← Mark (11/16) → |
1. | Jerusalem an tlung tawm, Oliv tlanga Bethfage le Bethani an hung tlung ding chun a zirtirhai pahni a tir a. |
2. | "In hma zawn khuoa son va fe unla, khuo in lut charin tu la chuongna ngai lo sabengtung tuoi inthlung hmung in ta, sut unla, hung kei ro. |
3. | Tu khomin, 'Ieng dinga sabengtung tuoi kha in sut am' an ti chun, 'Lalpan a mamaw a, hung thak kir nawk vak kan tih' ti ro" a ta. |
4. | Chuongchun, an fe a, sabengtung tuoi, kotkhar bienga inthlung, tuol tieng kotthlera ngir chu an va hmu a. |
5. | An sut lai chun chu taka ngirhai chun, 'Sabengtung tuoi kha ieng dinga in sut am a na?" an ta. |
6. | Anni chun Isu hril ang tak khan an hril a, fe an phal tah a. |
7. | Sabengtung tuoi chu Isu kuomah an hung kei a, a chungah an puonhai an pha a, Isu chu a chuong a. |
8. | Mi tam takin lampuiah an puonhai an pha a, a thenin rama sawlhna an thliekhai chu an pha bok a. |
9. | A hmaa fehai le a hnung zuituhai chun,"Hosanna!Lalpa hminga hung chu,A hamtha; |
10. | Ram hung tlung ding, Ei Pa Davida ram chu,A hamtha;Chunghnung taka khinHossana"ttiin an khek a. |
11. | Isu chu Jerusalemah a lut a, tempulah a fe a. Iengkim a en vel hnung chun, khuo khom an hnu ta leiin, Bethani tieng zirtir sawmpahnihai leh an fe tah a. |
12. | A zingah Bethani an suoksan hnungin a phing a hung tam tah a. |
13. | Hla takah theichang, a hna inbuk hlup el a hmu a, a ra a um takduoiin tiin a va pan a. A tlung chun a hna chau naw chu a hmu naw a, theichang ra hun a ni naw hrim a. |
14. | Thing kuoma chun Isun, "Tuta inthok chu kumkhuoin i ra tu khomin fa ta naw raw hai se" a ta. A zirtirhai khomin a hril chu an hriet a. |
15. | Jerusalem an hung tlung chun tempul huongah a lut a, chu taka thil zortuhai le inchawtuhai chu a hnot suok a, tangka thlengtuhai dawkan le parva zortuhai inthungnahai chu a nam thluk a. |
16. | Tempul inhuonna sung chu tu khomin an thil zorhai chawia an hraw tlang a khap a. |
17. | Anni rawi chu inchuktirin, " 'Ka in chu hnam tin ta dinga tongtaina in ting an tih' ti ziek a ni naw am a ni? Nangni rawi ruok chun suomhmanghai pukah in siem ta lem a ni hi" a ta. |
18. | Thiempu lalhai le Dan zirtirtuhaiin an lo hriet chun ama sukhlum dan ding chu an zong zing a, sienkhom a zirtirna chu mipui po poin an ngaisang leiin ama chu an ti si a. |
19. | Zan tieng a hung ni chun Isu le a zirtirhai chu khawpuia inthokin an suok a. |
20. | Zing tieng an fe malamin theichang kung kha a zung chenin a them tah ti an hmu a. |
21. | Peter chun a hriet suok a, a kuomah, "Rabi, en ta, tongsie i'n phur theichang kha a lo them zo tah" a ta. |
22. | Isun a don a, "Pathienah ringna innghat ro. |
23. | Thu dik ka hril cheu hi, tu khomin hi tlang kuoma hin, 'Inson la, tuifinrietah indehawn rawh' ti sien, a hril ang chun hung tlung ngei a tih ti lungrila a ringhla naw chun, a ti ang chun thawpek ning a tih. |
24. | Chuleiin ka hril cheu hi, in tongtaiin in thil hni taphot chu hmu taah inngai unla, thawpek ning in tih. |
25. | Tongtai dinga in ngir huna khom tu chunga khom thu poi in nei chun ngaidam hmasa zet ro, vana in Pa khomin in bawsietnahai chu a ngaidam ve theina ding cheuin. |
26. | In ngaidam naw ruok chun vana in Pa khomin in suolhai ngaidam bik naw ni cheu." a ta.u |
27. | Jerusalem an hung tlung nawk a, tempul a fang vel laiin thiempu lalhai, Dan zirtirtuhai le upahai chu a kuomah an hung a. |
28. | Ieng thuneinain am hieng thil hi i thaw? Tuin am thu a pek che a?" tiin an indon a. |
29. | Isun, " Zawna pakhat hang indon veng ka ti cheu; mi don inla, kei khomin tu thuin am hieng thil hi ka thaw ti hril ka ti cheu. |
30. | Johan baptisma kha vana mi thu a ni, an naw leh mihriem thu? Chu chu mi don ro leh" a ta. |
31. | Anni rawi chu an inrawn khawm a, "Vana mi thu ei ti chun 'Ieng dinga a thu in awi naw?' a mi ti ding a ni si a; |
32. | mihriem thu ei ti el dim a nih?" an inti a. Mi po poin Johan chu zawlnei ni ngeiah an pom tlat leiin mipui chu an ti bok si a. |
33. | Chuongchun, "Kan hriet nawh" tiin Isu chu an don a. Isu khom chun, "Kei khomin tu thuin am hieng thil hi ka thaw ti hril bik naw ning cheu" a ta. |
← Mark (11/16) → |