← Luke (2/24) → |
1. | Chuong lai chun Kaisar Awgasta chun Roman lalram po poah intiemna nei dingin thu a'n suo a. |
2. | Hi hi Suria ram larsapa Kuirini a thang sunga intiemna hmasa tak chu a nih. |
3. | Chuongchun, mi tin chu mani tobul khuo sengah hming ziek dingin an fe a. |
4. | Josefa khom Davida sungkuo le a thlaa mi a ni leiin, Galili ram Nazaret khuoa inthokin, |
5. | a nuhmei huol lai Mari, nau pai inhla tak leh chun Judai rama Davida khuo Bethlehemah hming ziek dingin an fe a. |
6. | Chu taka an um lai chun a nau nei a hung hun ta a, nau lutirah nau pasal a nei a. |
7. | Puonin a tuom a, khuolbukah an inleng ve naw leiin ranthlengah an inzaltir a. |
8. | Chu lai ram khaw daia chun berampuhan an beramhai an veng a, zanah an riek ngha a. |
9. | Chun, Lalpa vantirko an kuomah a hung ngir a, Lalpa ropuinain an vel a hung sunvar phut a, an ti em em a. |
10. | Vantirko chun, "Ti naw unla, ngai ro, mi tin ta ding chanchin tha lawmum bek bek ka hung intlun cheu a nih. |
11. | Voisun hin in ta dingin Davida khuoah Sandamtu a pieng tah, Lal Krista chu. |
12. | Hi hi in ta dinga inchikna ning a tih: naute, puona tuom, ranthlenga zal hmung in tih" a ta. |
13. | Thawklekhatah vantirko bula chun van mipui tam tak an hung um ta huk a, Pathien an inpak a: |
14. | "Chunghnungtaka Pathien ropui raw se,A ditsakna changtu hnuoia mihriemhaic kuomah,Inremna thu inleng raw se"tiin. |
15. | Vantirkohaiin van tieng an fesan phingleh berampuhai chun, "Thaw ro, Bethlehemah feng ei ta, Lalpa thu mi hril hung tlung chu va en ei tiu" an ta. |
16. | Chuongchun, inhmaw takin an fe a, Mari le Josefa le ranthlenga naute zal chu an va hmu a. |
17. | An va hmu chun an kuoma vantirkoin naute chanchin an hriettir kha an hril a. |
18. | A hre taphotin berampuhai thu hril chu mak an ti hle a. |
19. | Mari chun chuong thu chu a lungrilah a khawl khawm a, a ngaituo neu neu a. |
20. | Vantirko hril ang ngeia iengkim an hriet le an hmu lei chun berampuhai chu Pathien chawimawi le inpak pei pumin an kir nawk tah a. |
21. | A ni riet ni, a ser tan ni chun sula a'n sieng hma daia vantirkoin a hming ding a lo hril tah angin a hmingah ISU an sak a. |
22. | Mosie Dan anga an inthien ni ding a hung tlung chun naute chu Lalpa kuoma inhlan dingin Mari le Josefa chun Jerusalemah an thuoi a. |
23. | Lalpa Dan thuah "Nau lutir pasal taphot chu Lalpa chanvo ding a nih" ti a ni si a. |
24. | Chun, Lalpa Dan angin, vathu pahni amanih parva tuoi pahni amanih inthawina dingin an inhlan ding a nih. |
25. | Jerusalema chun mi pakhat a hming Simeon a um a, ama chu mi fel le sakhaw mi tak a nih. Israel thlamuongtu ding chu a thlir zing a; a chungah Thlarau Thienghlim a um a. |
26. | Lalpa Kristad chu a hmu hma khat thi lo dingin Thlarau Thienghlimin a lo inhriettir ta hrim a. |
27. | Thlarau thuoiin tempula chun a fe a, naute Isu chu a nu le pain Danin a phut ang thawpek dinga an hung thuoi lut lai chun |
28. | Simeon chun a lo pom a, Pathien a'n pak a: |
29. | "Aw Laltak, tuhin chu i thu ang peiin,I siehlaw hi thlamuong takin i'n fetir ding an ta hi, |
30. | I sandamna mi tin hmua i buotsai chu, |
31. | Ka mit ngeiin a hmu tah: |
32. | Jentelhai kuoma i var suklangtu ding leI mi Israelhai ropuina ding chu"tiin. |
33. | Naute chungchang a hril chu a nu le pa chun mak an ti hle a. |
34. | Simeon chun anni chu mal a sawm a, a nu Mari kuoma chun,"Ngai ta, Israel laia mi tam tak,Tlukna ding le tungdingna dingin,Hi naute hi ruot a nih,Inchikna an kal hut hut ding chu. |
35. | Kawlhnama sun tlang angin I lunglai la nang a ta,Mi tam tak ngaituona ruk,Phor langin la um a tih"a ta. |
36. | Zawlnei nu pakhat Anna, Aser hnama mi Fanuel naunu a um a. Tar tak a ni tah a; a pasal leh kum sarih an um hmunkhat hman a, |
37. | chu hnung chun kum sawmriet pali a ni chenin a hmeithai tah a nih. Ama chun tempul maksan loin, bu ngheia tongtaiin sun-zan zomin Pathien a biek hlak a. |
38. | Chuong lai chun ama chu a hung a, Pathien kuomah lawmthu a hril a, Jerusaleme sansuokna beiseitu taphot kuomah naute chanchin chu a hril a. |
39. | Lalpa Dan ang peia thil an thaw zo vong hnung chun Galili rama an khuo Nazareta chun an kir nawk tah a. |
40. | Naute khom chu inthang peiin a hung chakvak a, varnain a sip a, Pathien lunginsietna a chungah a um zing a. |
41. | Kum tinin a nu le pahai chu Fekan Kut hmang dingin Jerusalemah an fe hlak a. |
42. | Ama chu kum sawm le pahnih a niin dan pangngai anga kut hmang dingin an fepui a. |
43. | Kut tumtiek chun an kir a, naupang Isu ruok chu a nu le pa hriet loin Jerusalemah a la chambang a. |
44. | An ruolhai lai a um an sawn a, ni khat an fe hnunga an laichin le hmelhriethai lai an hang zong chun an hmu zo ta naw a. |
45. | Zong peiin Jerusalemah an kir nawk a. |
46. | Ni thum ni chun tempula zirtirtuhai bula lo inthung chu an hang hmu tah a, an thu hril ngaithlain, thu dam a lo indon a. |
47. | A thil hrietzie le mi a don thiemzie hmu taphot chun mak an ti hle a. |
48. | A nu le pahaiin an hmu chun mak an ti em em a. A nu chun, "Bawi, ieng dinga hienga i mi thaw? I pa leh thlaphang takin kan zong kan zong che an son naw" a ta. |
49. | Ama ruok chun, " Ieng dinga in mi zong? Ka Pa ina um ding ka nih ti in hriet naw maw?" a ta. |
50. | A hril umzie chu an hriet si nawh. |
51. | Anni le chun Nazaret tieng a kir thlak a, an thu awi takin a um a. A nu chun chuong thil po po chu a lungrilah a vong zing a. |
52. | Isu chu taksa le varna tieng a hung inthang lien a, Pathien le mihriemhai ditsak a hlaw pei a. |
← Luke (2/24) → |