←  Luke (22/24)  →
1. Chol thang lo Bei Kut, Fekan Kut an ti chu a hung hnai tah a.
2. Thiempu lalhai le Dan zirtirtuhai chun Isu an sukhlum dan ding lampui an dap zing a, mipui an ti bok si a.
3. Sawmpahnihai laia tiem ve Juda, Iskariot an ti sunga chun Setan a lut a,
4. chuongchun a va fe a, thiempu lalhai le vengtu sipai hotuhai chu Isu an man dan ding a va hrilpui a.
5. Anni chu an lawm hle a, poisa pek an intiem a.
6. Ama khom chun a remti a, mipui um naw laia inmantir dan ding remchang a zong ta ran a.
7. Fekan Kut nipui ni, beramte an that ni chu a hung tlung a.
8. Peter le Johan hai chu a tir a, "Fekan Kut ruoi ei kil ding va buotsai ro" a ta.
9. Anni chun, "Khaw lai am va buotsai inlang i nuom a?" tiin an indon a.
10. Ama chun, "Khawpuiah in va lut pha leh pa pakhat, bela tui chawi intuokpui in ta, zui un la, a lutna inah zui lut ro
11. In neitu kuoma chun, 'Zirtirtun, ka zirtirhai le Fekan Kut ruoi kan kilna ding mikhuol pindan chu a khaw hi'm a na?' a tih va ti ro.
12. Ama chun pindan chunghnung lien tak, hmangruo iengkim umna chu kawkhmung a ti cheu a, chu taka chun ruoi chu buotsai ro" a ta.
13. Chuongchun an fe a, Isun a hril ang ngei chun an va hmu a, Fekan Kut ruoi chu an buotsai a.
14. A fak hun a hung tlung chun, Isu le a zirtirhai chun dawkan an kil thap a.
15. A zirtirhai kuoma chun, "Ka tuor hmain hi Fekan Kut ruoi hi kilpui cheu ka nuom takzet a nih.
16. Ka hril cheu hi, Pathien rama a tak ngeia a tlung hma khat chu kut ruoi hi fa nawk ta ngai naw ning" a ta.
17. Chun, no chu a lak a, lawmthu a hril zoin, "Hi hi la unla, insem ro.
18. Ka hril cheu hi, Pathien rama a tak taka a hung tlung hma khat chu grep ra tui hi dawn nawk ta ngai naw ning" a ta.
19. Chun, bei khom chu a lak a, lawmthu a hril zoin a khoi a, an kuomah a pek a, "Hi hi ka taksa, in ta dinga pek chu a nih; in mi hriet zingna sikin hieng ang hin thaw hlak ro" a ta.
20. Zanbu an fak khop chun chuong ang bokin no chu a lak a, "Hi uoiin hi ka thisen thuthlung thar, in ta dinga pek suok chu a nih.
21. A mi'n mantirtu ding chun hi dawkan hi a kil ve ta zing a nih.
22. Mihriem Naupa hi Pathien ruot angin a fe ding a na, sienkhom a'n mantirtu ding chung chu a rik ie!" a ta.
23. Anni lai chuong ang thaw ding chu a tu tak am ning a ta tiin an indon kuol a.
24. Anni lai tu am ropui taka ngai ning a ta ti thuah inselna a hung suok a.
25. Isun an kuomah, "Jentel lalhai chu an insukngeng em em a, an chunga thuneituhai chun 'Somdawltu' ti hming dam an inpek hiel a.
26. Nisienlakhom, nangni lai ruok chu chuong ang ding chu a ni nawh. Nangni laia ropui tak chu a chin tak angin um sien, a hotu tak chu rongbawltu angin um lem raw se.
27. Tu am a ropui lem- buthleng kiltu am rongbawltu? Buthleng kiltu chu a ni naw am a nih? Nisienlakhom, kei ruok chu nangni laia rongbawltu angin ka um hi.
28. "Harsatna ka tuok sung po nangnin in mi umpui a.
29. Ka Pain ram a mi ruotpek ang bokin kei khomin ram ka ruotpek cheu a,
30. chuongchun ka rama chun ka dawkanah fain la dawn veng in ta, lalthungphaa thungin Israel hnam sawmpahnihai ro la relpek in tih.
31. "Simon, Simon, Setanin a nuom nuoma bu rela rel ding cheuin a mi hni a,
32. sienkhom Simon, i ringna a'n phet nawna dingin ka tongtaipek che. Chun, keima tieng i hung ngha kir nawk pha leh i unauhai hi suknghet rawh" a ta.
33. Peter chun, "Lalpa, lung ina intang le thina tuok ding khom ni lang zui che ka'n huom" a ta.
34. Isun a kuomah, "Peter, ka hril che hi, voizan ar khuong hmain 'Ama chu ka hriet nawh' tiin nangin voi thum mi'n phat i tih" a ta.
35. Chun, "Tangka ip dam, mansa dam le pheikhok dam chawi loa ka tir suok cheu khan tlaksam in nei hrim am?" tiin a'n don a. Anni chun, "Kan nei der nawh" an ta.
