←  Luke (7/24)  →
1. Mihai hrieta chuong thu Isun a hril zo chun Kapernaumah a lut a.
2. Chu taka chun sipai zahotu siehlaw dit tak chu thi hmun suolin a damnaw a.
3. Isu chanchin a hriet charin a siehlaw sukdam dinga ngen hram dingin Juda upahai a kuomah a tir a.
4. Upahan Isu kuom an va tlung chun, "Ama hi thawpek tlak a nih,
5. ei hnam a hmangai a, sunagog chen a mi bawlpek a nih" tiin thahnemngai takin an ngenpui a.
6. Chuongchun, Isu chu anni ruolin a fe ve a. In an tlung vang tah ti chun sipai zahotu chun Isu kuoma thu hril dingin a ruolhai a tir a: "Lalpa, harsa sakin ka ina chu hung da'l rawh, ka insunga ko lut tlak che khom ka ni naw a,
7. chuleiin i kuoma hung tlaka khom ka'n ngai naw a nih; thu pe la, ka siehlaw chu dam el a tih.
8. Kei khom mi thuhnuoia um dinga sie ka na, ka hnuoiah sipai an um nawk sawng a, 'Fe rawh' ka ti chu a fe a, 'Hung rawh' ka ti chu a hung a, ka siehlaw khom 'Hi hi thaw rawh' ka ti chu a thaw el hlak" tiin.
9. Isun chu chu a hrietin chu pa chu mak a ti hle a, a hung zuitu mipui tieng chu nghain, "Ka hril cheu hi, hieng ang lawma ringna nasa hi Israelhai lai tu khom ka hmu nawh" a ta.
10. Mi tirhai chu in tieng an kir a, an tlung chun siehlaw chu damin an hmu ta a.
11. Sawt naw te hnungah khaw pakhat Nain an tia chun Isu a fe a, a zirtirhai le mipui tam takin an zui a.
12. Khaw kul kotkhar an tlung tawm chun mithi pakhat, hmeithai nau pasal nei sun chu an hung zawn suok a, a khaw mi tam takin an zui a.
13. Chu hmeithai chu Lalpan a hang hmu chun a lunginsiet em em a, "Tap naw" a ta.
14. A va hnai a, hlang chu a chel a, a zawntuhai chu an ngir a. "Tlangval, tho rawh ka ti che" a ta.
15. Mithi chu a tho a, a hung tong suok a, a nu kuoma chun a'n hlan a.
16. Mi po po a rap a, maktiin Pathien an inpak a, "Eini lai zawlnei ropui tak a hung um tah a ni hi" an ta; chun, "Pathienin a mihai a hung kan tah a ni hi" an ti bok a.
17. Isu chanchin chu Judai ram le a se vel ram tinah a'n thang suok tah a.
18. Chuong thu po po chu Johan zirtirhai chun an pu chu an hril a.
19. Johan chun a zirtirhai pahni a ko a, Lalpa kuoma chun, "A hung ding chu i ni am, annawleh mi dang kan la nghak ding?" tia indon dingin a tir a.
20. Chuonghai chun a kuom an hung tlung chun, "Baptistu Johanin, 'A hung ding chu i ni am, annawleh mi dang kan la nghak ding?' ti indon dingin i kuomah a mi hung tir a nih" an ta.
21. Chuong lai chun hri chi hrang hrang invoi dam, natna chi tum tuma na le thlarau tirdakum pai mi tam tak chu Isun a sukdam a, mitdel tam tak mit a sukvarpek bok a.
22. Chuongchun, anni chu a don a, "Kir nawk ta unla, in thil hmu le hriethai hi Johan va hril ro; mitdelhai mit a var a, kebaihai kein an lawn a, pharhai an inthieng a, nasethai na a hung var a, mithihai keithoin an um a, pasiehai kuomah Chanchin Tha hril a ni tah.
23. Tu khom keima leia beidong lo chu an hamtha"o a ta.
24. Johan mi hung tirhai an liem hnung chun mipui kuomah Johan chungchang Isun a hril a. "Ieng en dingin am thlalera khan in hang fe? Thliin luong a mut hning maw ?
25. An naw leh ieng en dingin am in fe? Puon nem sila inchei mi maw? Ni lo e, silfen man tama incheihai le nun khawnuom tawl mihai chu lal inah an son naw an um hlak.
