←  Mark (5/16)  →
1. Galili dil rala Gerasinf mihai ram chu a tlung a.
2. Longa inthoka a hung suok chun thlarau tirdakum pai mi pakhat, thlan hmuna inthoka hung chun a'n tuokpui a.
3. Chu pa chu thlan hmunah a khawsa hlak a, tu khomin an thuhne thei ta naw a, khaidiet khomin an thlung hne ta nawh.
4. Khaidieta khit a, kol an inbuntir chang khomin khaidiet chu a kei tan a, thir kolhai khom a suksiet pei a, tu khom a thunun zo an um nawh.
5. A sun a zanin thlan hmun le tlanga hai a khek tuor tuor a, lung damin a'n at thi neng nung hlak a.
6. Hla taka inthoka Isu hung a hei hmu chun a kuom tieng a tlan phei a, kunin chibai a buk a.
7. Rawl inring taka khekin, "Isu, Pathien Chunghnungtak Naupa, ieng angin am mi law i tum a na? Mi soisa naw hram dingin Pathien hmingin ka ngen che" a ta.
8. Isun, "Nang ramhuoi porche, mihriem sunga inthok khan suok rawh" tia thu a pek tah leiin chuong chu a hril a nih.
9. Chun, Isun, "I hming iem a na?" tiin an don a. Ama chun, "Ka hming chu Sangrukg a nih, tam tak kan nih" a ta.
10. Chu rama inthoka anni chu hnot suok lo dingin a ngen tal a.
11. Chu tlang panga chun vok ruol tam tak an tla khawm a.
12. Ramhuoihai chun, "Vok ruol lai son mi'n fetir la, an sungah mi'n luttir rawh" tiin an ngen a.
13. Isun a phalpek a. Chuongchun, thlarau porchehai chu an hung suok a, vok sunga chun an lut a. Vok ruol chu sanghni laia tam an na, dil pang tenbarama chun an tlan thla a, dilah an tla hlum ta vong a.
14. Vok enkoltuhai chu khuo le a se vela mihai chu hril dingin an tlan a, ieng thil am a tlung ti en dingin mihai chu an hung tlan khawm a.
15. Isu kuom an hung tlung chun ramhuoi zawl Sangruk kha puon sil a, lungril pangngai puta inthung an hmu a, an ti em em a.
16. Ramhuoi zawl pa chunga thil hung tlung dan le vok ruol chanchin chu mit ngeia hmutuhai chun an lo hril a.
17. Chuongchun, a ram mihai chun Isu chu an ram suoksan dingin an ngen a.
18. Longa Isu a chuong ding lai chun ramhuoi zawl pa khan a kuoma um zing a ngen a;
19. sienkhom Isun a phal naw a, "I inah i sunghai kuomah fe la, Lalpan i ta dinga thil a thawpek che le a lunginsietzie che thu hi va hril lem rawh" a ta.
20. Ama chu a fe a, Dekapolih biela khuohaia chun Isun a ta dinga thil a thawpek ropuizie chu a tlang insampui a, mi po poin mak an ti hle a.
21. Longa ral khing tieng Isu a hung kai nawk chun mipui tam tak an hung pung khawm a.
22. Sunagoga hotu pakhat, a hming Jaira chu a hung a, Isu a hmu chun a ke bulah a bokkhup a,
23. "Ka naunu nghaklakte a thi vang vang a. Hung hram la, a chungah kut innghat la, hung har a ta, dam nawk el a tih" tiin nasa takin a ngen a.
24. Chuongchun, Isun a fepui a, mipui tam takin an zui a, an inhneng nuk nuk a.
25. Nuhmei pakhat, kum sawmpahni thi puta damnaw a um a.
26. Daktor tam tak a pan tah a, a nei po po a seng hnung khomin that tieng nekin zuol tieng a pan deu deu lem a.
27. Chu nu chun Isu chanchin a lo hriet a, a hnung tieng mipui kara chun a hung a, a puon chu a them a.
28. A lungril chun, "A puon chauh khom tawk lang, dam ka tih" a ta.
29. Chuongchun a thi put chu a hung chat a, a natna chu a dam tah ti a taksa chun a hriet nghal a.
30. Isu khomin amaa inthokin thilthawtheina a suok ti a hriet nghal a, mipui lai chun a ngha vel a, "Tu'm a na ka puon them kha?" a ta.
31. A zirtirhai chun, "Mipuiin an hneng sup sup che hi i hmu nghal a, iengtiziea a themtu che chu in don?" an ta.
32. Ama themtu chu hmu tumin a ngha vel a.
33. A chunga thil hung tlung chu hrein nuhmei chu ti le inthin pumin a hung a, a hmaah a bokkhup a, iengkim indik takin a hril ta vong a.
34. Isu chun a kuomah. "Ka naunu, i ringna i dampui a nih, thlamuong takin fe ta la, i natna chu hung dam song ta raw se" a ta.
35. Isu a la tong zing laiin Sunagog hotu Jaira ina inthoka hunghai chun, "I naunu a thi tah. Zirtirtu hi suksawl ta da'l rawh" an hung ta.
36. Isu ruok chun an thu hril chu ngaisak loin Sunagog hotupa kuoma chun, "Ti naw la, ring el rawh" a ta.
37. Peter hai, Jakob hai, Jakob unaupa Johan hai ti chauh naw chun mi dangin an zui a phal naw a.
38. Sunagog hotupa in an va tlung a, buoi mur mura an lo tap khek veng vung chu an hmu a.
39. A lut malam chun an kuomah, "Ieng dinga hienga buoia in tap khek am a na? Naupang chu a thi nawh, a in a ni lem" a ta.
40. Anni chun an nuisan a. Chuongchun, an rengin a hnot dok a, naupang nu le pa le ama zuituhai chauh chu a thuoi a, naupang zalna pindana chun an lut a.
41. Naupang kut chu a chel a, a kuomah, "Talitha, kum" a ta, chu chu "Bawinu, tho rawh" tina a nih.
42. Nuhmei naupang chu a hung tho a, a lawn ta nghal a, ama chu kum sawmpahni mi a nih. Mak an ti takmeu a.
43. Ama ruok chun an kuomah, "Tu khom hril naw ro" a ti tlat a; fak ding pe dingin a hril bok a.
←  Mark (5/16)  →