Malachi (1/4)  

1. Zawlnei Malaki hmanga Israelhai chungthua LALPA thu puong chu:
2. LALPA chun, " 'Ka hmangai cheu a nih' a ta, nangni ruok chun, 'Ieng tik khan am i mi hmangai a?'" in ti a. "Esau kha Jakob unaupa a ni naw am a ni? Sienkhom, Jakob chu ka hmangai a,
3. Esau ruok chu ka theida a, a tlang hluo chu rausan hmunah ka siem a, a rochan chu thlalera sihalhai ka pek a ni kha" ti hi LALPA thu suok a nih.
4. Edom mihai chun, "Suksietin ei uma chu ei ram tlu se tah chu indin thar ei tiu" an ti khom a ni thei. Sienkhom, Iengkim LALPA thu suok chu hi hi a nih: "Indin tha khom ni hai sien keiin thiek nawk tho ka tih. 'Ram Rilo' ti hming put a ta, LALPA lungsenna chu an chungah fu zing a tih.
5. Chu chu in mit ngeiin la hmung in ta, 'Israel ram puo tieng khom LALPA chu a ropui ie!' la ting in tih" tiin.
6. "Naupa chun a pa a chawimawi a, siehlaw chun a pu a chawimawi. Kei hi pa ka ni chun, khaw'm a na ka phu ang chawimawina in mi pek chu? Hotu ka ni chun khaw'm a na ka phu ang inzana in mi'n entir chu? Aw thiempuhai, nangni tak tak hi in nih ka hming sukmuolphotu chu!" ti hi Iengkim LALPA thu suok a nih. "Sienkhom nangni chun, 'Iengti kongin am i hming kan sukmuolpho a?' tiin in indon hlak.
7. Ka maichamah sa porche in sie zing lai khomin, 'Iengti kongin am kan sukporche che a?' in tih. Chuonga in ti lei chun LALPA maicham chu hmusitumah in siem a nih.
8. Inthawina dinga ran mitdel in hung lak kha thil indik a ni? Ran kebai le natna nei in inhlan kha thil indik a ni? In ram optu kuomah inhlan tum hrim ta u. In chungah a lawm in ring am? A lo hlutsak cheu in ring hrim hrim a ni?" ti hi Iengkim LALPA thu suok a nih.
9. "In chungah zangai dingin Pathien chu ngen mol ro. Amiruokchu, chuong ang thilhlan in hung chawi si chun, ieng leiin am a pom ding cheu a na?" ti hi Iengkim LALPA thu suok a nih.
10. "Ka maichamah a thlawna mei in inkhuk nawna dingin tempul kot lo khartu ding mi um hai sien chu tha ding bah! In chungah lawmna hrim ka nei naw a, in kuta inthoka thilhlan ieng khom pom naw ning" ti hi Iengkim LALPA thu suok a nih.
11. "Nisa suoknaa inthoka a tlakna chenin hnam tin lai ka hming hi la ropui a tih. Hnam tin lai ka hming a ropui leiin, hmun tinah ka hmingin rimtui rawng an ta, inthawina inhlan bok an tih," ti hi Iengkim LALPA thu suok a nih.
12. "Nisienlakhom nangnin, 'LALPA maicham chu a va porche de! An thil inhlanhai khom chu inzapui a va hang um de!' in ti hin ka maicham in suktirdakum a nih.
13. Chun, 'A va hei nghokum de aw' tiin hmusit takin hnar in hnawt khum bok hlak" tiin Iengkim LALPA chun a hril. "Ran sil-ong dam, kebai dam le natna nei dam in hung inhlan hin, in kuta inthokin ka lo pom ding am a ni?" LALPA chun a tih.
14. "Mani ran ruol laia hmel hemna nei lo a chal nei zing a, chu chu inhlan dinga thu intiemkam bok sia ran hmel hem LALPA kuoma inhlan lemtu chu tongsie phurin um raw se. Kei hi lal ropui tak el ka na, ka hming hi hnam tin lai khom an ti ding a nih" ti hi Iengkim LALPA thu suok a nih.

      Malachi (1/4)