←  Mark (6/16)  →
1. Chu taka inthok chun a suok a, a khuo tieng a pan a, a zirtirhaiin an zui pei a.
2. Sabat ni a hung tlung chun sunagogah a zirtir a, a thu ngaithlatu mi tam tak chun mak an ti hle a. "Hieng hi khaw laia inthoka a hriet am ning a ta? Thilmak thaw theina khop hiel varna peka a um hi ieng varna am ni tang a ta?
3. Hi pa hi Mari naupa, Jakob hai, Josefa hai, Juda hai, Simonhai unaupa mistiri kha a ni naw am a ni? A farnuhai khom eini lai an um zing an naw maw?" an ta, a chungah an lungni naw hle a.
4. Isu chun, "Zawlnei chu ama khuo tieng le a laichinhai le ama sungkuohai lai chawimawiin a um ngai naw hrim a nih"i a tisan a.
5. An chungah kut innghata damnaw tlawmte a sukdam ti chauh naw chu chu taka chun thilmak hrim a thaw thei nawh.
6. An ring nawna lei chun mak a ti hle a.
7. Chuongchun, inchuktir malam peiin khaw hrang hrang a fang a. Sawmpahnihai chu a ko a, a kop peiin a tir suok a, thlarau tirdakumhai chunga thuneina khom a pek bok a.
8. An kuomah, "In inzin pha funghrol chauh naw chu bei dam, mansa dam chawi naw unla, kawngchunah poisa ip khai bok naw ro.
9. Pheikhok ruok chu bun un la, sienkhom zakuo inthlakna ding khom chawi naw ro.
10. In khaw sir in suoksan hma khat in tlungna ngaiah tlung zing ro.
11. Tu khuo khomin an lawm naw cheu a, in thu an ngaithlak naw chun, chu khuo chu in suoksan ding pha an thaw indik nawzie inhriettirna dingin in kephaa pilvut chu thin thla ro" tiin thu an cha tawl a.
12. Chuongchun an inzin suok a, suol sim dingin mihai an zirtir a.
13. Ramhuoi tam tak an hnot suok a, damnaw tam tak hriek an nal a, an sukdam bok a.
14. Isu hming chu a'n thang ta em leiin Lal Heroda khomin a lo hriet ve tah a. Mi thenkhat chun, "Baptistu Johan kha mithi laia inthokin a hung tho nawk a, chuleiin hieng thilmakhai thawtheina hi amaah a thok a nih" an ta.
15. A thenin, "Elija a nih" an ta; a then ruok chun, "Zawlnei, tien laia zawlnei pakhat ang kha a nih" an ti bok a.
16. Herodan a lo hriet ruok chun, "A lu ka tanpek Johan kha a nih, a hung tho nawk tah a ni chu!" a ta.
17. Heroda ngei chu Johan man dinga thupetu le lung ina khumtu a nih. Ama hin a unaupa Filip nuhmei Herodi chu nuhmeiah a neipek leiin hieng thil hi a thaw a nih.
18. A san chu Heroda kuomah Johanin, "I unaupa nuhmei i lakpek hi a thieng nawh" tiin a hril a.
19. Chuleiin Herodi chun Johan chu a theida a, sukhlum a nuom a, sienkhom a thei naw a;
20. Herodan Johan chu mi fel le mi thienghlim a nih ti a hriet a, a ti a, a hum tlat a. Johan thuhril a ngaithlak changin Heroda chu inngaituo buoi hle hlak sienkhom a ngaithlak nuom tlat bok si.
21. A tawpa chun hun remchang a hung tlung a. Heroda piengcham ni chun ruoi ropui tak a buotsai a, chu taka chun sorkar mi lien, sipai hotu le Galilia mi challanghai chu a fiel khawm a.
22. Herodi naunu chu a hung lut a, a lam a, Heroda le a ruoi kiltuhai chu a suklawm hle a. Heroda chun, "Ieng khom i hni taphot chu peng ka ti che" a ta.
23. Chun, inkham meuin, "I mi hni taphot chu peng ka che, ka ram zatve hiel khom" tiin thu a tiem a.
24. Ama chu a suok a, a nu kuomah, "Iem ka hni ding?" tiin a va'n don a. A nu chun, "Baptistu Johan lu" tiin a lo hril a.
