←  Luke (23/24)  →
1. Chun, pungkhawmhai chu an rengin an tho a, Isu chu Pilat kuomah an thuoi a.
2. "Hi pa hin kan chihai a thuoi khawlo ti kan hmu a, Kaisar kuoma siechawi a khap a, Lal Mesia chu niin a'n sal bok ti kan hriet" tiin an hek a.
3. Pilat chun, "Judahai lal i ni maw?" a ta. Ama chun, "I ti annawm" tiin a don a.
4. Pilat chun thiempu lalhai le mipuihai kuomah, "Hi pa hi a thiem nawna ka hmu nawh" a ta.
5. Nisienlakhom anni chun, "A zirtirnain Judai ram po poah mipui a chok tho a. Galili ramah a tan a, hieng lai chen khom a hung deng phak tah a ni hi" tiin an thang tlat a.
6. Chu thu chu Pilatin a hrietin Galili mi a ni le ni naw thu a'n don a.
7. Heroda biela mi a nih ti a hriet chun Heroda kuomah a thon a, ama chu Jerusalema a lo um lai a ni nghe nghe a.
8. Herodan Isu a hmu chun a lawm hle a, a chanchin a hriet rop hlak leiin a hmu chakna a sawt ta reng a; a thilmak thaw iemani bek hmu a beisei bok a.
9. Thu tam tak a'n don a, sienkhom bau khat khomin a sang nawh.
10. Thiempu lalhai le Dan zirtirtuhai chu an ngir ve a, inzom zatin an hek a.
11. Heroda le a vengtu sipaihai chun hmusit taka soisakin, nuizat siemnan an hmang a, lal korfuol mawi tak inhaktirin, Pilat kuom tieng an thon kir a.
12. Pilat le Heroda chu kha hma khan inhmelma hle hai sien khom hi ni hin an inngei nawk tah a nih.
13. Pilat chun thiempu lalhai, Dan zirtirtuhai le vantlang mipuihai chu a ko khawm a.
14. An kuoma chun, "Hi pa hi hel dinga mihai infuiportuah in hek a, nangni hmaa ngei thu ka'n don chieng a, sienkhom in hekna thuah thil poi ieng khom a tawk ka hmu nawh.
15. Heroda khomin a hmu naw leiin ka kuomah a hung thon nawk a ni hi. In hmu ang hrimin, thina khop ieng khom a thaw nawh.
16. Chuleiin, invuoktir ka ta, insuo nawk el ka tih" a ta.
17. Chun, Fekan Kut laiin tang pakhat anni ta dingin a'n suopek hlak a.q
18. Chuongchun a ruolin, "Hi pa hi sukbohmang la, Barabas kha mi'n suopek rawh" tiin inring takin an khek a.
19. Barabas chu khawpuia helna lei le tuolthat leia lung ina intang a nih.
20. Pilat chun Isu chu insuo a nuom a, an kuomah thu a hril nawk a.
21. Sienkhom anni chun, "Hemde rawh, hemde rawh" tiin an khek thuop thuop a.
22. Pilat chun a voi thumnaah "Ieng leiin am? Iem a thawsuol a? Thina khop poi a tawk ka hmu nawh. Invuoktir ka ta, ka'n suo el ding a nih" a ti nawk a.
23. Anni chun inring taka khekin, kraws-a hemde dingin an ngen lui tlat a, an rawl chun a vauh zam tah a.
24. An ngen ang chun Pilatin thu a sukthluk a.r
25. Helna le tuolthat leia lung ina intang an hni pa kha a'n suo a, Isu ruok chu an nuom nuoma thaw dingin a pek suok tah a.
26. Chuonga an thuoi hmang lai chun Simon, Kurini khaw mi, tlangrama inthoka hung chu kraws putpui dingin an man a, Isu hnungah an inputtir a.
27. Mipui tam tak le nuhmei ruol, lungse taka tap taphai chun an zui dul dul a.
28. Isu chu anni tieng a ngha a, "Jerusalem nuhai, mi ta naw ro, nangni le in nauhai ta dingin tap lem ro.
29. Ngai ta u, 'Nuhmei ching, sula nau pai ngai lo le nauin an nene an nek ngai lo chu an hamtha' in ti hun a la hung tlung ding a nih.
