←  Luke (9/24)  →
1. Isun sawm le pahnihai chu a ko khawm a, ramhuoihai hnot suok theina le natnahai sukdam theina a pek bok a;
2. Pathien ram thu hril ding le damnawhai sukdam dingin a tir suok tah a.
3. An kuoma chun, "In inzinnaah hmol dam, mansa dam, bei dam le poisa hlek dam khom chawi naw un la, zakuo inthlakna ding khom chawi naw ro.
4. Khuo in sir taphotah in suoksan chenin in tlungna ngaiah tlung unla, chu taka inthok ngei chun suok nawk ro.
5. A lo lawm nawtu cheu chu an khuo in suoksan ding pha an thaw indik nawzie inhriettirna dingin in kephaa pilvut chu thin thla ro" a ta.
6. Chuongchun, an suok a, khaw tin an fang a, hmun tinah Chanchin Tha hrilin mihai an sukdam pei a.
7. Lal Herodan chuong thilhai chu a lo hriet ve a, a ngaina a hriet naw hle a, a san chu thenkhatin, Johan kha mithi laia inthokin a hung tho nawk tah niin an hril a;
8. a thenin Elija hung inlar nawk niin an hril bok a; a then ruok chun tien laia zawlnei tu amanih hung tho nawk nia an hril lei a nih.
9. Chuleiin Heroda chun, "Johan chu a lu ka tanpek ta kha! A chanchin hieng lawma an hril hi tum ning a ta?" a ta, ama chu hmu a tum tah a.
10. Tirko sawmpahni inzinhai chu an hung kir a, Isu kuomah an thilthawhai an ripawt a. Anni chu thuoiin Bethsaida an ti khuoa chun a fe hrangpui a.
11. Nisienlakhom, mipuiin an hrietin an zui ve tah a; anni chu a lo lawm a, Pathien ram thu lo hrilin, sukdam ngai taphot a lo sukdam a.
12. Chawhnung tieng khuo a hung inhnu chun sawm le pahnihai chu Isu kuomah an hung a, "Mipuihai hi ei kawl vel khuoa hai le loa hai tlung in le fak ding zongin infetir ta la, hmun thlalera um ei ni si a" an ta.
13. Ama ruok chun, "Nangnin fak ding pe ro" a ta. Anni chun, "Mi hieng zozai fak ding hi ei va'n chawk a ni ngot naw chun eini chun bei phek nga le nga pahni chauh ei nei a nih" an ta.
14. Patling ngot khom sangnga lai an nih. Ama chun zirtirhai kuomah, "A pawl pawlin inthungtir ro, sawmnga vel peiin" a ta.
15. Chuong ang chun an thaw a, an inthungtir vong a.
16. Bei phek nga le nga pahni chu a lak a, van tieng nghain lawmthu a hril a, a khoi a, mipuihai laia sem dingin zirtirhai chu a pek a.
17. An rengin tlai takin an fak a, an fak mahla zirtirhaiin an rut khawm chu bawm sawmpahni sip a nih.
18. Tum khat chu Isu fienriel tongtainaah a zirtirhai khom an um ve a, an kuomah " Mihaiin tu am ka nih an mi ti a?" tiin a'n don a.
19. Anni chun, "Baptistu Johan ti che an um a, a thenin Elija an ti che a, a then ruok chun tien lai zawlnei tu amanih tho nawk ni awmin an hril che" an ta.
20. Ama chun, "An leh, nangnin tum a nih in mi ti a?" a ta. Peterin, "Pathien Krista chu i nih" tiin a don a.
21. Chu chu tu khom hril lo dingin thu a pek tlat a.
22. "Mihriem Naupa hin thil tam tak a la tuor ding a nih; upa hai, thiempu lal hai le Dan zirtirtuhaiin hnawl an ta, an sukhlum ding a nih; amiruokchu, ni thum niah tho nawk a tih" a ta.
23. Chun, mi po po kuomah, "Tu khomin a mi zui ding chun mani insie hmangin,r ni tin a kraws putin mi zui raw se.
24. Tu khom mani nun hum tum chun chan a ta, tu khom keima leia nun chan chun hum a tih.
25. Miin khawvel hi a pumin nei sien, ama inhmangin amani boral si sien la, iem a tangkai a?
26. Ka thu le kei mi'n zapuitu taphot chu Mihriem Naupa khomin ropuina leh, Pa le vantirko thienghlimhai ropuina leh a hung nawk hunah ama chu inzapui veng a tih.
27. Indik takin ka hril cheu hi, hieng laia ngir thenkhat hi Pathien ram an hmu hma khat chu thi lo ding an um" a ta.
28. Chuong thu Isun a hrila inthoka ni riet vela chun Peter le Johan le Jakob hai thuoiin tongtai dingin tlangah a fe a.
29. A tongtai lai chun a hmel a hung danglam a, a silfenhai chu kawlinlep angin a hung var ta phut el a.
30. Ngai ta, Mosie le Elija hai pahni chun ropuinaa inthuomin an hung pawl a,
31. Jerusalema a thi tlingtlakna ding chungchang thu an hril a.
32. Peter le a ruolhai ruok chu an inlusu a, sienkhom an hang har chun a ropuina le a bula mi pahni ngirhai chu an hmu a.
