Mark (10/16)  

1. Chu taka inthok chun Isu a suok a, Jordan vadung kaiin Judai ramah a fe a, mipuiin an lo bawr luoi luoi a; chuongchun, a thaw dan pangngaiin a zirtir tawl a.
2. Farisai thenkhat a kuomah an hung a, ama fiena dingin, "Pasalin a nuhmei a mak a thieng am?" tiin an indon a.
3. Ama chun, "Mosien ieng thu am a pek cheu?" a ta.
4. Anni chun, "Mosie chun inmakna lekha zieka mak a phal" an ta.
5. Isu ruok chun, "In lungril ngar leiin Mosien hi dan hi a ziekpek cheu a nih.
6. Amiruokchu, thilsiem intan tira inthokin Pathienin anni chu pasal le nuhmeiah a siem a.
7. Chu lei tak chun pasalin a nu le pa maksan a ta, a nuhmei leh inkop an ta,r
8. an pahni chun pum khats ni tang an tih. Pahni an ni ta naw a, kop khat an lo ni ta lem a nih.
9. Pathienin a zom tah chu mihriemin the naw raw se" a ta.
10. Inah a zirtirhaiin chu thu bok chu an indon nawk a.
11. Ama chun, "Tu khomin a nuhmei thea mi dang a nei chun a nuhmei a uiresan a nih;
12. nuhmei khomin a pasal the a, mi dang a nei chun a uire a nih" a ta.
13. A them dingin naupangte ruol an hung thuoi a, a zirtirhaiin an lo hal a.
14. Isun chu chu a hmuin a lung a khei a, an kuomah, "Naupanghai kha ka kuomah inhungtir unla, khap naw ro, Pathien ram chu hieng ang mihai ta hi a ni si a.
15. Thu dik ka hril cheu hi, naupang anga Pathien ram lawm naw taphot chu a sungah lut naw top an tih" a ta.
16. Anni chu a pom a, mal a sawm tawl a.
17. Chu taka inthoka Isu an thok suok lai chun mi pakhat a hung tlan a, a hmaah a dingthathuon a, "Zirtirtu Tha, chatuon hringna ka nei theina dingin iem thawng ka ta?" tiin an don a.
18. Isun a kuomah, "Ieng dinga Tha i mi ti? Tu khom tha an um nawh, Pathien chau naw chu.
19. Dan thupekhai chu i hriet annawm: tuol that naw, uire naw, inru naw, khelin mi hek naw, hlepru naw, i nu le pa chawimawi rawh, tihai hi." a ta.
20. Ama chun, "Zirtirtu, chuong po po chu ka tleirawl tira inthokin ka zawm hlak" a ta.
21. Isun ama chu chieng takin a en a, a ngaina ta hle a, a kuomah, " Kong khat i la bak ie. Fe la, i nei po po va zor la, pasiehai pe rawh, chuongchun vanah ro nei i tih. Chu zoah hung la, mi zui rawh" a ta.
22. Chu zet chun a hmel a hung ngui a, beidong takin a fe hmang a, mi hausa tak a ni si a.
23. Isu chu a ngha vel a, a zirtirhai kuomah, "Mi hausa ta dingin Pathien rama lut a va'n tak awm de!" a ta.
24. Zirtirhai chun a thu hril chu mak an ti hle a. Isun a hril pei a, "Nauhai, Pathien rama lut chu a harsa reng annawm!
25. Pathien rama mi hausa an lut nekin thim naa sanghawngsei a lut thleng ol lem a tih" a ta.
26. A zirtirhai chun mak an tizuol a, "Chuong a ni chun tu am sandam ni thei an ta?" an ti sap sap a.
27. Isun anni chu a en a, "Chu chu mihriem ta ding chun thaw thei ruol a ni naw hrim a nih, Pathien ta ding ruok chun a ni nawh; Pathien ta dingin iengkim thaw thei a nih" a ta.
28. Peter chun a kuomah, "Ngai ta, keini hlakin iengkim maksanin kan zui ta si che a!" a ta.
29. Isun, "Thu dik tak ka hril cheu hi, tu khom keima lei le Chanchin Tha leia in le lo dam, unauhai dam, farnuhai dam, nu dam, pa dam, nauhai dam maksan chun,
30. tuta dam sung la la hin in le lo hai, unau hai, farnu hai, nu le pa hai le nauhai a let za hmu ngei an tih, sukdudana hai le hun la hung tlung dinga chatuon hringna leh.
