Matthew (1/28)  →

---

1.

Abraham naupa, Davida naupa Isu Krista thlatuhai inthla sawng dan chu hieng ang hi a nih:

2.

Abrahamin Isak a thla a, Isakin Jakob, Jakobin Juda le a unauhai,

3.

Judain Tamari lakah Perez le Zera, Perez-in Hezron, Hezronin Aram,

4.

Aramin Aminadab, Aminadabin Nason, Nasonin Salmon,

5.

Salmon le a nuhmei Rahabin Boaz, Boaz le a nuhmei Ruthiin Obed, Obed-in Jesai,

6.

Jesaiin Lal David. Davidan Uria nuhmei lakah Solomon a thla a,

7.

Solomonin Rehoboam, Rehoboam-in Abija, Abija-in Asa,

8.

Asa-in Jehosafat, Jehosafatin Joram, Joramin Uzia,

9.

Uzzia-in Jotham, Jothamin Ahaz, Ahaz-in Hezekia,

10.

Hezekia-in Manase, Manase-in Amon, Amon-in Josia,

11.

Josia-in Babulon sala an intang lai velin Jekoni le a unauhai a thla a.

12.

Babulon sala inthoka an suok hnungin, Jekoni-in Sealthiel, Sealthiel-in Zerubabel,

13.

Zerubabel-in Abiud,

14.

Abiud-in Eliakim, Eliakim-in Azor,

15.

Azor-in Zadok, Zadok-in Akim, Akim-in Eleazar. Eleazar-in Mathan, Mattan-in Jakob,

16.

Jakob-in Josefa, Mari pasal, Mari lakah Isu, Krista an ti chu a hung pieng tah a nih.

17.

Chuongchun, Abrahama inthoka Davida chen inkarah suon sawm le suon li an um a, Davidaa inthoka Babulon sala an thuoi hun chen inkarah suon sawm le suon li an um a, Babulon sala an thuoia inthoka Krista chen inkarah suon sawm le suon li bok an um a nih.

18.

Isu Krista hung pieng dan chu hieng ang hi a nih: A nu Mari chu Josefa nuhmei huol a na, nupaa an um hmunkhat hmain Thlarau Thienghlimin nau a'n paitir ti hriet a hung ni tah a.

19.

A pasal huol Josefa chu mi fel tak a ni leiin tlang hrieta sukmuolpho a nuom naw a, a ruka the el a tum a.

20.

Nisienlakhom, chuonga a ngaituo hnung chun a mangah Lalpa vantirko a hung inlar a, a kuomah, "Josefa, Davida naupa, Mari hi i nuhmei dinga thuoi intim naw rawh, a nau pai chu Thlarau Thienghlim laka mi a nih.

21.

Nau pasal nei a ta, a hmingah ISU i sak ding a nih; ama chun a mihai chu an suolhai laka inthokin a sandam ding a ni si a" a ta.

22.

Hieng thil tlung po po hi Lalpan zawlnei hmanga a lo hril tah chu a hung tlung kimna ding a nih:

23.

" Nunghak thienglamin nau pai a ta,Nau pasal nei a ta,A hmingah Immanuel sak an tih"tiin. Immanuel chu "Ei kuomah Pathien a um" tina a nih.

24.

Josefa a hung thanghar chun Lalpa vantirko hril ang chun a thaw a, Mari chu nuhmeiah a nei a

25.

Nisienlakhom, a nau a pieng hma khat chun a pawl nawh. Chu nau hminga chun Isu a sak a.

---

Matthew (1/28)  →