←  Luke (20/24)  →
1. Ni khat chu tempula Chanchin Tha hrila mihai a zirtir laiin thiempu lal hai, Dan zirtirtu hai le upa hai chu an hung a,
2. "Tu thuin am hieng thil hi i thaw a na? Tuin am thu a pek che, mi hril rawh" an ta.
3. Ama chun, "Kei khomin thu indon veng ka ti cheu:
4. Johan baptisma kha vana mi thu a ni mihriem thu? Mi hril ro" a ta.
5. Anni chu an inrawn a, "Vana mi thu ei ti chun, 'Iem a ta a thu in awi nawh' mi ting a ta,
6. hnuoia mi thu ei ti hlak chun mipuiin an inza leiin lungin an mi deng el awm si a, Johan chu zawlnei ni ngeiah an pom tlat tawl si" an ta.
7. Chuongchun, "A tu thu am kan hriet nawh" an ta.
8. Isu khomin, "Kei khomin tu thuin am thil ka thaw hril bik naw ning cheu" a ta.
9. Mipuihai chu tekhinthu a hril pei a: "Mi pakhatin grep huon a siem a, huon enkoltuhai a'n santir a, hun sawt tak ram danga thang dingin a fe a.
10. A lo huna chun a chan ai la dingin huon enkoltuhai kuomah a siehlaw a tir a. Nisienlakhom, huon enkoltuhai chun an lo vuok a, kut ruokin an inkirtir a.
11. Siehlaw dang a tir nawk a, ama khom chu an lo vuok a, inzakum takin an soisak a, kut ruok bokin an inkirtir a.
12. A siehlaw tir pathumna lem chu an lo inhliem a, huona inthokin an the dok a.
13. "Grep huon neitu chun, 'Ieng tin am thaw tang ka ta? Ka naupa dit tak hi tir el ka tih; ama hi chu lo inza em naw ni hai am' a ta.
14. Huon enkoltuhaiin an lo hmu chun, 'Hi pa hi ro hluotu ding chu a nih, that ei ta, a ro ei nei vong el ding a nih' an ta.
15. Chuongchun, grep huona inthokin an hnuk suok a, an that a.
16. Grep huon neitu chun anni rawi chu ieng tin am hung thaw tang a ta? Hung a ta, huon enkoltu chu that a ta, grep huon chu mi dang insantir a tih" a ta. Ngaithlatuhai chun, "Chuong thil em chu hung tlung lul naw raw se" an ta.
17. Amiruokchu, anni rawi chu a en a,"In bawltuhai lung hnawl kha,Chu ngei el chu a kil aLung tangkai tak a lo ni si"ti ziek hi ieng tina am a na?
18. Chu lung chunga tlu taphot chu koi dar vong an ta, a del ngat lem chu rawt nawi a tih" a ta.
19. Dan zirtirtuhai le thiempu lalhai chun chu tekhinthu chu anni kawka a hril a nih ti an hriet leiin man nghal thei dan kong an dap a, sienkhom vantlang mipui an ti si a.
20. Chuongchun, Larsap rorelna le thuneina hmaah an pek theina ding remchang an dap ran a, a tong suol pal man tumin enthlatu, mi indik anga inlang, an tir a.
21. Chuong enthlatuhai chun, "Zirtirtu, i thuhril le thu zirtir hi a'n dik ti kan hriet a, thlier bik nei loin Pathien thu indik tak chu i zirtir hlak.
22. Kaisar kuomah sie kan chawi ding am kan chawi naw ding?"tiin an indon a.
23. An dawp a nih ti a hriet leiin an kuomah,
24. "In tangkal chu mi hang inentir ro. Tu lim le tu hming am a chuong a?" a ta, anni chun "Kaisar" an ta.
25. Ama chun, "Kaisar thil chu Kaisar pe unla, Pathien thil chu Pathien pe ro" a ta.
26. Chuongchun, vantlang hmaa thu inhril awktir an tum chu an hlawsam a, a donna chu mak an ti hle a, an to ta chip a.
27. "Thonawkna a um nawh" ti pawl Sadukaihai laia thenkhat chu thu indon dingin Isu kuomah an hung a.
28. "Zirtirtu, Mosien, 'Tu khom nuhmei neiin nau nei si loin thi sien, a sang chun a nuhmei chu hluoin a u ta dingin chi a thlapek ding a nih' ti a mi ziekpek a.
29. Aw leh, unau pasal pasari an um a, a upa tak chun nuhmei a nei a, nau nei loin a thi a;
30. a pahnihna chun a nuhmei chu a hluo a,
31. pathumna khomin; chuong ang chun unau pasari chun an hluo seng a, nau nei loin an thi pei a.
32. Chu hnung chun nuhmei khom chu a thi ve ta a.
33. Unau pasari chun nuhmeiin an nei seng leiin thonawkna niah chu nu chu a tu tak nuhmei am ni tang a ta?" tiin an indon a.
34. Isun an kuomah, "Tu lai mihai hi inneiin nuhmei pasalin an insiem hlak,
35. khawvel la hung um dinga thonawknaa thang tlaka ruothai ruok chu nuhmei pasal innei ta naw ni hai.
36. Thi khom thi thei ta nawng an tih, vantirkohai ang an ni ding a ni leiin. Anni chu thonawk nau, Pathien nauhai an nih.
37. Mithi keithoa an um thu chu Mosie khomin chimbuk thu a zieknaah a hril lang a, Lalpa chu "Abraham Pathien, Isak Pathien, Jakob Pathien" tiin a hril kha.
38. Ama chu mithihai Pathien a ni naw a, mihringhai Pathien a ni lem; ama ta ding chun mihring vong an nih" a ta.
39. Dan zirtirtu thenkhat chun, "Zirtirtu, i hril indik khop el" an lo ti bok a.
40. Thu dang hrim an indon ngam ta nawh.
41. Chun, Isun an kuomah, "Krista chu Davida naupa ieng leia an ti am a na?
42. Inpakna Hla buah Davida ngeiin,
43. Lalpa chun ka Lalpa kuomah Ka chang tieng inthung rawh,I hmelmahai i ke sirsanah,Ka siem hmakhat chun'a ti kha.
44. Davidan ama chu 'Lalpa' a ti si chun, ieng tin am a naupa ni thei a ta?" a ta.
45. Mipuiin an ngaithlak zing lai chun a zirtirhai kuomah, "Dan zirtirtuhai lakah fimkhur ro.
46. Anni chun korfuol haka leng an ching a, bazaar hmuna mi chibai buk an ngaina a, sunagogah thungna hmatawng le ruoi thenaah thungna tha tak an ngiet hlak.
47. Hmeithaihai nei fa tlarantu an na, a sieli khaw mawiah sawt tak tak an tongtai hlak. Hienghai hremna tuor ding hi sa zuol a tih" a ta.
←  Luke (20/24)  →