30. Chu huna chun mihaiin tlang kuomah 'Mi del rawh' ting an ta, muol kuomah 'Mi'n khum rawh' ti bok an tih.
31. Thing hring lai hman chuonga an thaw si chun thing a tawl pha lem chu ieng tin topin am an la thaw ding maw!" a ta.
32. Sukhlum dingin mi dang, mi suol pahni ama ruolin an thuoi ve a.
33. 'Lu Ru' an ti hmun an tlung a; chu taka chun kraws-ah an hemde a; mi suolhai khom chu a chang tieng pakhat, a voi tieng pakhat, an hemde bok a.
34. [Isun, "Pa, anni hi ngaidam rawh, an thilthaw hi an hriet naw a ni hi" a ta]s A silfenhai chu thum vawrin an insem a.
35. Mipui chun ngirin an thlir a. Juda hotuhai chun nuisawin, "Mi dang hman a sukdam hlak a, Pathien mi ruot, Krista chu a ni takzet chun ama khom insukdam raw se" tiin an esel a.
36. Sipaihai khom chun an nuisaw a, a kuomah hungin uoiin thur an pek a,
37. "Judahai lal i ni takzet chun nang le nang insukdam ta la" an ta.
38. A chunga chun HI MI HI JUDAHAI LAL A NIH ti ziekt an tar a.
39. An hemde ve mi suol pakhat chun a hrang khum a, "Krista chu i ni naw'm a ni? Insukdam la, keini khom mi sukdam ta la" a ta.
40. Nisienlakhom pakhat chun a hal a, " Pathien meu khom i ti naw maw, thuhmun zingin an hrem che hi?
41. Eini pahni hi chu hrem awm hrim ei na, ei thilthaw man ei hmu a ni hi; hi pa ruok hin chu ieng khom a suksuol nawh" a ta.
42. Chu zoah, "Isu, i ram i tlung pha mi hre zing rawh aw" a ta.
43. Isu chun a kuomah, "Voisun hin thu dik ka hril che hi, ka kuomah paradis-ah um veng i tih" a ta.
44. Sun dar sawmpahni vela inthoka chawhnung dar thum chenin khawvel a hung inthim ta vong a;
45. nisain var a'n suo naw a, tempul puonzar chu a laiah a'n thler suok a.
46. Isu chu rawl inring takin a khek a, "Pa, i kutah ka thlarau ka'n koltir" a ta. Chu chu a hril zoin a hnuk a chat tah a.
47. Sipai zahotuin thil umzie a hmu chun, "Hi pa hi matheiloin mi indik tak a ni phot el" a ta, Pathien a'n pak a.
48. Chu thil chu thlira mipui hung inkhawmhaiin thil hung tlung an hmu chun awm inchumin in tieng an inlawi tawl tah a.
49. A hmelhriethai ruok chu hla feah an ngir zing a, Galili rama inthoka ama zuitu nuhmeihai le chun chuong thil chu an thlir a.
50. Chun, mi pakhat a hming Josefa, Sanhedrina Kansil member pakhat, mi tha tak le indik tak a um a.
51. Ama chun an rorel le an thilthaw chu a remtipui naw hrim a. Judahai khuo Arimathaia um a na, Pathien ram beisei ve hlaktu a ni bok.
52. Ama chu Pilat kuomah a fe a, Isu ruong a va hni a.
53. Chun, a lak thlak a, puon zai inhmiin a tuom a, tu khom la zal ngai nawna lung ker thlanah chun a'n zal a.
54. Chu ni chu Inbuotsaina ni a na, Judahai Sabat chu a'n tan vang vang ta si a.
55. Galili rama inthoka hung zuitu nuhmeihai khom chun an zui ve pei a, thlan le a ruong an inzal dan chu an hmu a.
56. Chun, in tieng an kir a, rimtui le hriek rimtuihai chu an buotsai a. Dan thupek chu zawmin Sabat ni chu an chawl a.
←  Luke (23/24)  →