Malachi (2/4)  

1. "Aw thiempuhai, hi zilna hi nangni ta ding a nih.
2. In ngaithlak nuom naw a, ka hming sukropui dinga lungril in siem naw chun, in chungah tongsie hung intlun ka ta, in malsawmna donghai po po khom tongsie inphur ka tih. A nih, keima mi chawimawi dinga lungril in siem naw leiin tongsie ka'n phurtir der tah cheu a nih" ti hi Iengkim LALPA thu suok a nih.
3. "Nangni leiin in thlahai chu zilhau ka tih. Inthawinaa in ran inhlan ek chu in hmaiah tat pher ka ta, chu pum chun lak hmangin um in tih.
4. Levi kuoma ka thuthlung chu a ngir zing theina dingin ka zilhau cheu a nih ti hi chu pha chun la hrieng in tih" ti hi Iengkim LALPA thu suok a nih.
5. "Ka thuthlung, hringna le thlamuongna thuthlung chu Levi kuomah ka pek a, chu chun inza a phur leiin a mi'n za hrim a, ka hming nasa taka inzain a mi ti a.
6. A bauin zirtirna indik a sak suok a, a hmura inthokin thu indik lo a suok ngai nawh. Ringum tak le ngil takin a mi zui a, mi tam tak chu an suolnaa inthokin a'n lamlettir a.
7. Thiempu hmur chun hrietna a pai ding a na, a baua inthokin mihaiin zirtirna thucha an zong hlak ding a nih, ama chu Iengkim LALPA tirko a ni si a.
8. Nangni ruok chu lampuia inthokin in pet hmang a, in zirtirna chun mi tam tak in insuithluktir a, Levi le ka thuthlung siem chu in bawsiet a nih" ti hi Iengkim LALPA thu suok a nih.
9. "Ka lampuihai in hraw naw lei le dan thilah thlei bik in nei leiin mi po po hmaah hmusit le endongah ka siem cheu a nih" tiin.
10. Ei rengin Pa pakhat chauh ei intlang a ni naw am a ni? Pathien pakhat siem vong ei ni naw am a ni? Ieng leia pi le puhai thuthlung sukporche a, unau le unau ei inhlem hlak am a na?
11. Juda chu a depde leiin Israel ram le Jerusalemah thil tirdakum a thaw a, ram dang milem pathien betu chu nuhmeiin a nei a, LALPA hmangai hmun thienghlim chu a sukporche ta si a.
12. Hieng thil thawtu chu tu khom ni sien, Iengkim LALPA kuoma thilhlan hung chawitu khom ni sien, ama chu Jakob sungkuoa inthokin LALPAN sat thla raw se.
13. "In thilthaw dang pakhat chu LALPA maicham mitthlia in infar khum hi a nih. A ngaithlak ta naw cheu lei le kuta thilhlan in hung chawihai chu a pom ta naw leiin in tap khek a.
14. Nangni chun "Ieng leia a pom naw ning a ta?" dam in la ti ta deu deu a! A san chu, LALPA hrietpuia i vanglai nuhmei chu ringum taka inkoppui tlat dinga thu tiem siin i thuthlungna, i nuhmei lakah i ringum si nawh.
15. "LALPA chun anni chu pumkhatin a siem a ni naw am a ni? Taksa le thlarauah a ta an nih. Ieng leia pumkhata a siem am a na? Pathien ngaisak mi chi thlatu ding a zong lei a nih. Chuleiin, in nun vong tha unla, in vanglai nuhmei lakah depde naw ro.
16. LALPA Israel Pathien chun, "Inmak hi ka theida takmeuh a nih. Nuhmeihai rawng taka soisak khom ka theida a nih. Chuleiin, in nun vong tha unla, in nuhmei chungah ringum ro" ti hi Iengkim LALPA thu suok a nih.
17. In thuin LALPA a suksawl zozai tah. Sienkhom nangni chun, "Iengtin am kan suksawl hrim hrim a?" in tih. "A mithmua thil suol thawtu taphot chungah LALPA a lawm" ti amanih, "Khaw lai am indik taka roreltu Pathien chu a um a?" ti amanih in hril vet hi a ngai nghok a nih.

  Malachi (2/4)