36. Ama chun, "Tu ruok hin chu tangka ip nei chun chawi sien la, mansa khom pai raw se; kawlhnam nei naw chun a puon zor sien, inchaw raw se.
37. Ka hril cheu hi. 'Ama chu mi suolhai lai an tiem sa tah' ti ziek kha ka chungah a tlung ngei ding a nih. A nih, ka chungthu an ziek kha a tlung kim mek a nih" a ta.
38. Anni chun, "Lalpa, en ta, kawlhnam pahni chu a um hi" an ta. Ama chun, "A huntawk" a ta.
39. Chun, Isu chu a suok a, a thaw dan pangngaiin Oliv tlanga chun a fe a, a zirtirhai chun an zui a.
40. A hmun a va tlung chun an kuomah, "Thlemnaa in lut nawna dingin tongtai ro" a ta.
41. Lunga deng phaka hlaah a va fe a, dingthathuonin a tongtai a.
42. "Pa, rem i ti chun hi no hi mi la sonpek rawh, sienkhom keima thu ni loin nangma thu ni lem raw se" a ta.
43. Vana inthokin vantirko pakhat a hung inlang a, ama chu a sukhrat a.
44. A thla a phang leiin thahnem ngai nawk zuolin a tongtai a, a thlan chu hnuoia thisen far thluk thluk angin a far a.n
45. A tongtai zo chun a zirtirhai kuomah a hung a, lungngai chaua lo inlusu chu a hung hmu a, an kuomah
46. "Ieng dinga in in zing am? Tho unla, thlemnaa in lut nawna dingin tongtai ro" a ta.
47. Chuonga a hril lai zing chun mipui an hung tlung a, Sawmpahnihai laia mi Juda an ti chun hma a hung thuoi a, fawp tumin Isu a hung pan a.
48. Nisienlakhom, Isun a kuomah, "Juda, Mihriem Naupa hi fawpin i'n mantir ding a ni maw?" a ta.
49. Isu zuituhaiin thil hung tlung ding an hmu chun, "Lalpa, kawlhnam kan hmang el ta di'm a nih?" an ta.
50. Anni laia pakhat chun thiempu laltak suok chu a sat a, a chang tieng nakawr a fikpek a.
51. Isun, " Khai, khai! A huntawk" a ta, chu pa nakawr chu a them a, a sukdam tah a.
52. A man dinga hung inthok thiempu lal hai, tempul pulis hotu hai le upa hai kuoma chun, "Hel hmang man ding ang elin kawlhnam le hmoltum leh in hung inthok a ni maw?
53. Ni tin tempulah nangni lai ka um hlak a, in mi man bok si nawh. Sienkhom tu hi nangni chet hun a nih, thim lal chet hun chu" a ta.
54. Chuongchun an man a, Thiempu laltak inah an thuoi a. Peterin hla fea inthokin a zui a.
55. Chun, in inhuon sung tuol lailunga chun mei semin an inthung khawm a, Peter khom chu anni lai inthungin mei chu a awi ve a.
56. Mei awia a'n thung lai chu siehlaw nunghakin hnai deuah a en vang vang a, "Hi pa hi a kuoma um ve kha a ni hi" a ta.
57. Peter chun, "Nuhmei, ama chu ka hriet ngai nawh" tiin a'n phat a.
58. Chu hnung ela chun mi dangin a hung hmu a, "Nang khom hi anni laia thang i nih" a ta. Peter ruok chun, "Mihriem, ka ni awzawng nawh" a ta.
59. Darkar khat vel hnunga chun mi dangin, "Hi pa hi a kuoma thang ve kha a ni chieng el, Galili mi a ni si a" a ta.
60. Peter chun, "Mihriem i thu hril umzie chu ka hriet der nawh" a ta. A hril lai mek chun ar a hung khuong a.
61. Lalpa chu a hung ngha a, Peter chu tlun takin a hung en a. Peter chun, 'Voizan ar khuong hmain voi thum mi'n phat i tih" Lalpan a kuoma a ti kha a hriet suok a.
62. Tuolah a suok a, a tap ta zawi zawi a.o
63. Isu vengtuhai chun nuizat siemnan an hmang a, an vuok a.
64. A mit an tuompek a, "Tuin am a vuok che, hril thei rawh" an ta.
65. Tong tha lo tinrengin an biek a.
66. Zing khuo a hung var chun vantlang upa hai, thiempu lal hai le Dan zirtirtuhai chu an inrawn khawm a, Isu chu Sanhedrina chun an thuoi a.
67. "Krista chu i ni le ni naw mi hril rawh" an ta. Ama chun, "Hril lang cheu khom, awi chuong naw ti niu;
68. thu indon cheu lang khom mi hril naw ti niu.p
69. Nisienlakhom, tuta inthok chun Mihriem Naupa hi Pathien ropui chang tieng inthung tang a tih" a ta.
70. An rengin, "Chu, nang hi Pathien Naupa i ni maw?" an ta. Ama chun "Ka ni thu in hril hi in hril indik hrim a nih" a ta
71. Anni chun "Hrepuitu dang tu am ei la ngai rop a? Eini ngeiin a bau suok ei hriet tah annawm" an ta.
←  Luke (22/24)  →