←  Mark (7/16)  →
1. Farisaihai le Dan zirtirtuhai laia mi thenkhat Jerusalema inthoka hunghai chu Isu kuomah an hung a,
2. a zirtirhai laia thenkhatin kut sawp loa bu an fak chu an hmu a.
3. Farisaihai le Juda mi po po chun an upahai ching dan chel tlatin an dan anga kut an sawp zet naw chun bu an fak ngai nawh.
4. Bazar hmuna inthoka an hung kir khomin an insawp zet naw chun thil an fak ngai nawh. Ching dan tam tak an zawm laia thang sa ve chu no hai, tuibel hai, ketli hai le bu fakna dawkan hai sawp a nih.
5. Chuongchun, Farisaihai le Dan zirtirtuhai chun Isu kuomah, "Ieng dinga i zirtirhaiin upahai ching dan zawm ve loa kut sawp loa bu an fak hlak am a na?" tiin an indon a.
6. Ama chun, "Isaiin nangni lemderhai chungthu a ziek kha a lo indik ngot el:'Hienghai rawi hin bauin an mi'n pak a,An lungril ruok chun an mi hlat hle si;
7. Thuringah mihriem thu an inchuktir a,An mi chawibiek khom hi a thlawn el a nih'ti hi" a ta.
8. Chun, ama bokin an kuomah, "Pathien dan thupekhai hnawlin pipu ching dan in chel a.
9. In ching dan in vong theina dinga Pathien dan thupekhai hnawl dan chu in thiem khop hi!
10. Mosien, "I nu le pa chawimawi rawh, Tu khom a nu le pa hrilsetu chu sukhlum ngei ding a nih" a ta.
11. Nangni ruok chun in nu le pahai kuomah, 'Ka tha i sor ding kha Korbanj a ni tah' in ti chun,
12. a nu le pain a tha an sor ding in phal ta ngai nawh.
13. Pipu ching dan in inhlan sawng pei chun Pathien thu chu iengma loah in siem a, chuong ang thil tam tak chu in thaw hlak" a ta.
14. Chuongchun, mipuihai chu a ko khawm nawk a, "Mi tinin ka thu hi ngaithla seng unla, hre chieng ro.
15. Puo tienga inthoka mihriem sunga lut chun ama a sukporche thei nawh. Chuong nek hmanin, mihriem sunga inthoka suok hin a nih mi a sukporche hlak chu.
16. Tu khom hrietna dinga na nei chun ngaithla ngun raw se" a ta.
17. Mipuihai chu a maksan a, inah a lut hnungin a zirtirhaiin tekhinthu chu an indon chieng a.
18. Ama chun, "Nangni khom chuong lawm chun in lo mawl ve a ni maw? Ieng khom puo tienga inthoka mihriem sunga lutin ama a sukporche thei nawh.
19. A san chu a lungrilah lut loin a phingah a lut a, an hnawm suok nawk el a nih. (Hi hi iengkim fak a thieng thu a hrilna a nih).
20. Sunga inthoka suok hi a nih mihriem sukporchetu chu.
21. Sunga inthok, mihriem lungrila inthoka suok chu ngaituona suol dam, inngaina suol dam, rukrukna dam, tuolthatna dam, uirena dam,
22. duamna dam, theidana dam, hlemna dam, hurna dam, itsikna dam, inhril sietna dam, chapona dam le intlawkna dam a nih.
23. Chuong ang suol chu sunga inthokin a hung suok a, mihriem a sukporche hlak" a ta.
24. Chu hmun chu a suoksan a, Tura le Sidon bielah a fe a, in pakhatah a lut a, a hung thu tu hriet khom a nuom naw a, sienkhom a'n thup thei si nawh.
25. Nuhmei pakhat, a naunu ramhuoi tirdakum pai chun a chanchin a hriet charin a hung pan a, a ke bulah a bokkhup a.
26. Ama nu chu Grik mi, Suria Foinikiak pieng a na. A naunu sunga inthoka ramhuoi hnot suokpek dingin Isu a ngen a.
27. Isu chun a kuomah. "Nauhaiin fa khop hmasa phot raw hai se. Nauhai bei lakpeka uihai kuoma pek chu a'n dik nawh" a ta.
28. Ama nu chun, "Lalpa, ni chu ni e, sienkhom dawkan hnuoia uihai khomin nauhai bei nawi tla chu an fak hlak tho annawm" a ta.
29. Isun, "I thu hril lei tak chun kir nawk ta la, ramhuoi chu i naunu sunga inthokin a suok tah" a ta.
30. Chuongchun, inah a kir a, ramhuoiin a suoksan, khuma zal a naunu chu a hmu a.
31. Chu zoah Isu chun Tura biel a suoksan a, Sidon pal tlanga Galili dilah tum thlain, Dekapoli biel a tlung a.
32. Mi pakhat, naset le tong fel thei lo hi a kuomah an hung thuoi a, a chungah kut innghat dingin an ngen a.
33. Isun ama chu mipui sirah a kei bing a, a kutparin a nakuo a khikpek a, chil a sak a, a lei a thempek a.
34. Van tieng nghaa inthuok huoiin, 'Effata, a ta, chu chu "Lo inhong ta rawh" tina a nih.
35. Chu phing leh a na a hung inhong a, a lei inkhuop khom chu a hung insut a, fie takin a hung tong thei tah a.
36. Isun tu khom hril lo dingin thu a pek a. Sienkhom a khap nasa po leh a chanchin chu an hril thang zuol sau a.
37. Mipuihai chu maktinaa sipin, "Iengkim tha takin a thaw a, naset dam sukvarin tong thei naw khom an tongtir thei a nih" an ta.
←  Mark (7/16)  →