←  Luke (8/24)  →
1. Chu hnunga chun Isu chu khaw lien le khaw chinhai fangin Pathien ram Chanchin Tha hrilin a puong pei a, sawm le pahnihai khom an thang hlak a.
2. Nuhmei thenkhat, thlarau tirdakum pai a sukthieng hai dam, hrivoi sie a sukdam hai dam chun an zui bok a. Chuong lai chun Mari Magdalin, a sunga inthoka ramhuoi pasari a hnot suok nu dam,
3. Heroda sum enkoltu Chuza nuhmei Joanna dam, Susan dam le mi dang tam tak an thang a, anni chun mani sum le pai hmangin a rong an bawlpek a.
4. Chun, mipui tam tak, khaw hrang hranga inthoka ama pana hung fuon khawmhai kuoma chun tekhinthu a hril a.
5. "Bu chi thetu chu bu chi thein a fe a; chuonga bu chi a hang the chun a then lamah a tla a, miin an sir hmat a, chungleng vatehaiin an tlan zo a.
6. A then pielthlengah a tla a, a mawnga chu a hnawng naw leiin a rop nawk el a.
7. A then chu hling buk lai a tla a, hlo hung inthang chun a dip ral a.
8. A then ruok chu hnuoi thaah a tla a, a hung inthang lien a, a let zain a ra a" a ta. Chu chu a hril zo chun rawl inring taka khekin, "Ngaithlakna dinga na nei chun ngaithla ngun raw se" a ta.
9. A zirtirhai chun a tekhinthu hril umzie chu an indon a.
10. Ama chun, "Pathien ram thuruk chu nangni hriet dinga phal a na, mi dang kuoma ruok chu tekhinthu hmangin ka hril a nih, chuongchun, hmu zing sia an hmu fie thei nawna ding le ngaithla zing sia an hriet thiem nawna dingin.
11. "Tekhinthu umzie chu hi hi a nih: Bu chi chu Pathien thu a nih.
12. Lampuia tla chu thu ngaithlatu an na, an awi nawna ding le sandam an ni thei nawna dingin setan a hung a, an lungrila inthokin thu chu a lak hmangpek hlak.
13. Pielthleng chunga tla chu, thu an hriet chara lawm taka pomhai hi an nih; nisienlakhom zung hrim an thlak naw a, sawtnawte an hang awi dea chu, fiena an tuok pha an tluksan nawk el hlak.
14. Hlingbuk laia tla chu thu an hriet a, sienkhom damsung khawsak lungkhamna hai, hausaknahai le inhoitirna hai chun a dip a, ra puitling an insuo thei ta naw a.
15. Hnuoi thaa tla chu thu hre a, lungril indik le tha put a, vong tlat a, tuorsel taka beia ra insuohai hi an nih.
16. "Tu khom khawnvar sitin belin an khup khum ngai naw a, khum hnuoiah an sie ngai bok nawh, a lut taphotin a var an hmu theina dingin a sienaah an sie lem hlak.
17. Ieng khom puong lo dinga thup le mi hriet lo ding le suklang lo dinga thupruk a um nawh.
18. Chuleiin, in thu ngaithlak danah fimkhur hle ro. Tu khom a nei chu pe belsang an ta, a nei naw chu neia an ngai sun khom lakpek an tih" a ta.
19. Isu nu le a unauhai khom a kuomah an hung a, nisienlakhom mipui leiin an paw thei naw a.
20. "I nu le i unauhaiin hmu tum chein tuolah an nghak che" tiin an hril a.
21. Ama chun, "Pathien thu hrea zawmtuhai hi ka nu le ka unauhai an nih" tiin a lo don a.
22. Ni khat chu a zirtirhai leh longah an chuong a, Isun an kuomah "Dil ral khing tieng son kai ei tiu" a ta, an suok tah a.
23. Chuonga an fe lai chun a lo in a. Dila chun thlipui a hung hrang phut a, an long chu tuiin a chim el ding an tah leiin an ngirhmun chu a derthawng hle a.
24. Isu kuomah an fe a, an kei tho a, "Hotupa, Hotupa, ei pil el ding a ni hi!" an ta. Isu chu a tho a, thlipui le tuifawn hlup hlup chu a hal a, an chawl a, a re ta thuop el a.
25. An kuomah, "Inringna khawlai am a um?" a ta. Ti bok, makti bok chun, "Hi pa hi tu'm an leh ? Thli le tui fawn chen khom thu a pek a, an re el hi!" an inti tawl a.
26. Galili ram epa um Gerasinp mihai ramah chun an va kai a.
27. Khawmuol an kai chun chu khuoa mi ramhuoi zawl chun a hung pan a. Ama chu hun sawt tak puon khom sil ta lo le ina khom riek ta loin thlana khawsa hlak a nih.
