←  Luke (21/24)  →
1. A hang dak a, thawlawm bawma mi hausahai thawlawm thlak chu Isun a thlir a.
2. Hmeithai rethei tak pakhatin dar tangka pahnih a hung thlak ve chu a hmu a.
3. Chuongchun, "Thu dik ka hril cheu hi, hi hmeithai rethei hin mi dang po nek khan a thlak rawn lem a nih.
4. Mi danghai chun an nei chuong liema mi thawlawmah an thlak a, ama ruok chun rethei hle siin a fak sik Pathien ta dingin a thlak vong a nih" a ta.
5. A zirtir thenkhatin lung mawi tak tak le Pathien kuoma an thilpekhaia tempul an chei mawizie thu an hril a.
6. Isu ruok chun, "Hieng lung rem inthuohai hi sukchim vonga maksan a ni hun a la tlung ding a nih" a ta.
7. Anni chun, "Zirtirtu, chuong thilhai chu ieng tik am hung tlung a ta? A hung tlung ding ti inchikna ieng am um a ta? " tiin an indon a.
8. Ama chun, "Hlema in um nawna dingin fimkhur ro. Mi tam tak ka hming salin hung an ta, 'Keima hi ka nih' dam, 'A hun a tlung ding a ni tah' dam hung ting an tih. An hnung lo zui naw ro.
9. Indo thu le buoi thuthang in hriet pha, thlaphang naw ro; chuong thil chu a tlung hmasa zet ding a ni hrim a, tawpna ruok chu tlung nghal naw nih.
10. Hnam hrang hrang indo an ta, ram hrang hrang indo bok an tih.
11. Lir nasa takin inhning a ta, hmun hrang hrangah tam tlang a ta, hripui inleng a ta, vana inthokin thil tium le inchikna mak tak tak inlang bok a tih.
12. Chuong thilhai chu a tlung hmain man an ti cheu a, sunagoga dam thuoiin, lung inah dam khumin, an sukduda ding cheu a nih. Ka hming leiin lalhai le larsaphai hmaah thuoi an ti cheu.
13. Ka thu hretuhai in nizie tar langna remchang ning in tih.
14. Donna ding in ngaituo lawk a ngai nawh ti hre hmasa ro;
15. in khingpuihai tluk lo ding le sel thei lo ding varna le don thiemna keiin ka pek ding cheu a nih.
16. In nu le pa hai, in unau hai, in laichin hai le ruol hai chen khomin inmantir an ti cheu a; a then lem chu sukhlum an ti cheu.
17. Ka hming leiin mi tin theida ning in tih.
18. Nisienlakhom, in sam zai khat khom bohmang naw nih.
19. Sel takin ngir tlat unla, chuongchun him in tih.
20. "Sipaiin Jerusalem an inhuol inhmu pha chu a siet a hnai tah ti hre ro.
21. Chu huna chun Judai rama umhai chu tlangramah tlan raw hai se; khawpui sunga umhai chun suoksan hai sien, thingtlanga umhai chu a sungah lut naw raw hai se.
22. Chuong nihai chu hremna ni, hril lawka lo um tahai tlung kim ni a ni si a.
23. Chuong nihai chu nau pai inrik le pom lai naute neihai ta ding chun a va rapthlak awm ngei de aw! A ram pumah mangangna rapthlak le hi chi-hnamhai chunga hin lungsenna hung tlung a tih.
24. Kawlhnama sam thluk ning an ta, Jentelhai ram hmun tinah sala thuoi darin um an ta; Jentel hun a tawp hma khat Jerusalem chu Jentelhai sir dein um a tih.
25. "Chun, nisa dam, thla dam le arasi haia dam inchikna mak tak hung inlang a tih. Hnuoia khom tuifinriet infawn hlup hlup le inrum hum hum an hrietin hnam tin chu thlaphangin chi-ai an tih.
26. Van thilthawtheinahai chu sukhningin um a ta, khawvela thil tium hung tlung ding chu suongtuoin, mihai chu thlabarin thidang an tih.
27. Chu huna chun Mihriem Naupa hi thilthawtheina le ropuina nasa tak leh suma a hung hmung in tih.
28. Chuong thil a hung tlung chun ngir changin dak suok ro, in intlanna ni chu a hung hnai ta si a" a ta.
29. An kuomah hi tekhinthu khom hi a hril a. "Theichang kung le thing danghai khom hi en ro.
30. An hung inder inhmu chun nipui a hnai tah ti in hriet hlak.
31. Chuong ang bokin nangni khomin chuong thil po po hung tlung in hmu hun chun Pathien ram chu a hung hnai tah ti hre el ro.
32. Thu dik ka hril cheu hi, chuong thil po po a hung tlung kim hma chun tuta suonhaim hi bohmang naw top an tih.
33. Hnuoi le van bohmang an ta, ka thu ruok chu bohmang ngai naw nih.
34. "Nuom tawlna dam, zu inruina dam le damsung khawsak lungkhamna dama in lungril a hluo sip nawna ding le changa awk anga a hung nang phut nawna ding cheuin fimkhur ro.
35. Hnuoia chenghai po po chungah chuong ang chun a hung tlung ding a ni si a.
36. Chuong thil hung tlung dinghai po po chu tuor muolsuo thei ding le Mihriem Naupa hmaa ngir thei dingin ieng lai khom ngaivenin tongtai ro" a ta.
37. Ni tinin tempulah Isun a zirtir a, zana ruok chu Oliv tlang an tia chun a riek hlak.
38. A thu ngaithla dingin zing hmangin tempulah mipui an fe khawm hlak.
←  Luke (21/24)  →