26. Ieng tak am en dingin in fe reng reng a? Zawlnei en dingin maw? A ni ngei tak kha; ka hril cheu hi, ama chu zawlnei neka ropui lem a nih. Ama hi annawm,
27. 'Ngai ta, ka tirko I hmaah tir ka ta,Ama chun i hma lo lawkin,I lampui ding buotsai a tih'tia a chanchin an ziek kha.
28. Ka hril cheu hi, nuhmei sula insieng laiah Johan neka ropui lem tu khom an um nawh; amiruokchu, Pathien rama mi chin tak khom ama nek chun a ropui lem" a ta.
29. Vantlang mipui le siekhontuhai chu Johan baptisma lo chang tah an ni tawl leiin, Isu thu hrilhai an hriet chun Pathien lampui chu an dik ngei a nih ti an pom nghet tah a.
30. Farisaihai le Dan zirtirtuhai ruok chun Johan baptisma chu an chang nuom ve si nawh, anni ta dinga Pathien remruot chu an hnawl tlat leiin.
31. Isun, "Tu lai ruoltharhai hi ieng le am tekhin ka ta? Iem an ang tak aw?
32. Dawrpui hmuna naupang ruol inhnel, inkhek tuo a,Theihle kan mutpek cheu a,In lam nuom si naw a;Lusun hla kan sakpek cheu leh,In tap nuom bok si nawhintihai ang hi an nih.
33. Baptistu Johan chu a hung a, bei a fak naw a, uoiin a dawn bok naw a, nangnin "Ramhuoi zawl a nih" in ta.
34. Mihriem Naupa a hung a, fain a dawn a, nangnin "En ta u, mi vir, uoiin he mi, siekhontuhai le mi suolhai ruolpa saw' in mi ti nawk si a.
35. Nisienlakhom, varna indikzie chu a nauhaiah a'n lang chieng" a ta.
36. Farisaihai laia pakhatin Isu chu zanbu fa dingin a fiel a, Farisai inah chun a fe a, dawkanah thlaithleng a kil a.
37. Chu khuoa nuhmei pakhat, suola inhmang hlak chun Farisai inah Isun bu a fak ti a hrietin alabasta burah hriek rimtui chawiin a hung a,
38. a hnungah a ke bula chun tap pumin a ngir a; a mitthli chun a ke chu a far hu a, a sam chun a zuk hruk a, a ke chu a fawp ngawi ngawi a, hriek rimtui chun a chul a.
39. A fieltu Farisaiin a hmu chun, "Hi mi hi zawlnei ni tak tak sien chu a hung themtu nuhmei hi tu am a na, ieng ang mi am a na ti le nu suol a nih ti hre el ding a na" a ti lungril a.
40. Isun a kuomah, "Simon, i kuomah thu bau khat hril ding che ka nei" a ta. Ama chun, "Hril ta la, Zirtirtu" a ta.
41. Isun, "Mi pahniin tangka inpuktirtu lakah sum an bat a, pakhatin duli zanga, pakhatin duli sawmnga. A rulna ding an nei naw leiin a ngaidam ve ve a.
42. A tu lem chun am ama chu hmangai lem a ta?" a ta.
43. Simon chun, "A bat a ngaidam rawn lem chun a ni ka ring" a ta. Isun, "I ring indik chie" a ta.
44. Nuhmei tieng chu a ngha a, Simon kuomah, "Hi nu hi i hmu am? I inah ka hung lut a, nangin ka ke sawpna ding tui i mi pek nawh, ama ruok hin chu a mitthliin ka ke a far hu a, a samin a hruk a.
45. Nangin i mi lo fawp nawh, ama ruok hin chu ka hung luta inthok khan ka ke fawp a ma nawh.
46. Nangin ka luah hriek i mi nal nawh, ama ruok hin chu hriek rimtuiin ka ke a chul a ni hi.
47. Chuleiin, ka hril che hi, a suol po po ngaidam a ni tah, hmangaina a hau em a. Ngaidamna dong tlawm chun a hmangai nep hlak" a ta.
48. Chun, nuhmei kuoma chun, "I suolhai ngaidam a ni tah" a ta.
49. Thlaithleng otpuituhai chun, "Suol chen khom ngaidam el ta hi, tu tak am an ta le?" an ta.
50. Ama chun nuhmei kuomah, "I ringnain a sandam che a nih, thlamuong takin fe ta rawh" a ta.
←  Luke (7/24)  →