Luke (18/24)  

1. A zirtirhai chu beidong loa tongtai fan fan ding an nizie inentirna dingin Isun tekhinthu a hril a:
2. Khaw pakhata hin roreltu pakhat, Pathien tina nei lo, mihriem khom poisa bok lo a um a.
3. Chu khuoa chun hmeithai pakhat a um a, 'Ka khingpui le kan thubuoi mi rel felpek rawh' tiin a hung ngen sen a.
4. Ama chun iemani chen chu a thawpek nuom naw a.
5. A tawpa chun, 'Pathien ti loin mihriem poisa bok naw lang khom, hi hmeithai hin a mi chokbuoi ngun em a, sukfelpek el ka tih; chuong naw chun a hung rop awm si a, nghok a um taluo ding a nih' tiin a'n ngaituo a.
6. Lalpa chun a hril pei a, "Roreltu fel lo thu hril chu hre ro.
7. A mi thlang, a sun a zana ama kotuhai chungthu chu Pathienin a rel fel naw ding am a ni? A la muongchang dim a ni?
8. Ka hril cheu hi, hung rel fel vak a tih. Amiruokchu, Mihriem Naupa hin a hung pha leh khawvela hin ringna hmung a ti'm?" a ta.
9. Mani fel inti, mi dang hmusit hlakhai kuoma khom Isun hi tekhinthu hi a hril a:
10. "Mi pahni hi tongtai dingin tempulah an fe a, pakhat chu Farisai a na, pakhat chu siekhontu a nih.
11. Farisai chu a ngir a, ama chungthu hrilin, 'Aw Pathien, mi dang anga mi duam, depde le uire hmang le hi siekhontu ang khom hi ka ni ve naw leiin lawmthu ka hril che.
12. Kar tin voi hnih bu ka nghei a, ka nei taphot sawmapakhat ka pek hlak' a ta.
13. Siekhontu ruok chu ama hnung daiah a ngir a, van tieng khom ngha ngam loin, 'Aw Pathien, kei mi suol hi mi lunginsiet rawh' tiin a awm a chum a chum ta lem a.
14. "Ka hril cheu hi, chu pa chu a pakhat lem nekin thiem changin inah a'n lawi ta lem a nih. Inngaihlu taphot chu tlawm an ta, inngaitlawm taphot chu chawimawi ning an tih" a ta.
15. Isu them dingin nautehai khom an hung thuoi a, zirtirhai chun an lo rau a.
16. Nisienlakhom, Isun anni chu a ko a, "Naupangtehai kha ka kuomah in hungtir unla, khap naw ro; Pathien ram chu hieng ang mihai ta hi a ni si a.
17. Thudik ka hril cheu hi, tu khom naupangte anga Pathien ram lawmtu an ni naw chun a sungah lut naw top an tih" a ta.
18. Chun, hotu pakhatin a kuomah, "Zirtirtu Tha, chatuon hringna ka chang theina dingin ieng am thawng ka ta?" tiin a hung indon a.
19. Isun, "Ieng leia tha i mi ti? Tu khom tha an um nawh, Pathien chau naw chu.
20. Thupekhai chu i hriet annawm � uire naw, tuol that naw, inru naw, khelin mi hek naw, i nu le pa chawimawi rawh-tihai hi" a ta.
21. Ama chun, "Chuong thil po po chu ka tleirawl laia inthokin ka zawm hlak" a ta.
22. Chu chu a hrietin Isun a kuomah "Kong khat i la bak; i nei po po zor la, pasiehai sem rawh; chun, hung la, mi zui rawh" a ta.
23. Chu thu a hriet chun a lungngai ta hle a, mi hausa tak a ni si a.
24. Isun ama chu a en a, "Mi hausa ta dingin Pathien rama lut a va harsa de aw!
25. Pathien rama mi hausa a lut nekin thim naa sanghawngsei lut thleng a ol lem si a" a ta.
26. A ngaithlatuhai chun, "Chuong a ni chun tu am sandam ni thei an ta?" an ta.
27. Ama chun, "Mihriem ta dinga thaw thei lo khom hi Pathien chun a thaw thei vong" a ta.
28. Peter chun, "Ngai ta, kan in le lo maksanin kan zui ta che a" a ta.
29. Isun, "Thu dik ka hril che hi, tu khom Pathien ram leia in dam, nuhmei dam, unau dam, nu le pa dam, nauhai dam maksantu chun,
30. dam sung huna ngei khom a neka tam hmu ngei a tih, hun la hung tlung dinga chatuon hringna leh" a ta.
31. Sawm le pahnihai chu Isun a thuoi bing a, an kuomah, "Ngai ta u, Jerusalemah ei hang fe ding a nih; Mihriem Naupa chungchang thu zawlneihai hmanga ziek po po kha a hung tlung kim ding a nih.
32. Jentelhai kutah peng an ta, nuisawng an ta, inzakum takin soisak an ta, chil sakkhum an ta, vuong an ta, sukhlum an tih.
33. Chun, a ni thum niin tho nawk a tih" a ta.
34. A zirtirhai chun chu thil chu a ngaina hrim an hriet nawh. A umzie chu anni laka thup a na, a thil hril chu an man phak nawh.
35. Jeriko khuo Isun a tlung tawmin mitdel pakhat hi lam sirah kut dawin a lo inthung a.
36. Mipui fe ri a hriet chun iem a nih ti a'n don a.
37. "Nazaret Isu a hung a nih" tiin an hril a.
38. Ama chun, "Isu, Davida Naupa, mi lunginsiet rawh" tiin a khek a.
39. A hmatawnga fehai chun an hal a, to dingin an hril a, sienkhom "David Naupa, mi lunginsiet rawh" tiin a khek inring zuol sau a.
40. Isu chu a ngir a, a kuoma hung thuoi dingin a hril a.
41. A kawl a hung tlung chun, "I chungah ieng am ka thawpek che i nuom a?" a ta. Ama chun, "Lalpa, hmu thei ka nuom" a ta.
42. Isun a kuomah, "Hmu thei ta raw khai, i ringna hi i dampui a nih" a ta.
43. Chuongchun a hmu thei ta nghal a, Pathien inpak pei pumin Isu chu a zui ve tah a. Chu chu mipuiin an hmu chun Pathien an inpak ve tah a.

  Luke (18/24)