←  Mark (4/16)  →
1. Tum khat chu Galili dil kamah a'n chuktir nawk a. Mipui pung khawm chu an tam em leiin dila longa chun a chuong a, a'n thung a, mipui chu dil kam hrul khawmuola chun an um a.
2. Tekhinthu hmangin thil tam tak a'n chuktir tawl a.
3. An kuoma chun, "Ngai ro, loneitu hi bu chi the dingin a fe a;
4. a hang the chun a then lampuiah a tla a, vatehaiin an hung tlan zo a.
5. A then pielthleng, pil inphannaah a tla a, a hung mawng nghal a,
6. sienkhom hnuoi a sa naw leiin nisa a hung insang a, a em vuoi a, zung a kei naw leiin a rop a.
7. A then hling buk lai a tla a, hling chu a hung inthang a, ra nei thei loin a dip hmang a.
8. A then ruok chu pil thatna hmunah a tla a, a hung mawng a, a'n thang a, a let sawmthum dam, a let sawmruk dam le a let za damin ra a'n suo a" a ta.
9. Isun an kuomah, "Ngaithlakna dinga na nei chun ngaithla ngun raw se" a ti bok a.
10. A fala an um hnungin Sawmpahni le a thuoihruoi danghai chun tekhinthu umzie chu an indon chieng a.
11. Ama chun an kuomah, "Pathien ram thuruk chu in kuoma pek a ni a, puo tieng mi ta ding ruok chun tekhinthu vonga hril a nih.
12. En en siin hmu si nawng an ta,Ngaithla ngaithla siin hre si nawng an ta;Chuong chu ni naw sien ngha kir an ta,Ngaidam an ni ta ding bah'ti ang khan" a ta.
13. Ama bokin, "Hi tekhinthu hi in hriet thiem naw chun ieng tin am tekhinthu dang lem chu hre thiem phak hrim in ta?
14. Loneitu chi the chu thu a nih.
15. Lampuia tlahai chu hieng ang hi an nih: thu an ngaithlak a, sienkhom Setan a hung nghal a, annia thu thea um chu a lakpek nawk nghal hlak.
16. Chuong ang bokin pielthleng chunga the chu hieng ang hi a nih: thu chu an hriet a, lawm takin an pom nghal a,
17. sienkhom anniah zung a kei naw a, sawt naw te chauh a dai a, chu hnung chun thu leia rinumna amanih suknomnatna amanih a hung um pha an tlu nghal hlak a nih.
18. Hling buk laia the khom hieng mihai ang hi an nih: thu chu an hriet a,
19. sienkhom damsung thil lungkhamna hai, hausak thlakhlana hai le thil dang chaknahai chu an hung lut a, thu chu an dip hmang a, ra loin a um hlak a nih.
20. Hnuoi thaa the ruok chu, thu chu hre a, pom a, a let sawmthum dam, a let sawmruk dam le a let za dama rahai hi an nih" a ta.
21. Ama bokin an kuomah, "Khawnvar chu leikhawra khup khum dingin amanih, khum hnuoia sie dingin amanih in sit hlak am a ni? A sienaa sie ding a ni lem naw maw?
22. Puong lo dinga ip ieng khom a um naw a, inlang lo dinga thup ieng khom a um bok nawh.
23. Ngaithlakna dinga na nei chun ngaithla ngun raw se" a ta.
24. Chun, ama bokin, "In thil ngaithlak chu ngun takin ngaituo ro; in inkhina hmang ngei chun inkhipek an ti cheu a, bel sa lem hman an tih.
25. A nei chu pek belsa ning an ta, a nei naw chu an nei sun khom lapek an tih" a ta.
26. A hril pei a. "Pathien ram chu miin a loa thlai chi a the ang hi a nih.
27. Zanah a in a, sunah a tho a, a hriet naw karin chi chu toin sun le zanin a'n thang zing a nih.
28. Hnuoi chun amain ra a hung insuotir hlak a, a hmasa takin a kung, a dotah a vui, chu zoah a vuia bu mal kim chu.
29. A ra chu a hung hmin a, bu sik a hun tak leiin kawiten a at hlak a nih" a ta.
30. Chuongchun, a hril pei a. "Pathien ram chu ieng le'm hrilkhiin, ieng tekhinthu am hmangin hrilfie tang ei ta?
31. Antam mu, chi ei the hlak po po laia chin tak ang hi a nih.
32. An hang the chun thlai dang po po neka lienin a hung inthang a, lien takin a hung inzar a, chungleng vatehaiin a buk chu riebukah an hmang hlak" a ta.
33. Chuong ang tekhinthu hmang chun an hriet thiem thei zawng dingin thu chu an kuomah a hril hlak a;
34. tekhinthu naw chun an kuomah thu a hril ngai nawh. Ama zirtirhai kuoma ruok chu fienrielah iengkim a hrilfie hlak.
35. Chu ni zan tieng chun a zirtirhai kuomah, "Ral khing tieng son kai ei tiu" a ta.
36. Mipuihai chu an maksan a, a chuongna long ma chun ama chu an fepui a, long dang khom an thang ve a.
37. Chun, thlipui na takin a hung hrang a, tuifawn chu longah a hung invor lut a, long chu a pil vang vang el tah a.
38. Ama chu long mei tieng lukham khamin a lo in a. A zirtirhai chun an kei thoa, "Zirtirtu, kan bohmang el ding hi poi i ti naw maw?" an ta.
39. Ama chu a hung tho a, thli chu a hal a; tuifawn kuoma khom chun, "To la, um tok tok rawh" a ta. Thli chu a ma a, a hung re ta thup el a.
40. A zirtirhai kuoma chun, "Ieng dinga chuong lawma in ti am a na? Ringna hrim in nei naw maw?" a ta.
41. Ti em emin, "Hi pa hi tu'm an ta le, thli le tuifawn chenin a thu an awi el hi?" an inti tuo a.
←  Mark (4/16)  →