in ta; a tawp chena ngir nghettuo chu sandamin um a tih.
23. Hmun khatah an suknomna pha cheu hmun dangah tlansan pei ro. Thu dik ka hril cheu hi, Mihriem Naupa hung hmain Israel khuohai sir suok hman naw ti niu.
24. "Inchuklai chu a zirtirtu chunga mi a ni naw ang bokin siehlaw khom a pu chunga mi a ni nawh.
25. Inchuklai chu a zirtirtu ang le siehlaw chu a pu ang a ni chu a ta dingin a huntawk. In neitupa hman hi Belzebub an mi ti si chun a sungkuohai lem chu an va hril siet nasa zuol ding de aw!
26. "Chuleiin, anni chu ti naw ro. Inlang lo dinga thup ieng khom a um naw a, hriet lo dinga ip ieng khom a um bok nawh.
27. Thimthama ka hril cheu hi khaw varah hril ro; biekruka ka hril cheu hi in chung sipa inthokin tlang insampui ro.
28. Taksa sukhlum thei, sienkhom thlarau sukhlum thei si lohai chu ti naw unla, hremhmuna thlarau le taksa sukbohmang theitupa ruok chu ti hle ro.
29. Chongzong pahni poisa khatinp an zor hlak an naw maw? Nisienlakhom, anni laia pakhat khom in Pa thu loin hnuoiah tla naw nih.
30. In sam zai chen hin inchik vong a nih in sonnaw.
31. Chuleiin, ti naw ro, chongzong tam tak nekin in hlu lem si a.
32. "Chuongchun, mihai hmaa mi tan taphot chu kei khomin ka Pa vana mi hmaah tan veng ka tih.
33. Tu khom mihai hmaa mi'n phattu ruok chu kei khomin ka Pa vana mi hmaah inphat veng ka tih.
34. Hnuoia hin inremna inlengtir dinga hung ka nih sawn naw ro; inremna inlengtir ding ni loin, kawlhnam inlengtir dinga hung ka ni lem.
35. Naupa chu a pa indotir ding dam, naunu chu a nu indotir ding dam, mo chu a tarpi indotir ding dama hung ka ni lem.
36. Miin a hmelma chu ama sungkuo laia mi ngei ning a tih.
37. Tu khom mani nu amanih, pa amanih keima neka hmangai lemtu chu ka mi ni tlak a ni nawh. Tu khom keima neka mani naupa hmangai lem chu ka mi ni tlak a ni nawh.
38. Tu khom mani kraws puta mi zuitu naw chu ka mi ni tlak a ni nawh.
39. Tu khom mani nun hum tum chun chan a ta, keima leia nun chanhai chun hum an tih.
40. "Tu khom a lawmtu cheu chu keima mi lawm an nih; tu khom mi lawmtu chu mi tirtu lawm an nih.
41. Zawlnei chu zawlnei a nina leia lawm taphot chun zawlnei lawmman hmung an tih; mi fel chu mi fel a nina leia lawm taphot chun mi fel lawmman hmung an tih.
42. Thu dik tak ka hril cheu hi, hieng mi chin tak laia mi tu khom ka zirtir a ni leia tuisik no khat lo petu chun a lawmman ding chu chan naw top a tih" a ta.
←  Matthew (10/28)  →