Mark (14/16)  

1. Chun, ni hni hnungah Fekan Kut le Cholthanglo Bei Kut a um ding a na, thiempu lalhai le Dan zirtirtuhai chun Isu chu zawra man ding le sukhlum dingin an zong a.
2. "Kut lai chu ni naw sien, chuong naw chun vantlang lai buoina suok hlauh rawi a tih" an ta.
3. Bethani khuoa phar pakhat Simon an ti inah dawkana Isun thlaithleng a ot laiin alabasta bura nard hriek rimtui hlir hlak, to tak el chawiin nuhmei pakhat a hung a, a bur chu a tetkoi a, a luah a buok khum a.
4. Chu taka mi thenkhat chun an ngai thei naw a, "Ieng dinga hriek rimtui hi a sukral mei mei am a na?
5. Hi hriek hi puitling kum khat hlawx neka tam hiela zor a, mi retheihai kuoma pek lem awm annawm" an ta, chu nu chu na takin an hal a.
6. Isu ruok chun, "Tosan ro. Ieng dinga in sukbuoi am a na? Ka chungah thil ditum tak a thaw a ni hi.
7. Mi retheihai chu nangni lai an um zing a, in nuom hun hunah in somdawl thei annawm; kei ruok chu nangni lai um zing naw ning.
8. A thaw thei ang ang chu thawin, ka taksa hi phum dingin hriek a lo nal lawk a ni hi.
9. Thu dik ka hril cheu hi, khawvel pumpuia Chanchin Tha an hrilna taphotah, hi nu thilthaw hi ama hriet zingna dingin hril ve pei an tih" a ta.
10. Chun, Sawmpahnihai laia mi pakhat, Juda Iskariot chu Isu inmantir tumin thiempu lalhai kuomah a fe a.
11. Chu thu an lo hriet chun an lawm hle a, sum khom pek an tiem a. Chuongchun, an mantir dan remchang a zong tah a.
12. Cholthanglo Bei Kut ni hmasa tak, Fekan Kut beramte an that hlak nia chun a zirtirhaiin Isu kuomah, "Fekan Kut ruoi i kil theina dingin khawlai am buotsai inlang i nuom a?" tiin an indon a.
13. Chuongchun, zirtirhai laia mi pahni a tir a, an kuomah, "Khawpuiah va lut unla, bela tui chawi pa pakhat intuokpui in ta, ama chu zui ro.
14. A lutna in neitu kuoma chun, 'Zirtirtuin, ka zirtirhai le Fekan Kut ruoi kan kilna ding pindan chu a khaw hi'm a na? a tih' va ti ro.
15. Ama ngei chun pindan chunghnung lien tak, hmangruo iengkim, inpei sa diem umna chu inentir a ti cheu a, chu taka chun ei ta dingin ruoi va buotsai ro" a ta.
16. Chuongchun, zirtirhai chu an suok a, khawpuia chun an fe a, an kuoma a hril ang ngei khan an va hmu a, Fekan Kut ruoi chu an buotsai tah a.
17. Zan tieng a hung ni chun Isu chu zirtir sawmpahnihai leh a hung tlung a.
18. Thlaithleng an kil lai chun Isun, "Thu dik ka hril cheu hi, nangni laia pakhat, mi kilpuitu ngei hin mi'n mantir a tih" a ta.
19. An lungzing ta hle a, a mal malin a kuomah, "Kei chu ni awm lo tak maw?" an ti seng a.
20. Ama chun, "Sawmpahnihai laia pakhat, kei le thlengkuma bei inchietuy chu ning a tih.
21. Mihriem Naupa chu a chungthu hrila a um tah angin a fe ngei ding a nih. Nisienlakhom, Mihriem Naupa inmantirtu mihriem chung chu a rik ie. Chu mihriem chu pieng naw sien a ta dingin tha lem a tih" a ta.
