←  Mark (16/16)    
1. Sabat ni a hung invoi chun Mari Magdalin hai, Jakob nu Mari hai le Salomi hai chun Isu ruonga nal ding hriek rimtui an inchawk a.
2. Pathienni tuk inhma tak, ni suok hlimin thlanah an va fe a.
3. "Thlankhar tuin am mi'n hlum sonpek a ta?" an ta.
4. An hang en ruok chun thlankhar lung lien tak el chu inhlum son sain an hmu a.
5. Thlana chun an lut a, tlangval pakhat puon var sil, chang tienga inthung an hmu a, an ti hle a.
6. Ama chun, "Ti naw ro. Nazaret Isu, an hemde tah kha in zong a ni awm a, a tho nawk tah a, hi taka hin a um ta nawh; en ta u, a zalna chu hi hi a nih.
7. Nisienlakhom fe unla, a zirtirhai le Peter kuomah, 'A hril cheu ang ngei khan Galiliah a lo fe hmasa ding a na, chu taka chun hmung in tih' tiin va hril ro" a ta.
8. Anni chu ti le maktia inthin hawpin, thlana inthok chun an tlan suok a, an ti luotin tu kuoma khom ieng khom an hril nawh.
9. [Pathienni tuk inhma taka a thonawk chun a sunga inthoka khawhri pasari a hnot suokpek Mari Magdalin kuomah a'n lar hmasa tak a.
10. Ama chu Isu ruolhai kuomah a fe a, mithi pur doa an tap lai chun a va hril a.
11. A hring nawk thu le hmu khom a hmu ngei thu a hril chu hre hai sienkhom an awi chuong nawh.
12. Chu hnung chun anni laia mi pahnih, thingtlang khuo tieng pana an fe laiin hmel danglam putin an kuomah a'n lar a.
13. Anni khom chun an ruol danghai chu an hung hril ngei a, sienkhom an lo awi chuong bik nawh.
14. Chu hnung chun zirtir sawmpakhathaiin bu an fak lai an kuomah a hung inlar a, an ringna tlawm lei le a tho nawk hmutuhai thu an awi nuom tlat nawna thuah a kawk tawl a.
15. An kuomah, "Khawvel po poah fe unla, thilsiem po po kuomah Chanchin Tha hril ro.
16. Tu khom ring a, baptisma chang chu sandam ning an ta, tu khom a ring naw chun thiem naw chang an tih.
17. Hieng inchikna thilmakhai hin a ringtuhai chu zui pei a tih: Ka hmingin ramhuoihai hnot suok an ta; tong tharin tong an ta;
18. kutin rul man an ta; thina tur dawn hai sien khom ieng khom ti naw ni hai; damnawhai chungah kut innghat an ta, hung dam pei an tih" a ta.
19. An kuoma thu a hril zo chun Lalpa Isu chu vana thuoi tungin a um a, Pathien chang tieng a hang inthung tah a.
20. Zirtirhai khom chu thu chu hrilin ram tinah an fe suok a, Lalpan anni chu a thawpui a, an thu khom a zuitu inchikna thilmakhaiin a suknghet pei a. Amen.]
←  Mark (16/16)