←  Luke (17/24)  →
1. Isun a zirtirhai kuomah, "Mihai insuoltirtu thilhai hi hung um naw thei a ni nawh, sienkhom a'n umtirtu chung chu a rik.
2. Hieng mi chinhai laia pakhat khom intluktir nek chun bu rawtna lung a ringah inhlitirin, tuifinrietah thlak ni sien, a ta dingin a tha lem.
3. "Chuleiin, fimkhur ro, i unauin i chungah thil suol a thaw chun zil la, a sim chun ngaidam rawh.
4. Ni khat sungin i chungah voi sari thil a suksuol a, 'Ka sim' tia nangma tieng voi sari a hung ngha chun i ngaidam ding a nih" a ta.
5. Tirkohai chun Lalpa kuomah, "Kan ringna mi sukpungpek rawh" an ta.
6. Lalpa chun, "Antam mu tiet ringna in nei chun, hi theihmi kuoma hin, 'Inphawi la, tuifinrietah inphun rawh' ting in ta, in thu awi el a tih.
7. "Nangni lai hin tu am siehlaw nei a, a lo kei amanih a beram veng hung inlawi chu, 'Hung la, bu hung fa nghal rawh' ti ding?
8. Chuong nek chun, 'Ka fak ding buotsai la, inthuom la, ka fak le dawn sung po ka rawng bawl la, chu zoah nangin fa ve rawh' in ti lem naw ding maw?
9. In thu anga a thaw leiin in siehlaw kuoma chun lawm thu in hril hlak am a ni?
10. Chuong ang bokin nangni khom thaw dinga thu an pek po po cheu in thaw zo vong hnungin, 'Kan thaw dinga bituk chauh kan thaw leiin siehlaw tlaktlai lo tak kan nih' ti ro" a ta.
11. Jerusalem pana a fe tumin Galili le Samari ram inrina tieng lam chu Isun a hraw a.
12. Khaw pakhat a lut tawmin phar sawm a'n tuokpui a.
13. Anni chu hla deu hlekah an ngir a, " Hotu Isu, mi lunginsiet rawh!" tiin inring takin an khek a.
14. Anni a hmu chun, "Fe unla, thiempu kawlah va'n entir ro" a ta, chuonga an fe lai chun an hung inthieng tah a.
15. Anni laia pakhat chun a dam ti a hriet phing leh rawl inring taka Pathien inpak pumin a kir nawk a.
16. Isu ke bulah bokkhupin lawmthu a hril a, ama chu Samari mi a nih.
17. Isu chun a lo biek a, "Mi sawm kha in hung inthieng ta vong an naw maw?
18. Pakuohai kha khaw la'm an um ta a? Hi awze mig chauh naw hi Pathien inpak dinga hung kir an um naw a ni maw?" a ta.
19. Chuongchun a kuomah, "Tho la, fe ta rawh, i ringnain a sukdam che a nih" a ta.
20. Farisaihaiin Pathien ram hung tlung hun ding an indon leiin Isun an kuomah, " Pathien ram hung tlung chu mita hmu thei chi a ni nawh.
21. 'En ta, hi taka hi, saw taka saw' ti bok naw ni hai. Ngai ta u, Pathien ram chu nangnia um a nih"h a ta.
22. A zirtirhai chun a kuomah, "Mihriem Naupa dam lai hun dam hi ni khat bek in hmu nuom nawk hun la tlung a ta, sienkhom hmu ta si naw ti niu.
23. In kuomah, 'En ta u, saw taka saw' amanih, 'En ta u, hi taka hi' amanih la ting an ta; sienkhom fe suok naw unla, anni chu zui bok naw ro.
24. Kawl inlepin kawl kil a el var ton zok zok ang hin Mihriem Naupa hung nawkna nia chun um a tih.
25. Nisienlakhom, chu hma chun thil tam tak tuor hmasa phot a ta, tu lai ruoltharhai hin hnawl an tih.
26. "Nova hun laia thil um dan ang khan, Mihriem Naupa hung nawk ni khomin um a tih.
27. Longa Nova a lut ni chen khan mihaiin fain an dawn a, nuhmei pasal an innei a. Chu zoah tui a hung let a, an rengin sukbohmang an ni ta khah.
28. "Chuong ang bokin Lota dam lai khom khan thil a tlung khah; fain an dawn a, inchawin an zor a, thil an phun a, in an bawl a;
29. nisienlakhom Sodom khuoa inthoka Lota a suok ni chun vana inthokin mei le kat a sur a, an rengin a sukhlum vong a ni khah.
30. Mihriem Naupa a hung inlang nawk ni chun chuong ang bok chu la ning a tih.
31. Chu huna chun in chunga um chu in sunga sum inchu dingin tum naw raw se. Loa um chu inah hung bok naw raw se.
32. Lota nuhmei kha hre zing ro.
33. Tu khom mani hringna hum tum taphot chun chan a ta, tu khom mani hringna chan taphot chun hum a tih.
34. "Ka hril cheu hi, chu zan chun khum khata zal mi pahni chu pakhat lak ning a ta, pakhat chu maksan ning a tih.
35. Suma nuhmei pahni bu suk lai chu pakhat lak ning a ta, pakhat chu maksan ning a tih.
36. Pasal pahni lo fe chu pakhat lak ning a ta, pakhat chu maksan ning a tih" a ta
37. A zirtirhai chun, "Lalpa, khaw la'm ie?" an ta. Ama chun, "Saruong umna taphotah mulukolhai khom an fuon khawm hlak" a ta.
←  Luke (17/24)  →