31. Nisienlakhom, mi tam tak a hmasa taka umhai chu a nuhnung tak la ning an ta, a nuhnung taka um khom a hmasa tak la ning an tih" a ta.
32. Jerusalem an pan tung lai chun Isun hma a thuoi a, a zirtirhai chun mak an ti hle a, a zuituhai chu an zam hle bok a. Sawmpahnihai chu Isun a ko bing a, a chunga thil hung tlung ding po po chu a hril tawl a.
33. "Ngai ta u, Jerusalemah ei hang fe nawk ding a nih. Mihriem Naupa hi thiempu lalhai le Dan zirtirtuhai kuta inmantirin a um ding a nih. Anni chun thi dingin a chungthu rel an ta, Jentelhai kutah pe suok an tih.
34. Ama chu nuizatburah hmang an ta, chil sakkhum an ta, vuong an ta, sukhlum an tih; nisienlakhom ni thum niah tho nawk a tih" a ta.
35. Zebedai naupa Jakob le Johan chun ama chu an hung hnai a, "Zirtirtu, kan hni taphot che chu i mi thawpek kan nuom" an ta.
36. Ama chun, "Iem thawpek lang cheu in nuom a?" a ta.
37. Anni chun, "I ropuinaa chun i chang tieng pakhat, i voi tieng pakhat mi'n thungtir rawh" an ta.
38. Isu ruok chun, "In thil hni hi in hriet naw a nih. Ka no dawn ding chu in dawn ve thei dim a ni? Baptisma ka chang ding khom in chang ve thei dim a ni?" a ta.
39. Anni chun, "Thei kan tih" an ta. Isun, "Ka no dawn ding chu dawn in ta, baptisma ka chang ding khom chang veng in tih.
40. Nisienlakhom ka chang tieng amanih voi tieng amania inthungtir chu ka thu a ni naw a, an buotsaipekhai ta ding chauh a ni lem" a ta.
41. Zirtir dang sawmhaiin chu chu an lo hrietin Jakob le Johan chungah an lungni naw hle a.
42. An reng chun Isun a ko khawm a, "Jentelhai chunga roreltua ruothai chu an chungah an insuklal em em hlak a, an mi lienhai khomin an chungah thu an nei hle hlak.
43. Nangni lai ruok chu chuong ang chu a ni ve ding a ni nawh. Chu nek hmanin, tu khom nangni laia a ropui tak ni nuom chu in rongbawltuah a um ding a nih.
44. Nangni laia a hmasa tak ni nuom khom mi po po siehlawah a um bok ding a nih.
45. Mihriem Naupa meuh khom a rong bawlpeka um dingin a hung naw a, rongbawl ding le mi tam tak intlannaa a hringna pe dingin a hung lem a nih" a ta.
46. Jeriko an hung tlung a, Isu chu a zirtirhai le mipui tam tak leh Jerikoa inthok chun an suok a, Timai naupa, mitdel Bartimai chu lam sirah kutdawin a lo inthung a.
47. Nazaret Isu a nih ti a hriet chun, "Isu, Davida naupa, mi lunginsiet rawh" tiin a khek a.
48. Mi tam takin an hal a, to dinga an hril khomin a hma neka inringin, "Davida Naupa, mi lunginsiet rawh" tiin a khek zuol sau a.
49. Isu chu a ngir a, "Hung ko ta u" a ta. Mitdel chu an hung ko a, "Ngai sukngam la, tho rawh, a ko che" an ta.
50. A puon chu a the thlak a, an chawm tho a, Isu kuom tieng a pan a.
51. "Iem thawpek lang che i nuom a?" tiin Isun an don a. Ama chun, "Rabbi, hmu thei ka nuom" a ta.
52. Isu chun, "Fe ta rawh, i ringna i dampui a nih" a ta. Khuo a hmu thei ta nghal a, lampuia chun Isu a zui ve ta a.

  Mark (10/16)