28. Isu a hang hmu chun rawl inring takin a khek a, a hmaah a bokkhup a, "Isu, Pathien chunghnungtak Naupa, iem a na ka chungah thaw i tum reng reng? Mi soisa lul lo dingin ka ngen che" a ta.
29. Chu pa sunga inthoka suok dingin thlarau tirdakum chu Isun thu a lo pek ta si a. Chu pa chu ramhuoi chun voi tam a man ta hlak a, a kut le ke khaidieta khitin, kol dam inbuntirin an veng hlak a, sienkhom khaidiethai chu a suktan a, ramhuoi chun thlaler hmun reah a fen hmang hlak a.
30. Chun, Isun, "Tu'm i hming?" a ta. Ama chun "Sangruk"q a ta, a sunga ramhuoi lut chu an tam em lei a nih.
31. Khuorkhuruma pei thla lo dingin Isu an ngen chul a.
32. Chu tlanga chun vok ruol tam tak an tla khawm a. Chuong vok ruol sunga lut phalna pe dingin an ngen a, ama chun a phalpek a.
33. Ramhuoihai chun chu pa chu an suoksan a, vok sunga chun an lut a, vok ruol chu rawla chun an tlan liem a, dilah an tla hlum ta vong a.
34. Vok enkoltuhaiin thil hung tlung an hmuin khuoa mi le a se vela mihai chu hril dingin an tlan a.
35. Ieng thil am a tlung tah ti en dingin mihai chu an hung inthok suok a. Isu kuom an hung tlung chun ramhuoi suoksan kha puon sil a, lungril ngai puta Isu ke bula thung an hung hmu a, an ti hle a.
36. Thil chinchang hretuhai chun ramhuoi man a hung dam dan chu an lo hril tawl a.
37. Gerasin rama mi po po chu an thlabar a, ama chu an kuoma inthoka fe hmang dingin an ngen a, chuongchun longah a chuong a, a kir nawk tah a.
38. Ramhuoi suoksan ruok khan chu Isu kuoma um zing a ngen a.
39. Nisienlakhom Isun, "I in tieng inlawi la, Pathienin i ta dinga thil a thawpek che ropuizie hi va hril rawh" a ta, a'n fetir tah a. Chuongchun a fe a, khawpui sung po poa chun Isun thil a thawpek chu a tlanginsampui tah a.
40. Beisei taka lo nghaktu mipui chun Isu hung kir nawk chu an lo lawm hle a.
41. Ngai ta, mi pakhat a hming Jaira, sunagoga hotu chu a hung a, Isu ke bulah a bokkhup a,
42. a naunu nei sun kum sawm le pahni vel mi chu thi hmun suola a nat leiin a ina hung dingin a ngen a. Jaira in pana a fe lai chun a zuitu mipui chun an bawr luoi luoi a.
43. Chun, nuhmei pakhat, kum sawm le pahni thi put tah, a sum nei po po khom daktor ruoinaa seng zo tah, sienkhom tu khomin an sukdam thei naw chu a hnungah a hung a, a puon hmawr chu a hung them a,
44. a thi put chu a re ta nghal a.
45. Isun, "A mi themtu kha tum a na?" a ta. "Kei chu kan nawh" an ti seng a. Peter chun, "Hotupa, mipui an tam a, an hneng sup sup che annawm" a ta.
46. Isu chun, "Tuin amanih a mi them a, ka sunga inthokin thilthawtheina a suok ti ka hriet" a ta.
47. Nuhmei chun inthup thei ruol an ta nawh ti a hrietin, a hmaa chun inthin dor dorin a hung a, a bokkhup a, a them san le chop le chila a dam el thu chu mi po po hmaa chun a hrilh a.
48. Ama chun, "Ka naunu, i ringna i dam pha a nih, thlamuong takin fe ta rawh" a ta.
49. A la tong lai zingin Jaira ina inthokin mi pakhat a hung a, "I naunu a thi tah, zirtirtu hi sukbuoi ta da'l rawh" a hung ta.
50. Isun a lo hriet a, Jaira kuomah, "Ti naw la, ring el rawh, dam nawk a tih" a ta.
51. In an tlung chun Peter hai, Johan hai, Jakob hai le naupang nu le pa chauh naw chu tu khom ina lut ve a phal naw a.
52. An reng chun awm inchumin an lo tap rak rak a. Nisienlakhom, ama chun, "Tap naw ro, a thi nawh, a in a ni lem" a ta.
53. A thi tah ti an hriet leiin an nuisan a.
54. Isun a kut a chel a, "Bawinu, tho rawh" a ta, a ko a.
55. A thlarau chu a hung kir nawk a, a tho ta nghal a. "Fak ding iemani pe ro" a ta.
56. A nu le pa chun mak an ti em em a, nisienlakhom thil um dan chu mi dang tu khom hril lo ding a ti tlat a.
←  Luke (8/24)  →