22. Chuonga an fak lai chun Isun bei a lak a, lawmthu a hril a, a khoi a, a zirtirhai chu a pek a, "La ro, hi hi ka taksa a nih" a ta.
23. No khom chu a lak a, lawmthu a hril zoin anni chu a pek a, an dawn seng a.
24. Ama chun an kuomah, "Hi hi ka thisen, thuthlungna,z mi tam tak ta dinga suok ding chu a nih.
25. Thu dik ka hril cheu hi, Pathien rama a thara ka dawn hun a tlung hma khat chu grep ra tui hi dawn nawk ta ngai ning" a ta.
26. Hla an sak zo chun Oliv tlang panin an suok tah a.
27. Isun an kuomah, "In rengin mi zamsan vong in tih. 'Berampu chu vuong ka ta, beramhai chu indar an tih' ti ziek a ni kha.
28. Nisienlakhom, kei thoa ka um hnungin Galili ramah lo fe hmasang ka tih" a ta.
29. Peter ruok chun, "An rengin nghatsan vong hai sienla che khom kei chun nghatsan naw top ka ti che" a ta.
30. Isun a kuomah, "Thu dik ka hril che hi, voi zan la la hin, ar voi hnih a khuong hmain nangin voi thum mi'n phat i tih" a ta.
31. Ama ruok chun rorum takin, "I thinaa chun thi ve ding ni lang khom, inphat naw top ka ti che" a ta. Mi dang khomin a ti ang chun an hung ti ve tlier tlier a.
32. Hmun pakhat, Gethsemani an ti chu an tlung a, Isun a zirtirhai kuomah, "Ka tongtai sung hi taka hin lo thung ro" a ta.
33. Peter hai, Jakob hai, Johan hai a thuoi a, nasa taka beidongin a lungzing a.
34. An kuomah, "Lungngaina thipui khop hielin ka thlarau hi a tlakbuok a nih. Hi taka hin um inla, mi mengpui zing ro" a ta.
35. Hma tieng a va fe hret a, hnuoiah a bokkhup a, thei ni sien, chu darkar chun a fe khel theina dingin a tongtai a.
36. "Abba, Pa, iengkim i thaw thei a, hi no hi mi la sonpek rawh, sienkhom keima thu ni loin nangma thu thu ni lem raw se" a ta.
37. A hung kir nawk a, anni chu inlusuin a hung hmu a. Peter kuomah, " Simon, i inlusu a ni maw? Darkar khat bek khom in mi mengpui thei naw a ni maw?
38. Thlemnaa in lut nawna dingin mengin tongtai ro. Thlarau chun a pei a, taksa ruok chu a hrat naw a nih" a ta.
39. A fe nawk a, a hril ngai hrilin a va tongtai nawk a.
40. A hung kir nawk chun an inlusu chu a hung hmu nawk a, an imu a suok em leiin hang don ngaina khom an hriet nawh.
41. A hung kir voi thumnaa chun, "Inlusuin in la chawl zing a ni maw? A hun tah. A darkar chu a hung tlung tah. En ta u, Mihriem Naupa hi mi suolhai kuta inmantir a ni ding an ta hi.
42. Tho unla, feng ei tiu. A mi'n mantirtu ding khom a hung ta saw!" a ta.
43. A hril lai zingin Juda, Sawmpahnihai laia pakhat kha a hung tlung a, ama ruol chun thiempu lalhai, Dan zirtirtuhai le upahai tir mi tam tak, kawlhnam le hmoltum chawiin an hung tlung ta rup a.
44. A'n mantirtu ding khan, "Ka fawp fawp chu ama ning a tih; man unla, ngun taka vengin thuoi hmang ro" tiin inchikna ding a lo hril sa diem tah a na.
