←  Mark (9/16)  →
1. Chun, ama bokin, "Thu dik ka
2. Chun, ni ruk hnungin Isun Peter hai, Jakob hai le Johan hai chauh thuoiin tlang insangah a fepui a, anni chauha an um lai chun a hmel a hung danglam ta a.
3. Hnuoia puon sawptu tu khomin an sukvar thei naw khop hiela varin a silfen chu a hung var tle sur el a.
4. An kuoma chun Elija le Mosie an hung inlar a, Isu leh an inbiek a.
5. Peter chun Isu kuomah, "Rabbi, hi taka um hi ei ta dingin a tha. Bawkte pathum khawng ei tiu, i ta dingin pakhat, Mosie ta dingin pakhat, Elija ta dingin pakhat" a ta.
6. An ti em a, hril ding mumal khom a hriet nawh.
7. Chun, sum a hung zing a, anni chu a hung tuom a, suma inthok chun rawl a hung suok a, "Hi hi ka Naupa, ka Dittak chu a nih, ama thu ngai ro" tiin.
8. Chuongchun, an ngha vel ruoi a, anni lai chun Isu chauh naw chu tu dang khom an hmu ta nawh.
9. Tlanga inthoka an hung thlak lai chun, mithi laia inthoka Mihriem Naupa a tho nawk hma chun an thil hmuhai chu tu khom hril der lo dingin Isun thu a pek a.
10. Chu thu chu lungrilah an vong zing a, 'mithi laia inthoka tho nawk' ti umzie chu iem ning a ta ti thu chu an hril tlang hlak a.
11. Chun, anni chun, "Iengti ziea Dan zirtirtuhaiin, 'Elija a hung hmasa zet ding a nih' an ti'm a na?" tiin Isu an indon a.
12. Ama chun, "Elija chu iengkim siem tha dingin a hung hmasa ding a ni hrim a nih. Chuong a ni si leh iengti ziea Mihriem Naupa hin thil tam tak tuor a ta, hnawlin a um bok ding a nih ti hi an ziek tlat am a na?
13. Sienkhom ka hril cheu hi, Elija chu a hung tah a, a chanchin an ziek ang ngei khan a chungah an nuom taphot an thaw ta kha" a ta.
14. Zirtir danghai kuom an zuk tlung chun an velah mipui tam tak an hmu a, Dan zirtirtuhai leh an lo insel a.
15. Isu hung an hmu chun an phawk hle a, a hmuok dingin an tlan hum hum a.
16. An kuomah, "Hienghai le hin ieng thu am in lo insel leh?" a ta.
17. Mipui laia pakhat chun a don a, "Zirtirtu, ka naupa, ramhuoi tong thei loin a man chu ka hung thuoi a.
18. A man pha leh a the thluk hlak a, a chil huom dam a tla a, ha a rawt a, a khong tlat hlak a. I zirtirhai hi hnot suok dingin ka ta, an thaw thei si naw a" a ta.
19. Ama chun, "Tu lai ruol thar, ringna tlasamhai, ieng chen am in kuomah um ka ta, ieng chen am ka ngai thei ding cheu a na? Naupang chu hung thuoi ro" a ta.
20. Chuongchun, an hung thuoi a. Ramhuoiin Isu a hmu char chun naupang chu a soisak nghal a, hnuoiah a the thluk a, chil huom tla neng nungin an per chor chor a.
21. Isu chun a pa kuomah, "Hienga a umna hi ieng chen am an ta a?" tiin an don a.
22. A pa chun, "A naupang laia inthok a ni tah. Sukhlum tumin voi tam tak meia dam, tuia dam a pei ta hlak a. A thei hram chun mi lunginsiet la, mi thangpui lul rawh" tiin a ngen a.
23. Isun a kuomah, " I thei chun i ti maw? A ringtu ta ding chun iengkim hi thaw thei vong a nih" a ta.
24. Naupang pa chun, "Ka ring ie. Ka ringhlana hi mi hnepek rawh" tiin a khek suok ta nghal a.
25. Mipui an hung tlan khawm hut hut Isun a hmu chun ramhuoi tirdakum chu a hal a, "Nang ramhuoi, tong thei lo le naset, thu ka pek che, a sunga inthok khan hung suok la, lut nawk ta ngai naw rawh" a ta.
