Luke (15/24)  

1. Tum khat chu a thu ngaithla dingin sienkhontuhai le mi suol tam takin Isu an hung pan a.
2. Farisaihai le Dan zirtirtuhai ruok chun, "Hi pa hin mi suol a pawl a, bu dam a fakpui tawla" tiin a chungah an chier a.
3. Ama chun an kuomah hi tekhin thu hi a hril a:
4. " Nangni lai tuin amanih beram za neiin anni laia pakhat bo ta sien, sawmkuo pakuohai chu phulah maksanin a'n hmang chu a hmu hma khat tuin am zong nawng a ta?
5. A hmu nawk chun lawm takin a liengkoah put a ta,
6. a in a tlung chun a ruolhai le a tuolbawmhai ko khawm a ta, 'Ka beram inhmang kha ka hmu nawk tah a, thaw ro, lawm ei tiu' ting a tih.
7. Ka hril cheu hi, chuong ang chie chun sim ding chuong nei ta lo mi fel sawmkuo pakuohai chunga an lawmna neka nasain mi suol pakhat sim chungah vanah lawmna nasa lem a tih.
8. "Chun, nuhmei tu khomin duli sawm neiin pakhat inhmang ta sien, khawnvar insita a in phitin, a hmu nawk hma khata zong lo tu am an um ding?
9. A hmu nawk pha chun a ruolhai leh a tuolbawmhai ko khawm a ta, 'Ka duli inhmang kha ka hmu nawk tah a, thaw ro, lawm ei tu' ting a tih.
10. Ka hril cheu hi, chuong ang bokin mi suol pakhat sim chungah Pathien vantirkohai nasa takin an lawm a nih" a ta.
11. Isun a hril pei a. "Mi pakhat hin nau pasal pahni a nei a.
12. A naupang lem chun a pa kuomah, 'Pa, ka ro chan ding mi pe rawh' a ta, chuongchun ro chu an kuomah a sem tah a.
13. Chu hnung sawt naw teah a naupang lem chun a chanpuol po chu a lak a, ram hla takah a fe a, chu taka chun inhoi chenin a sukriral ta vong a.
14. A nei po po a khawral vong hnungin chu rama chun tampui a tla a, fak ding a nei ta naw a.
15. Chuongchun, chu rama mi pakhat chu a bel a, ama chun vok bu pea sor dingin a lo tieng a tir a.
16. Vok bua an pek fanghra chun insukkhop ve tak a nuom a, tu khomin fak ding an pek si nawh.
17. "Sienkhom a hung inhriet suok phing leh, 'Ka pa ina inhlawfahai lai khom khan fak seng lo nei an tam vei leh, kei hlak chu hi taka hin phingtamin ka thi el ding a ni si a.
18. Tho ka ta, ka pa kuomah feng ka ta, 'Pa, vana mi chunga le nangma chungah thil suol ka lo thaw a nih.
19. I naupaa inbuk tlak khom ka ni ta naw a, i ina inhlawfa pakhat angin mi sor ve el rawh' ting ka tih, a ta.
20. "Chuongchun a tho a, a pa kuom tieng a pan tah a. Hla taka a la um laiin a pa chun a lo hmu a, a lunginsiet em em a, a tlan a, a kuo a, a fawp ngawi ngawi a.
21. A naupa chun, 'Pa, vana mi chunga le i chungah thil suol ka lo thaw a nih, i naupaa inbuk tlak khom ka ni ta nawh' a ta.
22. "A pa ruok chun a siehlawhai kuomah, 'Zakuo tha tak kha hung la vat unla, inhaktir unla, kutsebi inbuntir unla, pheikhok khom inbuntir bok ro;
23. bawng tuoi thau tak kha hung kei unla, that ro. A lawmna dingin ruoi theng ei tiu.
24. Ka naupa hi a thi a, a hung hring nawk tah a; a'n hmang a, ei hmu nawk tah a ni hi" a ta. Chuongchun an lawm tan tah a.
25. "Chuong lai chun a naupa upa lem chu loah a um a. A hung inlawi chun, in a tlung tawmin rimawi le lam ri a hriet a.
26. A siehlaw pakhat chu a koa, "Chu ri chu ieng ri am an ta leh?" tiin a'n don a.
27. Ama chun, 'I sang a hung kir a, dam taka a hmu nawk leiin i pain bawng tuoi thau a that a nih' a ta.
28. A naupa upa lem chu a lung a sen hle a, inah chun a lut nuom naw a. A pa chu a hung suok a, a va thlem a.
29. A naupa chun, 'Ngai rawh, hieng chen hi suok sorin i mi sor a, i thupek voi khat khom ka sel ngai nawh. Sienkhom, ka ruolhai le kan insukhlimna ding kelte takngiel khom i mi pek ngai nawh.
30. Tuhin i naupa, nawchizorhai laia i sum the ral vongtu hi a hung kir a, bawng tuoi thau tak el i lo thatpek nawk nghal si hi' a ta.
31. "A pa chun, 'Ka naupa, nang chu ka kuoma um zing i na, ka nei po po hi i ta annawm.
32. Hi i sangpa ruok hi chu a thi tah kha a hung hring nawk a, an hmang ta kha ei hmu nawk tah a ni hi; hlim taka lawm ding ei ni hrim a nih'a ta" tiin.

  Luke (15/24)