33. Isu an maksan ding lai chun Peterin, "Hotupa, ei ta dingin hi taka um zing hi a tha, bawkte pathum khawng ei ta, i ta dingin pakhat, Mosie ta dingin pakhat, Elija ta dingin pakhat" a ta (Iem a hril ti khom a hriet mumal nawh).
34. A hril lai zing chun sum a hung zing a, anni rawi chu a hung tuom a; sumin a hung tuom chun an ti hle a.
35. Suma inthok chun rawl a hung suok a, "Hi hi ka mi thlang, ka Naupa chu a nih, ama thu hi ngai ro" a ta.
36. Rawl a hung suok hnung chun Isu chauh chu an hmu a. Chuong lai chun an thil hmu chu an topui tlat a, tu khom an hril nawh.
37. A zingah tlanga inthoka an hung thlak chun mipui tam takin an lo hmuok a.
38. Mipui laia pakhat chu a khek suok a, "Zirtirtu, ka naupa nei sun hung en hram dingin ka ngen che;
39. ramhuoiin a man rop a, a khek tuor tuor a, a chil huom tla bor bor khopin a soisak a, an thla ta mang naw leiin a sukhlum tep a ni tah.
40. I zirtirhai hnot suok dingin ka ngena chu an thaw thei si naw a" a ta.
41. Isun a don a, "Tu lai ruolthar, ringna tlasam le lungril lutinlehai, ieng chen am in kuomah la umin ka ngai thei ding cheu a na? I naupa chu hung thuoi rawh" a ta.
42. A hung thuoi laiin ramhuoi chun a her thluk a, a soisak hrep a. Ramhuoi tirdakum chu Isun a hal a, naupang chu a sukdam a, a pa kuoma chun a'n hlan a.
43. Mi po poin Pathien ropuizie chu mak an ti hle a.
44. Mi po poin a thilthawhai maktia an ngaisang em em lai chun a zirtirhai kuomah" Ka thil hril ding cheu hi fimkhur takin ngaithla ro. Mihriem Naupa hi mihriemhai kutah inmantirin a um ding a nih" a ta.
45. Nisienlakhom, a thu hril umzie chu an hriet thiem nawh. An man fuk thei nawna dingin an lakah thup a na, sienkhom ama an indon chieng ngam bok si nawh.
46. Anni lai tu am a ropui tak ding ti thuah zirtirhai chu an lo insel a.
47. Isun an thil ngaituo chu a hrietin, naupang te hi a banah a hung kei a, a bulah a'n ngirtir a, an kuomah
48. "Tu khom hi naupang hi ka hming leia lawm chu keima mi lawm a nih; kei mi lawmtu chun mi tirtu a lawm a nih; nangni laia chin tak hi a nih a ropui tak chu" a ta.
49. Chu zoah Johanin, "Zirtirtu, mi pakhatin i hmingin ramhuoihai a hnot suok kan hmu a, keini laia mi a ni ve si naw leiin khap kan lo tum a" a ta.
50. Isun an kuomah, "Khap naw ro. Tu khom a dodal nawtu cheu chu eini tienga thang an ni si a" a ta.
51. Van tienga ama thuoi hmang hun a hung hnai chun Jerusalem panin Isu chu a'n thok lui tlat a.
52. Samari khuo a sir dinga chun a ta dinga iengkim lo buotsai dingin a hmaah mi a'n tlantir a;
53. sienkhom Jerusalem pana fe pei a tum tlat leiin an lo ngaisak naw a.
54. A zirtir Jakob le Johanin chu chu an hmu ve chun "Lalpa, hienghai kang hlum vong ding hin vana inthokin Elija ang khans mei kan ko thlak i remti naw maw?" an ta.
55. Ama chu a ngha kir a, anni chu a bau khat at,
56. ukhaw dangah an fe tah a.
57. Lama an thang mek laiin mi pakhat a hung a, "I fena taphotah zui ka ti che" a ta.
58. Isun a kuomah, "Sihalhan kuo an nei a, chungleng vatehai khomin bu an nei a, Mihriem Naupa ruok hin chu lu nghatna hmun hrim a nei nawh" a ta.
59. Mi dang kuomah "Mi zui rawh" a ti ve thung a. Ama chun, "Lalpa, ka pa la va vui zet ka tih" a ta.
60. Isu ruok chun, "Mithiin anni mithi chu lo vui el raw se; nang ruok chun Pathien ram thu hi va hril dar lem rawh" a ta.
61. Mi dangin, "Lalpa zui ka ti che, amiruokchu, in tienga mihai la va chibai zet ka tih" a ta.
62. Isun a kuomah, "Tu khom leileta langkawn chel ta sia hnung tieng ngha chu Pathien rama sinthaw tlak a ni nawh" a ta.
←  Luke (9/24)  →