26. Ramhuoi chu a khek rak a, a soisak hrep hnungin a hung suok a. Naupang chu thi ang derin a um a, mi tam tak lem chun "A thi tah a nih" an ti hiel a.
27. Nisienlakhom, Isun a kut a chel a, a kei tho a, a hung ngir suok el tah a.
28. Inah Isu a lut hnung chun a zirtirhaiin, "Iem a ta keinin kan hnot suok ve thei naw?" tiin a falin an indon a.
29. Ama chun, "Hieng thil hi chu tongtainao chauh naw chun hnot suok thei a ni nawh" a ta.
30. Chu taka inthok chun an fe suok a, Galili ram a fe thleng a, chu chu tu hriet khom Isun a nuom nawh,
31. a zirtirhai chu thil a zirtir lai a ni leiin. Chuongchun an kuomah, "Mihriem Naupa hi mihriemhai kuta inmantir ning a ta, sukhlum an ta, a ni thum niah tho nawk a tih" a ta.
32. Amiruokchu, anni chun a thu hril umzie chu an hriet naw a, ama hlak an indon chieng ngam bok si nawh.
33. Kapernaum an hung tlung a. In an lut chun, "Lampuia in inselna kha ieng thu am an ta le?" tiin an don tawl a.
34. Lampuia chun "Eini lai tu am ropui tak a ta?" ti thua insel an ni leiin an to ta chip a.
35. Isu chu a'n thung a, sawmpahnihai chu a ko khawm a, an kuomah, "Tu khom a hmasa tak ni nuom chu a nuhnung takah um a ta, mi po po rongbawltuah a um ding a nih" a ta.
36. Naupangte a hung kei a, anni lai a'n ngirtir a, a kuo a,
37. "Tu khom ka hming leia hieng ang naupangte pakhat khom lawmtu chun kei a mi lawm a na, tu khom kei mi lawmtu chun kei a mi lawm ni loin a mi tirtu a lawm a ni lem" a ta.
38. Johan chun a kuomah, "Zirtirtu, tuin amanih i hmingin ramhuoihai a hnot suok kan hmu a, keini a zuitu che lai a thang ve si naw leiin thaw ta lo dingin kan hril el a nih" a ta.
39. Isu ruok chun, "Khap naw ro, tu khom ka hminga thilmak thaw sia mi hrilse zui nghal el thei an um nawh.
40. Tu khom a mi kaltu ni lo chu eini tienga thang a nih.
41. Thu dik ka hril cheu hi, Krista mi in ni leia dawn ding tuisik no khat khom ka hminga petu cheu taphot chun a lawmman ding chu chan naw top a tih.
42. "Tu khom a mi ringtu laia a chin tak khom sukthlutu chu a ringah bu rawtna lung lien tak inhlitirin tuifinrietah thlak ni sien a ta dingin tha lem a tih.
43. I kutin suol a'n thawtir che chun tan el rawh, kut pahni neia Gehenna mei rem thei loa fe nekin kut khing bula hringnaa lut chu i ta dingin a tha lem.
44. Chu taka chun panna inlung a thi thei naw a, mei khom a rem ngai bok nawh.
45. Chun, i kein suol a'n thawtir che chun tan el rawh, ke pahni neia Gehenna mei rem thei loa lut nek chun ke khing bula hringnaa lut i ta dingin a tha lem.
46. Chu hmuna chun panna inlung a thi ta ngai naw a, mei khom a rem ta ngai bok nawh.
47. I mit khomin suol a'n thawtir che chun khel dok el rawh, mit khing hni neia Gehennaa peia um nek chun mit khing khat neia Pathien rama lut i ta dingin a tha lem.
48. Chu hmuna chun panna inlung a thi ta ngai naw a, mei khom a rem ta ngai bok nawh.p
49. Mi tin chu meia raw thienghlimq an ni ding a ni si a; inthawina tinreng khom chia saw thienghlim ning a tih.
50. Machi hi a tha a, sienkhom a alna da ta sien, iengtin am suk-al nawk in ta? Nangniah machi nei un la, inngei diel dielin um ro" a ta.
←  Mark (9/16)  →