45. A hung tlung charin Isu chu a hung pan a, "Rabbi" tiin a fawp a.
46. Isu chu an chel a, an man tah a.
47. A bula ngirhai laia pakhat chun kawlhnam a phawi a, thiempu laltak siehlaw chu a sat a, a nakawr a fikpek a.
48. Isun an kuomah, "Suomhmang man ding ang elin kawlhnam le hmoltum chawiin in hung inthok a ni maw?
49. Nangni lai tempulah ni tin ka zirtir hlak a, in mi man si nawh. Nisienlakhom, Pathien Lekha thu chu a hung tlung kim ngei ding a nih" a ta.
50. Chuongchun an rengin an tlansietsan a, an bo ta rip a.
51. Tlangval pakhat,a puon hlap chauh sil hin Isu chu a zui ve a, ama khom chu an man a,
52. sienkhom a'n tal suok a, a puon tlansanin saruokin a tlan hmang tah a.
53. Isu chu Thiempu laltak kuomah an thuoi a, thiempu lalhai, upahai le Dan zirtirtuhai chu an hung pung khawm a.
54. Peter khomin an hnung hla feah Thiempu laltak in huon sung tuollai chen a zui a; vengtu pulishai lai chun mei lum awiin a thung ve a.
55. Thiempu laltak le Sanhedrina thang po po chun Isu an sukhlum theina ding san an zong a, an hmu si naw a.
56. Mi tam takin khelin an hek a, sienkhom an hekna thuhai chu a'n mil tawl bok si nawh.
57. Chun, mi pakhat a hung ngir a, khelin a hek a,
58. "Hi tempul kuta bawl hi thiek ka ta, tempul dang, kuta bawl lo ni thum sungin indin nawk ka tih' a ta, chu chu a ti lai ngei kan hriet" a ta.
59. Chuong thila khom chun an hekna thuhai chu a la'n hmu hlei thei nawh.
60. Thiempu laltak chu a laiah a va ngir a, "Hieng an hekna zozai che hi i don thei naw a ni? " tiin Isu a'n don a.
61. Ama hlak chu a to zing a, ieng khomin a don nawh. Thiempu laltak chun, "Nang hi Krista, Hamtha Naupa chu i ni?" tiin a'n don nawk a.
62. Isu chun, "Ni e. Mihriem Naupa hi Iengkimthawthei chang tieng inthung a, van sumhai le hung la hmung in tih" a ta.
63. Chu phing leh Thiempu laltak chun a silfenhai chu a pot thler a, " Hrepuitu dang tu am ei la ngai?
64. Pathien poi a hril dan chu in hriet tah a, ieng tin am in ngai?" a ta. An rengin Isu chu sukhlum tlakah an ngai a.
65. A thenin chil an sakkhum tan a; a mit an tuompek a, kuta lokin, "Tuin am a thaw che hril thei rawh" an ta. Vengtu pulishai chun an thuoi a, an ben sok sok a.
66. In hnuoi tieng tuolzawla Peter a um lai chun thiempu laltak siehlawhai laia nuhmei pakhat a hung a,
67. Peter mei awi lai chu a hung hmu a, a hang en chieng a, "Nang khom hi Nazaret mi Isu kuoma um kha i ni hi" a ta.
68. Ama ruok chun, "I thu hril umzie chu ka hriet der nawh, a ngaina khom ka hriet nawh" tiin a'n phat a.
69. Nunghak khan a en zui a, a bula ngirhai kuoma chun, "Anni laia mi chu a ni hi tie!" a ti nawk a, ama chun a'n phat nawk a.
70. Chu hnung ela chun Peter kawla ngirhai chun, "Anni laia mi a ni ngei hi, Galili mi a ni annawm" an ta.
71. Ama ruok chun tongsephur dong huoma inkhamin, "Chu mihriem in hril chu ka hriet der nawh" a ta.
72. Chu zoah ar khuon hnina chu a hung khuong ta nghal a. Isun a kuoma, "Ar voi hni a khuong hmain nangin voi thum mi'n phat i tih" a ti thu kha Peter chun a hriet suok a, insum zo loin a tap a.

  Mark (14/16)