← Luke (5/24) → |
1. | Ni khat chu Gennasaret Dilm kamah Isu a ngir a, Pathien thu ngaithla dingin mipuiin an hung bawr hut hut a. |
2. | Dil kama long pahni um chu a hmu a, nga mantuhai chun an long chu suoksanin vakamah an lenhai an sawp a. |
3. | Long pakhat, Simon longa chun a chuong a, dila intawl lut met dingin a hril a. Chuongchun, a thung a, mipuihai chu a zirtir tah a. |
4. | Thu a hril zo chun Simon kuomah, "Li inthukna tieng pan unla, nga man dingin len deng ro" a ta. |
5. | Simon chun, "Hotupa, zankhawvar inrim takin kan denga chu kan hlawsam der a nih. Amiruokchu, i thuin len chu hang deng nawk kan tih" a ta. |
6. | An hang deng chun nga an inkhum teu a, an lenhai chun dier loin an tan tep a. |
7. | Chuongchun, thangpuitu dingin long danga an pawlhai chu an hei hui a, an hung a, long pahni chu pil vang vang khopin an sung sip ve ve a. |
8. | Simon Peterin chuong chu a hmu chun Isu ke bulah a bokkhup a, "Lalpa, mi fesan rawh, misuol ka ni hi" a ta. |
9. | Ama le a ruolhai chun chuong zozai nga an man el chu mak an ti seng a |
10. | Simon pawla mi Zebedai naupa Jakob le Johan khom chun mak an ti ve hle a. Isu chun Simon kuomah, "Ti naw rawh, tuta inthok chu mihriem man tang i tih" a ta. |
11. | Chuongchun, an longhai chu va kamah an hnuk kai a, iengkim maksanin ama chu an zui tah a. |
12. | Khuo pakhata Isu a um laiin pa pakhat, a puma inphar hi a hung a, Isu a hmu phing leh a ke bula bokkhupin, "Lalpa, i nuom chun i mi sukthieng thei" tiin sukdam a ngen a. |
13. | Isun a hei ban a, phar chu a them a, " Nuom e, lo inthieng ta rawh" a ta, a dam ta nghal a. |
14. | A kuoma chun, "Tu khom hril naw rawh; amiruokchu, thiempu va'n entir la, i dam ngei ti mihaiin an hriet theina dingin Mosie thupek angin inthienna thil va'n hlan rawh" a ta. |
15. | Nisienlakhom, a chanchin chu a'n thang zuol ta sau a; mi tam tak a thu hre chak le an natnahai a sukdampek nuomin an hung hut hut a. |
16. | Isu ruok chu hmun reah tongtaiin a fienriel rop hlak. |
17. | Chuong lai chun ni khat chu a zirtir laiin, Galili ram le Judai ram khaw tina inthok le Jerusalema inthoka hung Farisaihai le Dan zirtirtuhai chu a bulah an inthung a; mi sukdamna dinga Lalpa thilthawtheina chu amaa chun a thok a. |
18. | Chuong lai chun mi tuhaiin amani zeng pakhat, a zalna khum leh Isu hma bula sie dingin zawn lut an tum a, |
19. | sienkhom mipui an tam lei chun zawn lut ngaina a um naw a. Chuongchun, in chungah an lawn a, in chung chu an hawk a, a awnga chun a khum pumin Isu hma takah zeng chu hruiin an khai thlak a. |
20. | An ringzie a hmuin a kuomah "Ruolpa, i suolhai ngaidam a ni tah" a ta. |
21. | Farisaihai le Dan zirtirtuhai chun, " Hi mihriem, Pathien hrilsetu hi tu reng am a na? Pathien chauh naw chu tu am suol ngaidam thei an um a?" an ta. |
22. | An ngaituo chu Isun a hriet a, "In lungrilah iem in ngaituo a ? |
23. | 'I suolhai ngaidam a ni tah' ti am a olsam, 'Tho la, lawn ta rawh' ti lem? |
24. | Khawvela hin Mihriem Naupa hin suol a ngaidam thei ti in hrietna dingin" a ta, zeng kuoma chun, "Tho la, i puonthuo la la, i inah fe rawh ka ti che" a ta. |
25. | An hmu ngeia chun a tho a, a puonthuo chu a lak a, Pathien inpak pei pumin a in tieng a'n lawi tah a. |
26. | An reng chun mak an ti em em a, Pathien an inpak a, "Voisun chu thilmak danglam tak ei hmu a nih" an ti a, maktinain an sip a. |
27. | Chu zo chun a suok a, sienkhontu pakhat a hming Levi, siechawina hmuna inthung a hmu a, a kuomah, "Mi zui rawh" a ta. |
28. | Ama chu a tho a, a iengkim maksanin a zui ta nghal a. |
29. | Levi chun a inah Isu ta dingin ruoi ropui tak a buotsai a, chuongchun siekhontu le mi dang tam takin ruoi chu an hung kil tawl a. |
30. | Nisienlakhom, Farisaihai le Dan zirtirtuhai chu a zirtirhai chungah an lo chier a, "Ieng dinga siekhontuhai le mi suolhai leh thlaithleng an kil hmunkhat am a na?" an ta. |
31. | Isun anni chu donin, "Mi hriselhaiin daktor an ngai naw a, hrivoi sehaiin a nih an ngai lem. |
32. | Mi felhai lam dinga hung ka ni naw a, mi suolhai insimtir dinga hung ka ni lem" a ta. |
33. | Anni chun Isu kuomah, "Johan zirtirhai chu bu ngheiin an tongtai rop a, chuong ang bokin Farisaihai khomin an thaw ve a, i zirtirhai hlak hin an fakin an dawn bor bor el si a" an ta. |
34. | Isun an kuomah, "Anni lai moneitu a um sung chun mo thuoituhai chu bu in ingheitir hlak am a ni? |
35. | Moneitu chu an kuoma inthoka thuoi hmang ni la um a ta, chu huna ruok chu la nghei an tih" a ta. |
36. | An kuomah tekhinthu khom a hril a. "Tu khomin puon thar kei thlerin puon hlui phawknain an hmang ngai nawh. Chuonga a thaw chun puon thar chu a kei thler ngai a ta, puon thar hlek le puon hlui chu inmil bok naw nih. |
37. | Tu khomin uoiin thar savun uoiin peng hluiah an thun ngai nawh, thun ta ang sien, uoiin thar chun savun peng hlui chu mor koi a ta, put hmang vong a ta, uoiin peng khom chu se bok a tih. |
38. | Uoiin thar chu uoiin peng thara thun ding a nih. |
39. | Tu khom uoiin upa an dawn hnungin uoiin thar an lam ngai nawh, 'A upa po leh a'n hnik nge nge' an ti hlak" a ta. |
← Luke (5/24) → |