Mark (1/16)  →
1. Pathien Naupaa Isu Krista Chanchin Tha intanna chu,
2. Zawlnei Isai lekhabua,"Ngai ta, ka tirko i hmaah tir ka ta,Ama chun i lampui buotsai a tih.
3. Thlalera mi khek rawl chun,Lalpa lamlien ding siel unla,Lampui tlun siempek ro"tia a ziek ang khan,
4. Baptistu Johan chu a hung a, suol ngaidamna thu hrilin, simna baptisma a'n changtir a.
5. Judai ram kil tina mi le Jerusalema mi po po chun an hung pan a, an suolhai an inpuong a, Jordan vadungah a lo baptis tawl a.
6. Johan chun sanghawngsei hmula siem zakuo a hak a, savun kawngchun a chun a, a bu chu khauthikthi le ram khuoizu a nih.
7. Ama chun, 'Kei neka ropui lem ka hnungah a hung a, kei hi chu kuna a pheikhok hrui sut tlak khom ka ni nawh.
8. Kei chun tuiin ka baptis cheu a, ama ruok chun Thlarau Thienghlimin a baptis ding cheu a nih" tiin a hril a.
9. Chuong hun lai chun Galili ram Nazareta inthokin Isu a hung a, Jordan vadungah Johanin ama chu a lo baptis a.
10. Tuia inthoka Isu a hung suok charin van inhonga inthokin vathu anga Thlarau hung tum a hmu a, vana inthok chun rawl a hung suok a,
11. "Nang hi ka Naupa, ka Dittak chu i nih, i chungah ka lawm em em a nih" a hung ta.
12. Thlarauin ama chu thlalerah a tir suok nghal a,
13. chu taka chun ni sawmli zet Setanin a thlem a, ramsahai lai a khawsa a, vantirkohaiin a rong an bawlpek a.
14. Lung inah Johan an khum hnungin Isu chu Galili ramah a fe a, Pathien Chanchin Tha hrilin,
15. "Hun chu a hung tlung tah. Pathien ram khom a hnai tah. Sim unla, Chanchin Tha hi ring ro" a ta.
16. Galili dil kama Isu a fe lai chun dila Simon le a unaupa Andri len deng lai chu a va hmu a, nga mantu an ni hrim a.
17. Isun an kuomah, "Hung unla mi zui ro, mihriem mantuah siem ka ti cheu" a ta.
18. Chuongchun, an lenhai maksanin an zui ta nghal a.
19. Chu taka inthoka hnai tea chun Jebedai naupa Jakob le a unau Johan a hmu a, an longah chuongin an lenhai an lo siem tha a.
20. Anni khom chu a ko nghal a, an pa Zebedai le inhlawfa an mi sorhai chu longah maksanin an zui ve tah a.
21. Kapernaumah an fe a, Sabat ni chun Sunagogah Isu a lut a, a zirtir tan nghal a.
22. Dan zirtirtuhai ang ni loa thu nei taka a zirtir lei chun mak an ti hle a.
23. Sunagoga chun thlarau tirdakum pai mi pakhat a lo um ve a,
24. "Nazaret Isu, iem a na kan chunga thaw i tum? Mi sukse dinga hung i ni? Tu am i nih ti ka hriet-Pathien Mi thienghlim chu i nih" tiin a khek suok ta phut a.
25. Isun, "To la, a sunga inthok khan hung suok rawh" tiin a hal a.
26. Ramhuoi tirdakum chun a soisak hrep a, inring taka hrangin a sunga inthokin a hung suok a.
27. An rengin, "Hi hi ieng thil am an ta leh? Zirtirna thar, thuneina le inkop a ni hi tie! Thlarau tirdakumhai khom thu a pek a, an awi el hi" tiin mak an ti thu an inhril tuo a.
28. Galili ram hmun tinah a chanchin chu a'n thang tan ta nghal a.
29. Sunagoga inthoka an suok chun Jakob le Johan hai leh Simon le Andri hai in tieng chu an pan nghal a.
30. Simon tarpi chu khawsikin a lo zal a, a damnaw thu chu Isu an hril a.
31. Ama chun a va pan a, a kut a chel a, a kei tho a, a khawsik chu a re tah nghal a, an rong a bawlpek a.
32. Chu zan tieng, nisa tlak hnung chun damnaw tinreng, ramhuoi man dam chenin, a kuomah an hung thuoi a.
33. A khaw nawtin kotkhar bula chun an hung khawm a.
34. Chuongchun, natna chi hrang hranga na mi tam tak chu Isun a sukdam a, ramhuoi tam tak a hnot suok bok a, an tong ding ruok chu a khappek a, ama chu tu am a nih ti an hriet si leiin.
35. Isu chu zing khaw var hmain a tho a, a suok a, hmun fienrielah a fe a, chu taka chun a va tongtai a.
36. Simon le a ruolhai chun an zong a.
37. An va hmu chun, "Mi po poin an zong che" an ta.
38. Isu chun, "Hmun dang, a khaw se vela khom feng ei tiu, chu hmuna hai khom chun thu ka hril theina dingin, chu chu ka hung san a ni si a" a ta.
39. Chuongchun, Galili ram po poa an Sunagoga hai chun lutin thu a hril pei a, ramhuoihai a hnot suok a.
40. Chun, a kuomah phar a hung a, a hmaah dingthathuonin, "I nuom chun i mi sukthieng thei" tiin sukdam a ngen a.
41. Isun ama chu a lunginsiet �m em a, a hei ban a, a them a, "Nuom e, lo inthieng ta rawh" a ta.
42. A phar chu a dam ta nghal a, a hung inthieng ta a.
43. Khau taka thu pein,
44. "Tu kuoma khom ieng khom hril der naw rawh; amiruokchu thiempu va'n entir la, i dam ngei ti an hrietna dingin, Mosie thupek ang khan inthienna thil va'n hlan rawh" tiin a'n fetir nghal a.
45. Ama chu a fe a, chu thu chu a hril a hril a, tlang a'n sampui ta lem a. Chu lei chun Isu chu uolau takin khuoah a lut thei ta naw a, hmun fienrielah a um ta lem a. Chuong sa khom chun hmun tina inthokin mihaiin an hung pan a.
      Mark (1/16)  →