25. Inhmaw takin lal kuoma chun a kir nawk nghal a, "Tu ngei hin thlengah Baptistu Johan lu mi pe rawh" a ta.
26. Lal chun nasa takin poi a ti a, sienkhom a thutiem le a ruoi kilpuihai lei chun sel a rin a.
27. Chuongchun, vengtu sipai pakhat chu Johan lu la dingin a tir nghal a, lung ina um Johan lu chu a va lak a,
28. a lu chu thlengin a hung dom a, nunghak kuoma chun a pek a.
29. Johan zirtirhaiin chu chu an hriet phing leh a ruong chu an va lak a, thlanah an vui a.
30. Tirkohai inzin chu Isu kuomah an hung kir nawk a, an thilthawhai le an thu inchuktir po po chu an ripawt a.
31. A kuoma hung le suok an inzi nuk nuk a, bu tak ngiel khom an fak hman naw leiin Isun, "Nangni rawi chauh hung inla, fienriel hmunah feng ei ta, ei chawl hadam ding a nih" a ta.
32. Chuongchun, hmun fienriel panin longin an suok a.
33. An suok chu mi tam takin an hmu a, anni an nih ti an hriet chun khaw tina inthoka hung tlan khawmhai chun khawmuolah kein an lo tlan khal a.
34. Longa inthoka an hung suok chun mipui tam tak a hmu a, vengtu nei lo beram ang an ni leiin a lunginsiet tawl em em a, thu tam tak a zirtir a.
35. Khuo a hung inhnu ta hle a, a zirtirhai chu a kuomah an hung a, "Hi hi hmun kilkhawr a na, khuo khom an hnu tah a,
36. fak ding iemani bek an inchawk theina dingin ei kawl vel lo le khuoa hai infetir tawl ta la" an hung ta.
37. Ama chun, "Nangnin fak ding pe lem ro" tiin a lo don a. Anni chun, "Chuong zat bei inchawkna ding chun patling thla riet hlaw hiel ngai a tih. Chuong zat zat senga va'n chawin kan pek tawl dim a ni?" an ta.
38. Ama chun, "Bei ieng zat am in nei hang en ta u" a ta. An nei zat an hriet phing leh, "Bei phek nga le ngate pahnih" an ta.
39. An rengin a pawl pawla hlobet chunga inthungtir dingin a zirtirhai chu thu a pek a;
40. za dam, sawmnga dam peiin an inthung khawmtir a.
41. Ama chun bei phek nga le ngate pahni chu a lak a, van tieng nghaa lawmthu a hril zoin bei chu a khoi a, mipui kuoma sem dingin a zirtirhai chu a pek a, nga khom chu a pek seng bok a.
42. An reng chun tlai takin an fak a;
43. bei le nga an fak bang an rut khawm chu bawm sawmpahni sip a nih.
44. Bei fatuhai chu patling ngot khom sangnga an nih.
45. Isun mipui an tintir lai chun a zirtirhai chu ral khing tieng Bethesaida khuo pana lo fe hmasa dingin longah an chuongtir nghal a.
46. Mipui a'n tintir hnung chun tongtai dingin tlangah a fe a.
47. Zan tieng a hung ni chun long chu dil lailung a tlung tah a, Isu chu ama chauhin khawmuola chun a um a.
48. Long chu thliin a naw tienga inthokin a hung nam leiin an kar hrat thei naw a, an mangang ti a hmu a. Vartien lai velin dil chungah kea lawnin anni tieng a hung pan a, anni chu fe khel a tum a.
49. Dil chunga lawn an hmu chun phung an sawn a.
50. An reng chun an hmu a, thlabarin an khek chul a. Ama chun a biek nghal tawl a, "Lung muong takin um ro, kei ka ni annawm, Ti naw ro" a ta.
51. Chuongchun, longa chun a chuong ve a, thli chu a re tah a.
52. Maktinain an sip a, a bei sukpung thu kha a ngaina an la hriet naw bok leh; an ngaituonain a la man phak si nawh.
53. Dil ral khing tienga Genesaret ram an kai chun an long an thlung a.
54. Longa inthoka an hung suok chun mihaiin Isu a nih ti an lo hriet nghal a.
55. Chu biel po poa chun hril vel dingin an tlan sup sup a, a um ti an hrietna taphotah damnawhai chu an khum pumin an hung zawn a.
56. Khaw te, khaw lien le loa hai, khaw lai khom a fena taphotah damnawhai chu dawr hmunah an zal khup a, a puon hmor bek them phalna an hni a, a them taphot an dam pei bok a.
←  Mark (6/16)  →