←  Mark (3/16)  →
1. Chun, Sunagogah a lut nawk a, chu taka chun mi pakhat kut zeng a lo um a.
2. An hek theina dingin Sabat niin zeng chu a sukdam ding le ding naw an enthlak a.
3. Kut zeng kuoma chun Isun, "Mipui hmaa hin hung ngir raw leh" a ta.
4. An kuoma chun, "Sabat ni hin sukthat am suksiet, sukdam am sukhlum a thieng?" tiin a'n don a, sienkhom an to chip a.
5. An lungril ngarzie a hmuin poi a ti hle a, lungsen taka anni rawi chu a mel kuol hnungin zeng kuoma chun, "I kut phar suok rawh" a ta, a hei phar suok chun a dam ta nghal a.
6. Chuongchun, Farisaihai chu an suok a, Isu an sukhlum thei dan ding phierin Heroda pawlhai le chun an inrawn khawm tah nghal a.
7. Isu chu a zirtirhai leh dil kam tieng an fe a, Galili rama inthoka hung mipui tam takin an zui a.
8. A thilthaw ropuizie an hrietin Judai ram dam, Jerusalem dam, Idumia ram dam, Jordan rala inthok dam le Sidon le Tura le an se vel khaw hrang hranga inthok damin mi tam tak an hung bok a.
9. Mipui an tam si a, an hung hneng chep taluo pal thutah tiin a chuongna ding long lo buotsai lawk dingin a zirtirhai chu a hril a.
10. Mi tam tak a sukdam ta leiin natna nei taphot chun ama them tumin an baw huoi huoi el si a.
11. Thlarau tirdakumhai khomin ama an hmu pha bokkhupin, "Nang Pathien Naupa chu i nih" tiin an khek hlak a.
12. Sienkhom, ama ruok chun a nina tak chu puong lo dingin a khap tlat tawl a.
13. Isu chu tlangah a fe a, a mi ditzawnghai po chu a ko a, a kuomah an hung a.
14. A kuomah um a, a thu hrila a tir suok ding,
15. ramhuoi khom hnot suok thei mi sawmpahnih, 'tirko' tia a kohai chu a ruot a.
16. Sawmpahni a ruothai chu Simon (Peter an ti bok) hai,
17. Zebedai nau Jakob le a unau Johan, 'Bonergia' (Vaninrum nau) an ti hai,
18. Andri hai, Filip hai, Bartholomai hai, Mathai hai, Thoma hai, Alfai naupa Jakob hai, Thadaid hai, Kanan mi Simon hai,
19. a'n mantirtu Juda Iskariot hai chu an nih.
20. Chun, Isu chu inah a lut a, mipui an hung pung khawm nawk a, a zirtirhai leh bu fakna hun takngiel khom an nei hlei thei naw a.
21. A sunghaiin chu chu an hrietin, "A thluok a buoi an ta chu!" an ta, ama thuoi dingin an hung inthok a.
22. Jerusalema inthoka hung thla Dan zirtirtuhai khom chun, "Belzebub a zawl a ni hi. Ramhuoi lal leiin annawm ramhuoihai a hnot suok hlak" an ti bok a.
23. Anni chu Isun a ko a, tekhinthu hmangin an kuomah, "Setanin Setan bok iengtin am hnot suok thei a ta?
24. Ram khom ama le ama indo chu a ngir thei nawh.
25. Mani le mani indo sungkuo khom an ngir suok thei bok nawh.
26. Setan khom ama le ama inkhinga a'n do si chun ngir thei naw ni a, bohmang lem a tih.
27. Mi hrat chu an khuop de hmasa zet naw chun a inah hlukhumin a sum an lakpek el thei nawh, an khuop de hnung ruok chun rok thei tang an tih.
28. Thu dik ka hril cheu hi, mihai suolna po po le Pathien an hrilsietna po po chu ngaidam ning a ta,
29. Thlarau Thienghlim hrilsetu ruok chu ngaidam ni ngai naw nih, a thilthaw chu chatuona thiem naw changna suol a ni si a" a ta.
30. "Thlarau tirdakum a zawl a nih" an ti lei khan chu chu a hril a nih.
31. Isu nu le a unauhai chu an hung tlung a, tuolah an ngir a, ama ko dingin mi an tir a.
32. A bula mipui thunghai chun a kuomah, "En ta, tuola son i nu le i unauhaiin an zong che" an ta.
33. Ama chun, "Ka nu le ka unauhai chu tuhai am an na?" a ta.
34. A bula thunghai chu a hang en vel a, "En ta u, ka nu le ka unauhai hi.
35. Tu khom Pathien ditzawng thawtu chu, chu ngei chu ka unauhai, ka farnuhai, ka nuhai an nih" a ta.
←  Mark (3/16)  →